យោធាមីយ៉ាន់ម៉ាបានបាត់បង់ប្រភពប្រាក់ចំណូលមួយ នៅពេលដែលក្រុមហ៊ុនប្រេងឥន្ធនៈ Total ដ៏ធំរបស់បារាំងបានថ្លែងកាលពីចុងខែឧសភាកន្លងទៅថា ការទូទាត់សាច់ប្រាក់ទៅក្នុងក្រុមហ៊ុនរួមមួយដែលមានភាគហ៊ុនរបស់យោធាមីយ៉ាន់ម៉ាត្រូវបានផ្អាកដោយសារតែភាពចលាចលនៅក្នុងប្រទេសនេះ។
ក្រុមហ៊ុនប្រេង Total ស្ថិតក្រោមសម្ពាធពីសកម្មជនគាំទ្រលទ្ធិប្រជាធិបតេយ្យក្នុងប្រទេសមីយ៉ាន់ម៉ា ដែលទាមទារឱ្យក្រុមហ៊ុននេះ «បញ្ឈប់ផ្តល់ហិរញ្ញប្បទានដល់របបយោធា» ចាប់តាំងពីមានរដ្ឋប្រហារយោធាកាលពីខែកុម្ភៈមក។ក្រោយពីរដ្ឋប្រហារនោះមកមានការបង្ក្រាបយ៉ាងឃោរឃៅទៅលើអ្នកក្រុមអ្នកប្រឆាំងតវ៉ា។
ក្រុមតាមដានស្ថានការណ៍ក្នុងស្រុកមួយបានឲ្យដឹងថាមនុស្សប្រមាណជាង ៨០០ នាក់ត្រូវបានក្រុមយោធាសម្លាប់។
ក្រុមហ៊ុនប្រេងTotal បានបញ្ជាក់ក្នុងសេចក្តីថ្លែងការណ៍មួយថា សេចក្តីសម្រេចក្នុងការផ្អាកការទូទាត់ប្រាក់ត្រូវបានធ្វើឡើងនៅក្នុងកិច្ចប្រជុំម្ចាស់ភាគហ៊ុនរបស់ក្រុមហ៊ុនMoattama Gas Transportation Company Limited (MGTC) កាលពីថ្ងៃទី១២ ខែឧសភាកន្លងទៅ។ ក្រុមហ៊ុនMGTC ជាក្រុមហ៊ុនរកស៊ីរួមមួយដែលមានកម្មសិទ្ធិលើបណ្តាញបំពង់ប្រេងដែលតភ្ជាប់ពីទីតាំងបូមប្រេង ក្នុងតំបន់សមុទ្រ Yadana និងប្រទេសថៃ។
ការផ្អាកការទូទាត់នេះត្រូវបានស្នើឡើងដោយក្រុមហ៊ុនប្រេងTotal ដែលមានភាគហ៊ុនចំនួន ៣១% នៅក្នុងក្រុមហ៊ុន MGTC និងក្រុមហ៊ុនប្រេងChevron របស់អាមេរិកដែលមានភាគហ៊ុនចំនួន ២៨%។
ក្រុមហ៊ុនថៃ PTTEP មានភាគហ៊ុនចំនួន២៥% ក្នុងក្រុមហ៊ុននោះ ខណៈដែលក្រុមហ៊ុនប្រេងនិងឧស្ម័នមីយ៉ាន់ម៉ា (MOGE) ដែលកាន់កាប់ដោយយោធាមានភាគហ៊ុនចំនួន ១៥%។
ក្រុមហ៊ុនប្រេងនិងឧស្ម័នមីយ៉ាន់ម៉ា (MOGE) រកប្រាក់ចំណូលប្រចាំឆ្នាំបានប្រមាណ១ពាន់លានដុល្លារពីការលក់ឧស្ម័នធម្មជាតិ។
ក្រុមហ៊ុន Total បានថ្លែងថា «ក្នុងបរិបទដែលប្រទេសមីយ៉ាន់ម៉ាមិនមានស្ថិរភាពការបែងចែកសាច់ប្រាក់ទៅឱ្យម្ចាស់ភាគហ៊ុនរបស់ក្រុមហ៊ុនត្រូវបានផ្អាក» ដែលការផ្អាកនេះមានប្រសិទ្ធភាពចាប់តាំងពីថ្ងៃទី១ ខែមេសាមក។
ក្រុមហ៊ុន Total បានបន្ថែមទៀតថាខ្លួន «ថ្កោលទោសអំពើហិង្សា និងការរំលោភបំពានសិទ្ធិមនុស្សដែលកំពុងកើតឡើងនៅក្នុងប្រទេសមីយ៉ាន់ម៉ា» និងគោរពតាមការដាក់ទណ្ឌកម្មណាមួយប្រឆាំងនឹងរបបយោធាដោយសហភាពអឺរ៉ុបឬសហរដ្ឋអាមេរិក។
បណ្តាញបំពង់ប្រេងរបស់ក្រុមហ៊ុន MGTC នាំយកប្រេងពីកន្លែងបូមប្រេងក្នុងតំបន់សមុទ្រYadanaដែលប្រតិបត្តិការដោយក្រុមហ៊ុន Total ទៅព្រំដែនមីយ៉ាន់ម៉ាជាមួយនឹងប្រទេសថៃ។
ក្រុមហ៊ុនTotal ថាខ្លួននឹងបន្តផលិតប្រេងដើម្បីកុំឱ្យប៉ះពាល់ដល់ការផ្គត់ផ្គង់អគ្គិសនីនៅក្នុងប្រទេសទាំងពីរនេះ។
បើយោងទៅលើរបាយការណ៍ហិរញ្ញវត្ថុរបស់ក្រុមហ៊ុនTotal បានឲ្យដឹងថាក្រុមហ៊ុននេះ បានបង់ប្រាក់ប្រមាណ២៣០ លានដុល្លារ ក្នុងឆ្នាំ២០១៩ និងទឹកប្រាក់ចំនួន ១៧៦ លានដុល្លារក្នុងឆ្នាំ២០២០ ក្នុងរូបភាពជាពន្ធដារនិង «សិទ្ធិសម្រាប់ការផលិត» ទៅឱ្យអាជ្ញាធរមីយ៉ាន់ម៉ា។
កាសែតបារាំងមួយឈ្មោះ Le Monde បានរាយការណ៍លម្អិតពីការពាក់ព័ន្ធរបស់ក្រុមហ៊ុនប្រេងTotal ជាមួយនឹងក្រុមហ៊ុនMGTC កាលពីដើមខែឧសភាកន្លងទៅនេះ ហើយក៏បានរាយការណ៍ផងដែរថា ក្រុមហ៊ុននេះបានបើកការិយាល័យនៅលើដែនដីកោះBermuda ដែលល្បីថាយកពន្ធទាបនោះ។
កាសែត Le Monde បានក៏បានរកឃើញផងដែរថា «ប្រាក់ចំណេញដ៏ច្រើនមហិមាពីប្រតិបត្តិការប្រេងនេះមិនត្រូវបានបង់ចូលទៅក្នុងថវិការដ្ឋរបស់ប្រទេសមីយ៉ាន់ម៉ានោះទេ ប៉ុន្តែត្រូវបានរក្សាទុកយ៉ាងច្រើនដោយក្រុមហ៊ុនដែលគ្រប់គ្រងទាំងស្រុងដោយក្រុមយោធា»ទៅវិញ។
ប៉ុន្តែប៉ុន្មានថ្ងៃបន្ទាប់ពីការចេញផ្សាយសេចក្តីរាយការណ៍នោះមក កាសែត Le Monde និយាយថា ក្រុមហ៊ុន Total បានលុបចោលនូវគម្រោងផ្សាញពាណិជ្ជកម្មមួយចំនួនដែលខ្លួនគ្រោងនឹងផ្សាយនៅលើទំព័រកាសែតនេះនៅប៉ុន្មានសប្តាហ៍ខាងមុខនោះ។
ក្រុមហ៊ុនបរទេស
អង្គការក្រៅរដ្ឋាភិបាលមួយចំនួនបានជំរុញឱ្យក្រុមហ៊ុនបរទេសនានាត្រួតពិនិត្យមើលឡើងវិញនូវវត្តមានរបស់ពួកគេនៅក្នុងប្រទេសមីយ៉ាន់ម៉ា ខណៈយោធាកំពុងបង្កើនការប្រើប្រាស់កម្លាំងដ៏ឃោរឃៅរបស់ខ្លួនទៅលើក្រុមអ្នកតវ៉ាប្រឆាំងនោះ។
របបយោធាយោធាមីយ៉ាន់ម៉ាមានផលប្រយោជន៍នៅក្នុងវិស័យធំៗជាច្រើនក្នុងសេដ្ឋកិច្ចមីយ៉ាន់ម៉ាដោយរាប់ចាប់ពីវិស័យរ៉ែធនាគារ ប្រេងរហូតដល់វិស័យទេសចរណ៍ជាដើម។
ក្រុមហ៊ុនថាមពល EDF ដ៏ធំរបស់បារាំងបានផ្អាកសកម្មភាពរបស់ខ្លួននៅក្នុងប្រទេសមីយ៉ាន់ម៉ា ដែលនៅទីនោះក្រុមហ៊ុននេះបានជាប់ពាក់ព័ន្ធក្នុងគម្រោងសាងសង់ទំនប់វារីអគ្គិសនីមួយកន្លែងដែលមានទឹកប្រាក់ប្រមាណ១,៥ ពាន់លានដុល្លារ។
ទន្ទឹមនឹងនេះដែរក្រុមហ៊ុនផលិតរថយន្តSuzuki របស់ជប៉ុន ក៏បានផ្អាកប្រតិបត្តិការរបស់ខ្លួននៅក្នុងរោងចក្រក្នុងស្រុកចំនួនពីរភា្លមៗរបស់មីយ៉ាន់ម៉ាបន្ទាប់ពីមានរដ្ឋប្រហារយោធានោះមក។ រោងចក្រទាំងពីរនេះបានដំឡើងរថយន្តចំនួន ១៣.៣០០ គ្រឿងនៅក្នុងឆ្នាំ២០១៩ ដែលភាគច្រើនសម្រាប់ទីផ្សារក្នុងស្រុក។
ប៉ុន្តែក្រុមហ៊ុន Suzuki ដែលមានវត្តមាននៅក្នុងប្រទេសមីយ៉ាន់ម៉ាចាប់តាំងពីឆ្នាំ១៩៩៨មកនោះបានបើកដំណើរការរោងចក្ររបស់ខ្លួនឡើងវិញប៉ុន្មានថ្ងៃក្រោយមក និងមានបំណងសាងសង់រោងចក្រទី៣មួយកន្លែងទៀតនៅក្នុងប្រទេសនេះ។
មីយ៉ាន់ម៉ាក៏ជាប្រទេសផលិតសម្លៀកបំពាក់ដ៏សំខាន់មួយផងដែរ។ ក្រុមហ៊ុនសម្លៀកបំពាក់មួយចំនួនដូចជាក្រុមហ៊ុន Benetton របស់ប្រទេសអ៊ីតាលី និងក្រុមហ៊ុន H&M របស់ប្រទេសស៊ុយអែតជាដើមបានផ្អាកការបញ្ជាទិញថ្មីទាំងអស់របស់ខ្លួនពីប្រទេសមីយ៉ាន់ម៉ា។
ក្រុមហ៊ុនផលិតស្រាបៀរ Kirin របស់ជប៉ុនបាននិយាយថា ខ្លួននឹងកាត់ផ្តាច់ចំណងទាក់ទងជាមួយក្រុមយោធាដែលខ្លួនបានសហការក្នុងប្រតិបត្តិការរោងចក្រផលិតស្រាក្នុងស្រុកចំនួនពីរកន្លែង។ ក្រុមហ៊ុននេះបានចោទប្រកាន់របបយោធាពីការធ្វើសកម្មភាព«ផ្ទុយនឹង» គោលការណ៍របស់ក្រុមហ៊ុនជប៉ុនស្តីពីសិទ្ធិមនុស្ស។
ប៉ុន្តែក្រុមហ៊ុននេះលើកឡើងថា នៅពេលនេះខ្លួនមិនមានបំណងដកចេញពីប្រទេសមីយ៉ាន់ម៉ាទាំងស្រុងនោះទេ៕
