ភ្ជាប់​ទៅ​គេហទំព័រ​ទាក់ទង

អាជ្ញាធរ​រាជធានី​ផ្តល់​ហេតុផល​ថ្មី​ក្នុង​ការ​បន្ត​បិទ​ទីលាន​ប្រជាធិបតេយ្យ

  • គង់ សុឋានរិទ្ធ

ប៉ូលិស ព្យាយាម​ដក​ខ្លែង​​ពី​ក្រុម​បាតុករ ក្នុង​​ពេល​​ការបង្ហោះ​​ខ្លែង​មួយ​ដែល​មាន​ឈ្មោះ​ថា «ខ្លែង​សម្រាប់​សេរីភាព​ក្នុង​ការបញ្ចេញ​មតិ»​ នៅ​ក្នុង​ទីលាន​ប្រជាធិបតេយ្យ​​ក្នុង​​ទីក្រុង​ភ្នំពេញ។
នៅ​លើ​ផ្លូវ​ម្ខាងជាប់​នឹង​សួន​ប្រជាធិបតេយ្យ​ដែល​ហ៊ុំ​ព័ទ្ធ​ដោយ​របង​លួស​និង​រនាំង​ដែក​និង​កង​កម្លាំង​ប្រដាប់​អាវុធ​យាម​ការពារ​ជាប្រចាំ ​លោក​មាស វឿន ​អង្គុយ​លើ​ម៉ូតូ​របស់​ខ្លួន​រង់ចាំ​អតិថិជន។

​ក្នុងវ័យ​៣៥​ឆ្នាំ ​លោកមាស វឿន ​រត់​ម៉ូតូឌុប​នៅ​ទីនេះ​ជាច្រើន​ឆ្នាំ​មក​ហើយ។

ផ្លូវ​មួយ​ផ្នែក​នេះ​ទើបតែ​ត្រូវ​បាន​បើក​ឡើងវិញ​តែ​ប៉ុណ្ណោះ​មួយ​ថ្ងៃ​ក្រោយ​ពី​ការ​ដោះ​លែង​សកម្មជន​សិទ្ធិមនុស្ស ​តំណាង​កម្មករ​និង​សកម្ម​ជន​ដីធ្លី​ចំនួន​២៣​នាក់​ រួមទាំង​អនីតិជនពីរនាក់​ផ្សេង​ទៀត។​ពួក​គេ​ត្រូវ​ចាប់​ខ្លួនជា​បន្ត​បន្ទាប់​ក្នុង​ចរន្ត​តវ៉ា​មួយ​ក្រោយ​ពី​ការបោះឆ្នោត​ជ្រើសតាំង​តំណាង​រាស្ដ្រ​ដ៏ចម្រូង​ចម្រាស់។​

​សាលា​រាជធានី​ភ្នំពេញ​បាន​បិទ​ទីលាន​សម្រាប់​ធ្វើ​បាតុកម្ម​តវ៉ា​នេះ​ចាប់​តាំង​ពី​ខែ​មេសា​មក​ម្ល៉េះ​ដើម្បី​រារាំង​គណបក្ស​ជំទាស់​និង​ក្រុម​កម្មករ​មិន​ឱ្យធ្វើការ​តវ៉ា​ដ៏​រ៉ាំរ៉ៃ​របស់​ពួកគេ​ប្រឆាំង​ទៅ​នឹង​លទ្ធ​ផល​នៃ​ការបោះឆ្នោត​និង​ទាមទារឲ្យ​មាន​ការដំឡើង​ប្រាក់ខែ​គោល​ដល់​កម្មករ​រោង​ចក្រ។

ហើយ​មន្ត្រី​ផ្លូវការ​សាលា​រាជធានី​ភ្នំពេញ​បាន​អះអាង​ថានឹង​បើក​រនាំង​នៅ​ទីលាន​ប្រជាធិបតេយ្យ​ឡើង​វិញក្រោយ​ពី​មាន​ការស៊ើប​អង្កេត​ចប់​សព្វគ្រប់​លើ​ជន​ដែល​ត្រូវ​ចាប់​ខ្លួន​ខាង​លើ​នេះ។

ប៉ុន្តែ​ក្រោយពី​សាលា​រាជធានី​ភ្នំពេញ​ដោះលែង​ជន​ដែល​ត្រូវ​ចាប់​ខ្លួន​កាល​ថ្ងៃ​ទី​៣០​ខែឧសភា ​សាលា​រាជធានី​ភ្នំពេញ​ទើប​តែ​បើក​ផ្លូវអម​សងខាង​សួន​ប្រជាធិបតេយ្យ​នេះ​មួយ​ចំហៀង​តែ​ប៉ុណ្ណោះ។

​ លោកមាស វឿន ​បញ្ជាក់​ថា​ក្រោយ​ពី​បើក​ផ្លូវ​មួយ​ចំហៀងនេះ​លោក​ងាយ​ស្រួល​នឹង​រក​ម៉ូយ​ម៉ូតូ​ឌុប​បាន​ប្រសើរឡើង​បន្តិច។

«មួយ​ថ្ងៃ​ក្រោយ​ពី​ការ​ដោះ​លែង​អ្នក​ទាំង​២៣​នាក់​នោះ​មក គេបើក​ផ្លូវ​នេះ​ឲ្យជិះ ​ចឹង​បាន​៥០​ភាគ​រយ»។

​អ្នក​រត់​ម៉ូតូឌុប​ រូប​នេះ​យល់​ថា​ក្រោយ​ពី​ការដោះ​លែង​ក្រុម​កម្មករ ​សកម្មជន​ដីធ្លី​និង​សកម្មជន​សិទ្ធិ​មនុស្ស​រួច​ហើយ​សាលា​រាជ​ធានី​ភ្នំពេញ​គួរតែ​បើក​ផ្លូវនិង​ទីលាន​ប្រជាធិបតេយ្យឡើងវិញ។

«ដោះលែង(ពួកគេ)​រួច​ហើយគួរតែបើកទីលាន​ប្រជាធិបតេយ្យឡើងវិញ​ព្រោះ​ឥឡូវ​អត់​មាន​ចលាចល​អីទេ»។​

​នៅ​តាម​ផ្លូវ​អម​សងខាង​នៃ​សួន​ប្រជាធិបតេយ្យ​ជា​ទី​កន្លែង​អ្នក​លក់​រថយន្ត​ចល័ត​និង​មាន​ហាង​អាហារ​រួម​ទាំង​ហាង​ផ្សេងៗ​មួយ​ចំនួន​ទៀត។

ម្ចាស់​ហាង​កាត់ដេរ​សម្លៀក​បំពាក់​ម្នាក់​មាន​ប្រសាសន៍​ថា​គាត់​បាន​ខាត​បង់​យ៉ាង​ច្រើន​ពី​ការ​បិទ​ផ្លូវ​និង​ការ​ហ៊ុំ​ព័ទ្ធ​សួន​ប្រជាធិបតេយ្យ​នេះ។

«ខែនេះ​ជាខែ​ដែល​គេ​រៀបការ​ កាលពី​ពេល​មិនទាន់បិទ​ភ្ញៀវ​ចូល​តិច​បំផុត​ចំនួន​ប្រាំនាក់ ​ដល់​ពេល​បិទ​ទីនេះ​គឺ​ភ្ញៀវ​មាន​ចំនួន​សូន្យហើយ​ពេល​បើក​វិញ​នៅ​តែ​សូន្យ​ទៀត។​ខែការ​ដូច្នេះ​ខោអាវ​កាត់​បាន​ក្នុង​មួយថ្ងៃ​តិច​បំផុត​ក៏​៥០០​ដុល្លារ​ ហើយជួន​កាល​១០០០​ដុល្លារ​ក៏មាន​ដែរ»។

​បុរស​ដដែល​ដែល​ស្នើ​សុំ​មិន​បញ្ចេញ​ឈ្មោះ​ស្នើ​ឲ្យ​អាជ្ញាធរ​ក្រុង​ភ្នំពេញ​បើក​ទីលាន​ប្រជាធិបតេយ្យ​ឡើង​វិញដើម្បី​មាន​ភាព​ងាយ​ស្រួល​ក្នុង​ការ​ប្រកប​របរអាជីវកម្ម​របស់​ពល​រដ្ឋនៅ​ជុំវិញ​នេះ។

«ចង់ថា​ធ្វើ​ម៉េច​ឲ្យ​បាន​ដូច​មុន ​គឺទីនេះ​ក្លាយ​ជាសួន​ច្បារវិញ​ហើយ​ទៅជា​កន្លែង​សប្បាយ​រីករាយ​វិញនិង​គួរ​តែលើក​កន្លែង​នេះ​ទៅ​ដាក់​កន្លែង​ឆ្ងាយ​ហើយពួក​គាត់​ចង់ជួប​ជុំ​ធ្វើអី​ធ្វើ​ទៅ។​បើ​គិត​ពី​ប្រជាជន​រក​ស៊ី ​គួរតែកុំឲ្យ​មាន​កន្លែង​នេះ​ល្អជាង»។

​លោកឡុង ឌីម៉ង់ អ្នក​នាំពាក្យ​សាលា​រាជធានី​ភ្នំពេញ​បានឲ្យ​ដឹង​ថា​ការចាប់ផ្តើម​បើក​ផ្លូវ​មួយ​ចំហៀង​ក្រោយ​ពី​ការដោះ​លែង​សកម្មជន​អ្នកតវ៉ា​ដោយសារ​មិនមាន​សញ្ញា​នៃ​ការ​ប៉ុន​ប៉ង​ធ្វើ​ការតវ៉ាណាមួយ​ទៀត​នោះ​ទេ។

ផ្ទុយទៅវិញ​សាលារាជធានី​ភ្នំពេញ​នៅ​មិន​ទាន់​មាន​ផែនការ​បើក​ទីលាន​ប្រជាធិបតេយ្យ​ឡើងវិញ​នៅ​ឡើយ​ទេ។

«ការបើក​ផ្លូវ​ឲ្យ​ប្រជា​ពល​រដ្ឋ​ធ្វើ​ដំណើរ​នោះ​ដោយ​សារ​យើង​ឃើញ​ថា​អត់មាន​ការយាយី​ពី​ខាង​ក្រុមមួយ​ចំនួន​ដែល​មាន​បំណង​មក​ធ្វើ​ការសម្តែង​មតិដែល​អត់​មាន​ច្បាប់​ទៀត​ទេ។​ដោយឡែក​ការ​បើក​ទីលាន​ប្រជាធិបតេយ្យ ​យើង​មិន​ទាន់​បាន​អនុញ្ញាត​វិញ​ទេ»។

​មន្ត្រី​អ្នក​នាំពាក្យ​សាលា​រាជធានី​ភ្នំពេញ​ដដែល​បាន​ទទួល​ស្គាល់​ថា​មាន​ផល​ប៉ះពាល់​ដល់​ការ​ធ្វើ​អាជីវ​កម្ម​របស់​ប្រជាពលរដ្ឋ​ដែលរស់​នៅ​ក្បែរខាង​ទីលាន​ប្រជាធិបតេយ្យ​ដែរ ប៉ុន្តែ​លោក​បាន​ស្តី​បន្ទោស​លើ​ក្រុម​អ្នក​តវ៉ា​ទៅវិញ។

​ប្រទេស​កម្ពុជា​បាន​ធ្វើ​ការ​បោះឆ្នោត​ជ្រើសតាំង​តំណាង​រាស្ដ្រ​កាល​ពី​ខែកក្កដា ឆ្នាំ​២០១៣​ដែល​បន្សល់​ទុក​ដោយ​ភាព​ចម្រូង​ចម្រាស់​ជាច្រើន​ដោយសារ​តែ​គណបក្ស​សង្គ្រោះ​ជាតិ​ដែល​ជាគណបក្ស​ឈ្នះ​ឆ្នោត​លំដាប់​ទី​២​បន្ទាប់​ពី​គណបក្ស​ប្រជាជនកម្ពុជាបាន​ចោទ​ប្រកាន់​ពី​ការលួច​បន្លំ​សន្លឹក​ឆ្នោត​។

បន្ទាប់​ពី​នោះគណបក្សនេះ ​បានដឹក​នាំ​បាតុកម្ម​ទ្រង់ទ្រាយ​ធំនិង​អូស​បន្លាយជាច្រើន​ថ្ងៃ។

​ក្រោយ​មក​ក៏​មាន​ការ​បង្រ្កាប​ដោយ​កម្លាំង​អាជ្ញាធរ​ហើយ​អាជ្ញាធរ​បាន​សម្រេច​បិទ​ទីលាន​នេះរហូត​មក។​

​ក្រោយ​ពី​ការ​បិទ​ទីលាន​ប្រជាធិបតេយ្យ​មន្ត្រី​គណបក្ស​សង្គ្រោះ​ជាតិ​បាន​ប៉ុន​ប៉ង​ធ្វើ​ឲ្យ​មាន​ការ​បើក​ទីលាន​នេះ​ឡើង​វិញ​ជាច្រើន​លើក​ប៉ុន្តែ​ត្រូវ​កង​ប្រដាប់​អាវុធ​និង​កងសន្តិសុខ​ដែល​ពាក់មួក​ឃ្លុប​បិទ​មុខរារាំង​ការ​ប៉ុន​ប៉ង​នោះ។

​លោក​យ៉ែម​ បុញ្ញរិទ្ធ ​តំណាងរាស្ដ្រ​ជាប់​ឆ្នោត​និងជា​អ្នក​នាំពាក្យ​គណបក្ស​សង្គ្រោះ​ជាតិអធិប្បាយ​ថា​អាជ្ញាធរ​មិន​ត្រូវគិត​ពី​ការព្រួយ​បារម្ភ​អំពី​ការ​តវ៉ា​សម្រាប់​ធ្វើ​ជា​ដើម​ចម​នៃ​មូល​ហេតុ​នៃ​ការ​បិទ​សួន​ប្រជាធិបតេយ្យ​នោះ​ទេ។​

«ទីលាន​ប្រជាធិបតេយ្យ​ជា​កន្លែង​បញ្ចេញ​មតិ​ដូច្នេះគ្មាន​អ្វី​ដែល​ត្រូវ​ភ័យ​ខ្លាច​ពី​ព្រោះ​អ្នក​ប្រជាធិប​តេយ្យ​គឺ​ការ​តស៊ូមតិ​ គំនិត ​ទស្សនៈ​និង​គោល​នយោបាយ។​ដូច្នេះ​ជារឿង​មួយ​ដែល​គ្មាន​អ្វី​ត្រូវ​ភ័យ​ខ្លាច​អ្វី​ទាំងអស់​ពីព្រោះ​តែង​តែមាន​អ្នក​ប្រឆាំង​និង​អ្នក​យល់​ស្រប។​ដូច្នេះ​ត្រូវ​បើក​ទីលាន​នេះ​ដើម្បីផល​ប្រយោជន៍​ក្នុង​លទ្ធិ​ប្រជាធិបតេយ្យ​និង​ដើម្បី​ជំរុញ​ឲ្យ​ប្រទេស​យើង​មាន​នីតិ​រដ្ឋ​ពិត​ប្រាកដ»។

ជា​មួយ​នឹង​ការ​ស្នើ​ឲ្យ​មាន​ការ​បើក​ទីលាន​ប្រជាធិបតេយ្យ​ឡើងវិញ​នេះ​ ក្រុម​ប្រជាពល​រដ្ឋ​ដែល​មួយ​ចំនួន​ទៀត​ក៏ធ្លាប់​បាន​ស្នើ​សុំ​ដោយ​ផ្ទាល់​ដល់​សាលា​រាជធានី​ភ្នំពេញ​ឲ្យផ្លាស់​ប្តូរ​ទីតាំង​សួន​នេះ​ដែរ។

លោកឡុង ឌីម៉ង់ ​អ្នក​នាំពាក្យ​សាលារាជធានី​ភ្នំពេញបាន​ទទួល​ស្គាល់​ថា​មាន​សំណើ​បែបនោះ​មែន​ពី​ក្រុម​ប្រជាពលរដ្ឋ​ ក៏ប៉ុន្តែ​សាលា​រាជធានី​ភ្នំពេញ​មិន​ទាន់​មាន​ផែនការ​ណាមួយ​ក្នុង​ការ​ប្តូរ​ទីតាំង​សម្តែង​មតិ​នេះ​ទេ៕
XS
SM
MD
LG