ក្រុម«ស្ត្រីថ្ងៃសុក្រ» នៅថ្ងៃសុក្រនេះ បានចេញមុខតវ៉ាសាជាថ្មី ដោយស្នើសុំទៅប្រទេសសមាជិកអាស៊ាន និងសហរដ្ឋអាមេរិកឱ្យជួយធ្វើអន្តរាគមន៍ឲ្យមានការដោះលែងក្រុមគ្រួសាររបស់ពួកគេដែលកំពុងជាប់ពន្ធនាគារ។
ពួកគេយល់ថា បើរដ្ឋាភិបាលមានឆន្ទៈដោះស្រាយបញ្ហានយោបាយកម្ពុជា និងដោះលែងសកម្មជននយោបាយ និងសង្គម នោះកម្ពុជានឹងអាចស្តារមុខមាត់ក្នុងជំនួបកំពូលអាស៊ានដែលនឹងធ្វើឡើងនៅសប្តាហ៍ក្រោយ ហើយកម្ពុជាធ្វើជាម្ចាស់ផ្ទះ។
ក្រុមស្ត្រីថ្ងៃសុក្រ ដែលមានគ្នាជាង១០នាក់ បានប្រមូលផ្តុំគ្នានៅក្បែរស្ថានទូតអាមេរិក ដោយមានកាន់បដាសរសេរជាអក្សរ«ដោះលែងអ្នកទោសនយោបាយនៅកម្ពុជា» និង«សិទ្ធិមនុស្ស និងប្រជាធិបតេយ្យនៅអាស៊ាន» និងមានការលើករូបថតក្រុមគ្រួសាររបស់ពួកគេដែលជាប់ពន្ធនាគារ។ ពួកគេក៏បានស្រែកទាមទារថា៖ «អ្នកនយោបាយគ្មានកំហុសទេ កិច្ចប្រជុំអាស៊ានត្រូវតែដោះលែងអ្នកនយោបាយៗ»។
នៅពេលក្រុមស្ត្រីថ្ងៃសុក្រប្រមូលផ្តុំស្រែកទាមទារនេះ ក៏មានអាជា្ញធរ និងសន្តិសុខខណ្ឌដូនពេញ យ៉ាងតិច២០នាក់ មករារាំង និងប្រាប់ក្រុមស្ត្រីទាំងនោះឱ្យបញ្ឈប់ការលើកបដា និងឈប់ស្រែកទាមទារនៅលើសួនទល់មុខស្ថានទូតអាមេរិកផងដែរ។
អ្នកស្រី ព្រុំ ចាន់ថា ជាភរិយារបស់លោក កាក់ កុម្ភារ អតីតសមាជិកក្រុមប្រឹក្សារាជធានីភ្នំពេញនៃអតីតគណបក្សសង្គ្រោះជាតិដែលកំពុងស្ថិតក្នុងមន្ទីរឃុំឃាំង ប្រាប់អ្នកសារព័ត៌មាននៅពេលកំពុងប្រមូលផ្តុំគ្នាថា ពួកគេស្នើឱ្យសហរដ្ឋអាមេរិក ជាពិសេសប្រធានាធិបតីអាមេរិក លោក Joe Biden ដែលនឹងមកប្រទេសកម្ពុជានាសប្តាហ៍ក្រោយ ជំរុញរដ្ឋាភិបាលកម្ពុជាឱ្យគោរពសិទ្ធិមនុស្ស និងលទ្ធិប្រជាធិបតេយ្យ និងជួយធ្វើអន្តរាគមន៍ឱ្យមានការដោះលែងសកម្មជននយោបាយបក្សប្រឆាំង។
អ្នកស្រីថ្លែងថា៖ «លោក Joe Biden អញ្ជើញមក [កម្ពុជាដើម្បីប្រជុំអាស៊ាន] អ៊ីចឹងខ្ញុំសូមដើម្បីជួបគាត់ផ្ទាល់ ដើម្បីនិយាយរឿងដែលក្រុមគ្រួសាររបស់ពួកខ្ញុំកំពុងជាប់ឃុំពន្ធនាគារព្រៃសក៏ដូចជាត្រពាំងផ្លុង[ខេត្តត្បូងឃ្មុំ] ជាពិសេសចង់ឱ្យគាត់ជំរុញរដ្ឋាភិបាល ដើម្បីធ្វើយ៉ាងណាក៏ដោយឱ្យដោះលែងគ្រួសាររបស់ពួកខ្ញុំក៏ដូចជាប្រទេសកម្ពុជាគោរពសិទ្ធិមនុស្ស»។
អ្នកស្រី អៀប សួគ៌ អាយុ៧០ឆ្នាំ ដែលស្វាមីឈ្មោះ គង់ សំអាន កំពុងជាប់ពន្ធនាគារត្រពាំងផ្លុង ក៏បានមកទាមទារឱ្យមានការដោះលែងស្វាមីរបស់អ្នកស្រីផងដែរ។
អ្នកស្រីប្រាប់វីអូអេថា៖ «ខ្ញុំចង់ឱ្យកម្ពុជាដើរតាមគន្លងធម៌អាស៊ាន ពីព្រោះគាត់ជាប្រធានអាស៊ាន។ គាត់ត្រូវតែឈានមុខមុនគេ រៀបចំប្រទេសឱ្យបានស្អាត ដោះលែងសកម្មជនឱ្យអស់កុំឱ្យមានសកម្មជនជាប់ទោសឱ្យសោះ ព្រោះអីសកម្មជនសុទ្ធតែជាមនុស្សល្អ ដើម្បីគាត់ចម្រាញ់យកទៅធ្វើការងារបម្រើជាតិ មិនមែនយកទៅដាក់ក្នុងពន្ធនាគារទេ»។
ចំណែកភរិយារបស់អតីតសកម្មជនគណបក្សសង្គ្រោះជាតិ លោក គង់ ម៉ាស់ គឺអ្នកស្រី កុក សាត អាយុ៣៧ ឆ្នាំ យល់ឃើញថា កម្ពុជា ដែលនឹងធ្វើជាម្ចាស់ផ្ទះកិច្ចប្រជុំអាស៊ាន គួរតែដោះស្រាយបញ្ហានយោបាយ និងដោះលែងសកម្មជននយោបាយទាំងអស់ដែលកំពុងជាប់ឃុំ ដើម្បីអាចឱ្យកម្ពុជារក្សាមុខមាត់បាននៅចំពោះមុខមេដឹកនាំពិភពលោក។
អ្នកស្រីថ្លែងថា៖ «សម្រាប់ខ្ញុំយល់ថា ប្រសិនបើគាត់ដោះលែងអ្នកទោសនយោបាយទាំងអស់ ហើយងាកមករកកិច្ចចរចា ឬរកតុចរចាពាក់ព័ន្ធគណបក្សប្រឆាំងអី ពាក់ព័ន្ធសិទ្ធិមនុស្ស។ បើសិនជាដោះលែងពួកគាត់ទាំងអស់។ ខ្ញុំគិតថា ក៏ជាមុខមាត់មួយដែររបស់កម្ពុជា ដែលថា ជាប្រធានអាស៊ានផង»។
កញ្ញា Arzate, Stephanie អ្នកនាំពាក្យស្ថានទូតអាមេរិកប្រចាំនៅកម្ពុជា ប្រាប់វីអូអេតាមសារអ៊ីម៉ែលនៅថ្ងៃសុក្រនេះថា ស្ថានទូតបានដឹងអំពីការតវ៉ារបស់ក្រុមស្រ្តីថ្ងៃសុក្រដែលក្រុមគ្រួសាររបស់ពួកគេត្រូវបានឃុំខ្លួន ដោយសារការបញ្ចេញមតិផ្នែកនយោបាយដោយសន្តិវិធី។ កញ្ញាបន្ថែមថា ស្ថានទូតអាមេរិកជំរុញរដ្ឋាភិបាលកម្ពុជាឱ្យទម្លាក់ចោលរាល់ការចោទប្រកាន់លើសកម្មជនដែលតវ៉ាដោយសន្តិវិធី គោរពសិទ្ធិមនុស្សជាមូលដ្ឋាន ដូចដែលត្រូវបានធានាដោយរដ្ឋធម្មនុញ្ញកម្ពុជា និងបើកលម្ហសេរីភាពស៊ីវិល និងនយោបាយឡើងវិញ។
ស្វាមីរបស់ក្រុម«ស្ត្រីថ្ងៃសុក្រ»ត្រូវបានអាជ្ញាធរចាប់ខ្លួនជាបន្តបន្ទាប់ក្នុងឆ្នាំ២០១៩ និងឆ្នាំ២០២០ ហើយពួកគេត្រូវតុលាការចោទប្រកាន់ជាច្រើនករណីពាក់ព័ន្ធនឹងសកម្មភាពសង្គម និងការរិះគន់រដ្ឋាភិបាល។ ក្នុងចំណោមការចោទប្រកាន់មានបទញុះញង់កុំឲ្យយោធិនស្តាប់បង្គាប់ ការញុះញង់ឲ្យប្រព្រឹត្តបទឧក្រិដ្ឋ ឬបង្កភាពវឹកវរក្នុងសង្គម រហូតដល់រួមគំនិតក្បត់ ដែលទោសអតិបរមាពួកគេត្រូវទទួល គឺអាចជាប់ពន្ធនាគាររហូតដល់២០ឆ្នាំ។
លោក ជិន ម៉ាលីន អ្នកនាំពាក្យក្រសួងយុត្តិធម៌ ថ្លែងថា ការដោះលែងសកម្មជនទាំងនោះមិនមែនជាការស្តារមុខមាត់កម្ពុជាឡើយ។
លោកបញ្ជាក់ជាអក្សរតាមប្រព័ន្ធតេឡេក្រាមថា៖ «ការដោះលែងអ្នកដែលប្រព្រឹត្តល្មើសច្បាប់ហើយដែលត្រូវតុលាការផ្តន្ទាទោស មិនមែនជាការស្តារមុខមាត់ទេ តែមានតែការអនុវត្តច្បាប់យ៉ាងម៉ឹងម៉ាត់ប៉ុណ្ណោះ ទើបជាការលើកស្ទួយប្រជាធិបតេយ្យ និងសិទ្ធិមនុស្សយ៉ាងពិតប្រាកដក្នុងសង្គមនីតិរដ្ឋ។ ប្រសិនបើពួកគេយល់ថា សកម្មភាពខ្លួនមិនមែនជាបទល្មើសគឺត្រូវចូលរួមក្នុងដំណើរការនីតិវិធីរបស់តុលាការដើម្បីការពារខ្លួនតាមផ្លូវច្បាប់»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ថ្លែងថាខណៈកម្ពុជារៀបចំកិច្ចប្រជុំកំពូលអាស៊ាន បើសិនជារដ្ឋាភិបាល អាចដោះស្រាយបញ្ហានយោបាយ និងទម្លាក់ចោលបទចោទប្រកាន់លើសកម្មជននយោបាយ នោះវាជារឿងដ៏ល្អ ដែលអាចទទួលបានការសាទរពីសហគមន៍ជាតិ និងអន្តរជាតិ អំពីលម្ហលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។
លោកថ្លែងថា៖ «បច្ចុប្បន្ននេះ យើងមិនទាន់មានពន្លឺណាមួយសោះ ដែលបង្ហាញពីសុច្ឆន្ទៈរបស់រាជរដ្ឋាភិបាល ក៏ដូចជាស្ថាប័នពាក់ព័ន្ធនានា និងអ្នកពាក់ព័ន្ធនានាបង្ហាញនូវវិធីសាស្ត្រក្នុងការរកដំណោះស្រាយជូនប្រជាពលរដ្ឋ និងសកម្មជន នយោបាយ និងស្តារស្ថានភាពប្រទេសជាតិឱ្យល្អប្រសើរនៅឡើយទេ។ អ៊ីចឹងយើងទទូចឱ្យមានការពិចារណាក្នុងរឿងហ្នឹង ហើយដោះស្រាយបញ្ហាទាំងអស់នេះដើម្បីទទួលបានការសាទរពីសហគមន៍ជាតិ និងអន្តរជាតិអំពីលម្ហលទ្ធិប្រជាធិបតេយ្យ និងការគោរពសិទ្ធិមនុស្សនេះ»។
គួរបញ្ជាក់ថា កាលពីកន្លងទៅ សាលាដំបូងរាជធានីភ្នំពេញបានចេញសាលក្រមដោយផ្តន្ទាទោសអតីតសកម្មជនគណបក្សសង្គ្រោះជាតិ ចំនួន៥១នាក់ឱ្យជាប់ពន្ធនាគារ ចាប់ពី៥ឆ្នាំទៅ៨ឆ្នាំ ក្រោមបទចោទ«រួមគំនិតក្បត់ និងញុះញង់» នៅក្នុងសំណុំរឿងគាំទ្រការវិលត្រឡប់របស់លោក សម រង្ស៊ី អតីតប្រធានគណបក្សសង្រ្គោះជាតិ កាលពីឆ្នាំ២០១៩៕
