មន្ត្រីការបរទេសជាន់ខ្ពស់មួយរូបរបស់សហរដ្ឋអាមេរិក គ្រោងនឹងធ្វើដំណើរទស្សនកិច្ចនៅក្នុងប្រទេសកម្ពុជា នៅចន្លោះចុងខែឧសភា និងដើមខែមិថុនា។ នេះបើយោងតាមសេចក្តីប្រកាសព័ត៌មានមួយរបស់ក្រសួងការបរទេសសហរដ្ឋអាមេរិក ចេញផ្សាយនាថ្ងៃសុក្រ ទី ២១ ខែឧសភា។
សេចក្តីប្រកាសស្តីពីដំណើរទស្សនកិច្ចរបស់អនុរដ្ឋមន្ត្រីក្រសួងការបរទេសសហរដ្ឋអាមេរិក គឺអ្នកស្រី Wendy R. Sherman ធ្វើឡើងបួនថ្ងៃ បន្ទាប់ពីរដ្ឋមន្ត្រីការបរទេសកម្ពុជាលោក ប្រាក់ សុខុន និងឯកអគ្គរដ្ឋទូតអាមេរិកប្រចាំកម្ពុជាលោក W. Patrick Murphy បានជួបគ្នាកាលពីថ្ងៃច័ន្ទដើមសប្តាហ៍នេះ ពិភាក្សាអំពីកិច្ចការមួយចំនួន រួមមានជំនួយរបស់សហរដ្ឋអាមេរិកក្នុងការគាំទ្រយុទ្ធនាការប្រយុទ្ធរបស់រដ្ឋាភិបាលកម្ពុជាប្រឆាំងនឹងជំងឺកូវីដ១៩ វិបត្តិនយោបាយតានតឹងនៅប្រទេសមីយ៉ាន់ម៉ា ឬភូមា និងកិច្ចសហប្រតិបត្តិការទ្វេភាគីលើគ្រប់វិស័យ ដូចជាវិស័យពាណិជ្ជកម្មជាដើម។
នៅក្នុងដំណើរទស្សនកិច្ចរយៈពេល ១០ថ្ងៃ ពីថ្ងៃទី២៥ ខែឧសភា ដល់ថ្ងៃទី៤ ខែមិថុនា ទៅកាន់ទ្វីបអឺរ៉ុបនិងតំបន់អាស៊ីអាគ្នេយ៍នេះ អ្នកស្រី Wendy R. Sherman នឹងធ្វើទស្សនកិច្ចនៅរាជធានីភ្នំពេញ «ដោយចូលរួមកិច្ចប្រជុំមួយចំនួន»។ ដំណើរទស្សនកិច្ចរបស់អ្នកស្រី Sherman ផ្តោតសំខាន់លើការ «ពង្រឹងសារជាថ្មីម្តងទៀតអំពីការប្តេជ្ញាចិត្តរបស់សហរដ្ឋអាមេរិក លើសារៈសំខាន់របស់សមាគមប្រជាជាតិអាស៊ីអាគ្នេយ៍ ឬហៅកាត់ថា អាស៊ាន និងដើម្បីដោះស្រាយបញ្ហាទេ្វភាគីនិងបញ្ហាក្នុងតំបន់»។
នេះគឺជាដំណើរទស្សនកិច្ចលើកដំបូងរបស់អ្នកស្រី Sherman ទៅកាន់ប្រទេសកម្ពុជា និងប្រទេសមួយចំនួនទៀតនៅតំបន់អាស៊ីអាគ្នេយ៍ រួមមានឥណ្ឌូណេស៊ី និងថៃ បន្ទាប់ពីអ្នកស្រីបានស្បថចូលកាន់តំណែងជាអនុរដ្ឋមន្ត្រីនៃក្រសួងការបរទេសទី ២១ របស់សហរដ្ឋអាមេរិក កាលពីថ្ងៃទី ១៤ ខែមេសាកន្លងទៅនេះ។ អ្នកស្រី Wendy R. Sherman បានក្លាយជាស្ត្រីដំបូងគេបង្អស់ ដែលបានកាន់មុខតំណែងជាអនុរដ្ឋមន្ត្រីនៃក្រសួងការបរទេសអាមេរិកនេះ។
ការធ្វើដំណើរទស្សនកិច្ចរបស់អ្នកស្រី Sherman ក៏ដើម្បីបង្កើនកិច្ចខិតខំក្នុងតំបន់អាស៊ីអាគ្នេយ៍បន្ថែមទៀត លើការស្វែងរកដំណោះស្រាយពាក់ព័ន្ធនឹងវិបត្តិនយោបាយតានតឹងនៅប្រទេសមីយ៉ាន់ម៉ា «ដោយជំរុញឲ្យយោធាមីយ៉ាន់ម៉ាបញ្ឈប់ការប្រើអំពើហិង្សា ដោះលែងជនដែលយោធាបានឃុំខ្លួន និងស្តារស្ថានភាពឲ្យប្រទេសមីយ៉ាន់ម៉ាដើរទៅរកលទ្ធិប្រជាធិតេយ្យឡើងវិញ»។ នេះបើយោងតាមសេចក្តីប្រកាសព័ត៌មានដដែលនោះ។
មុននឹងធ្វើដំណើរទៅដល់រាជធានីភ្នំពេញ អ្នកស្រី Wendy R. Sherman នឹងធ្វើទស្សនកិច្ចនៅទីក្រុងហ្សាការតា ប្រទេសឥណ្ឌូណេស៊ី ដោយជួបពិភាក្សាទ្វេភាគីជាមួយមន្ត្រីរដ្ឋាភិបាលជាន់ខ្ពស់ឥណ្ឌូណេស៊ី និងជួបជាមួយមន្ត្រីនានាប្រចាំលេខាធិការដ្ឋានអាស៊ាន ដើម្បីពិភាក្សាគ្នាអំពីយុទ្ធសាស្ត្រ «ពង្រីកនិងធ្វើឲ្យភាពជាដៃគូយុទ្ធសាស្ត្ររវាងសហរដ្ឋអាមេរិកនិងអាស៊ានកាន់តែស៊ីជម្រៅជាងមុន»។
ដំណើរទស្សនកិច្ចរបស់អ្នកស្រី Sherman ទៅកាន់តំបន់អាស៊ីអាគ្នេយ៍ នឹងបញ្ចប់នៅទីក្រុងបាងកក ប្រទេសថៃ ទីដែលអ្នកស្រីគ្រោងនឹងជួបជាមួយមន្ត្រីរដ្ឋាភិបាលថៃ ដើម្បី«ពិគ្រោះយោបល់គ្នាអំពីកិច្ចសហប្រតិបត្តិការក្នុងកិច្ចការសន្តិសុខរវាងសហរដ្ឋអាមេរិកនិងប្រទេសថៃ បញ្ហាក្នុងតំបន់ទន្លេមេគង្គ និងវិបត្តិនយោបាយនៅមីយ៉ាន់ម៉ា» ជាដើម។
មុនក្លាយជាអនុរដ្ឋមន្ត្រីនៃក្រសួងការបរទេសអាមេរិក អ្នកស្រី Wendy R. Sherman បានបម្រើការងារជាសាស្ត្រាចារ្យខាងកម្មវិធីសិក្សាអំពីភាពជាអ្នកដឹកនាំក្នុងវិស័យសាធារណៈ និងជានាយិកានៃមជ្ឈមណ្ឌលសិក្សាអំពីភាពជាអ្នកដឹកនាំក្នុងវិស័យសាធារណៈប្រចាំមហាវិទ្យាល័យ Harvard Kennedy School៕
