សហភាពអឺរ៉ុបបាននិយាយថា ប្រទេសមហាអំណាចពិភពលោកនិងអ៊ីរ៉ង់ បានយល់ព្រមកាលពីថ្ងៃសុក្រ ដើម្បីជួបពិភាក្សាគ្នានៅសប្តាហ៍ក្រោយនៅទីក្រុងវីយែនស្តីពីកិច្ចព្រមព្រៀងនុយក្លេអ៊ែរ ដោយអ្នកសម្រុះសម្រួលធ្វើទំនាក់ទំនងដាច់ដោយឡែកជាមួយសហរដ្ឋអាមេរិក។
សេចក្តីថ្លែងការណ៍មួយបានបញ្ជាក់ថា អ្នកចូលរួមនឹងជួបប្រជុំគ្នានៅក្នុងរដ្ឋធានីនៃប្រទេសអូទ្រីសដើម្បីកំណត់ឱ្យច្បាស់នូវវិធានការនៃការដកទណ្ឌកម្មនិងវិធានការគ្រប់គ្រងនុយក្លេអ៊ែរ រួមទាំងតាមរយៈការកោះប្រជុំក្រុមជំនាញពាក់ព័ន្ធ។ ដោយនិយាយយោងកិច្ចព្រមព្រៀងនេះ សហភាពអឺរ៉ុបបានលើកឡើងថា៖ «អ្នកសម្របសម្រួលនឹងពង្រឹងទំនាក់ទំនងដាច់ដោយឡែកនៅក្នុងទីក្រុងវីយែនជាមួយអ្នកចូលរួម និងសហរដ្ឋអាមេរិក»។
ការប្រកាសនេះធ្វើឡើងបន្ទាប់ពីសន្និសីទវីដេអូរបស់ប្រទេសហត្ថលេខីកិច្ចព្រមព្រៀងឆ្នាំ២០១៥ ខណៈដែលពួកគេទន្ទឹងរង់ចាំទីក្រុងវ៉ាស៊ីនតោនត្រឡប់មកចរចាវិញ បន្ទាប់ពីលោកអតីតប្រធានាធិបតី Donald Trump ដកស.រ.អា.ចេញពីការចរចានេះ។ រដ្ឋមន្រ្តីក្រសួងការបរទេសអ៊ីរ៉ង់លោក Mohammad Javad Zarif បាននិយាយថា កិច្ចប្រជុំនេះ នឹងធ្វើឡើងនៅថ្ងៃអង្គារ ហើយបានទទូចថា គោលបំណងគឺត្រូវសម្រេចការដកទណ្ឌកម្មនិងវិធានការគ្រប់គ្រងនុយក្លេអ៊ែរឱ្យបានឆាប់រហ័សសម្រាប់ការដកចេញទណ្ឌកម្មទាំងអស់ បន្ទាប់មកប្រទេសអ៊ីរ៉ង់បញ្ឈប់វិធានការរបស់ខ្លួន។ លោកបានសរសេរនៅលើបណ្តាញសង្គមធ្វីតថឺថា៖ «គ្មានកិច្ចប្រជុំអ៊ីរ៉ង់-អាមេរិកទេ។ មិនចាំបាច់ទេ»។
ប្រធានាធិបតីអាមេរិកលោក Joe Biden បានសន្យាថា នឹងចូលរួមកិច្ចព្រមព្រៀងនេះឡើងវិញ តែជាដំបូងអ៊ីរ៉ង់ត្រូវគោរពការប្តេជ្ញាចិត្តដែលបានបោះបង់ចោលជាការសងសឹកនឹងចំណាត់ការរបស់លោក Trump។ ប៉ុន្តែទីក្រុងតេអេរ៉ង់និយាយថា ទីក្រុងវ៉ាស៊ីនតោនត្រូវតែដកទណ្ឌកម្មអន្តរជាតិដែលលោក Trump បានដាក់ជាមុនសិន ទើបអ៊ីរ៉ង់ធ្វើការផ្លាស់ប្តូរដូចមុនវិញ ហើយបដិសេធមិនធ្វើកិច្ចចរចាដោយផ្ទាល់ជាមួយសហរដ្ឋអាមេរិកទេ៕
