សិស្សបារាំងរាប់លាននាក់បានវិលត្រឡប់ទៅសាលារៀនរបស់គេវិញហើយនៅថ្ងៃអង្គារ ដោយស្ថិតក្រោមលក្ខខណ្ឌសុវត្ថិភាពថ្មី បើទោះបីជាប្រទេសមួយនេះកំពុងមានការហក់ឡើងនៃការឆ្លងជំងឺកូវីដ១៩នាពេលថ្មីៗនេះក៏ដោយ។ ការបើកសាលាឡើងវិញនេះ ជាការសាកល្បងទូទាំងប្រទេស ដើម្បីការកាត់បន្ថយនូវភាពមិនស្មើគ្នានិងការស្តារឡើងវិញនូវសេដ្ឋកិច្ចជាតិ។
ប្រធានាធិបតីបារាំងលោក Emmanuel Macron បានផ្ញើសារលើបណ្តាញសង្គមរបស់លោកដោយអំពាវនាវឲ្យពលរដ្ឋបារាំងពាក់ម៉ាស់ការពារ។ ក្នុងវីដេអូមួយដែលបង្ហោះក្នុងបណ្តាញ Instagram ទៅកាន់កូនសិស្សបារាំងជាង១២លាននាក់ដែលត្រឡប់ទៅកាន់សាលារៀនរបស់ពួកគេវិញនោះ លោក Macron និយាយថា ទោះបីជាអ្នកទាំងអស់ពាក់ម៉ាស់ការពារក៏ដោយ ក៏វីរុសកូរ៉ូណាមិនទៅណាឆ្ងាយពីអ្នកទេ អ្នកត្រូវការពារខ្លូនឯងដោយផ្ទាល់ថែមទៀត។
កន្លែងលាងសម្អាតដៃ ការស្ថិតនៅឆ្ងាយពីគ្នា និងការរៀបចំពេលលេងឆ្លាស់គ្នា ជាផ្នែកមួយនៃវិធានការថ្មី។ គ្រូបង្រៀននិងឪពុកម្តាយសិស្ស សម្តែងការបារម្ភចំពោះវិធានការថ្មី ហើយថាតើវានឹងត្រូវគេអនុវត្តដោយរបៀបណាសម្រាប់ឆ្នាំសិក្សាថ្មីនេះ ប៉ុន្តែជាទូទៅពួកគេគាំទ្រវិធានការការពារទាំងនេះ។
ទន្ទឹមគ្នានេះផងដែរចាប់ពីថ្ងៃអង្គារតទៅ មានការតម្រូវឲ្យពាក់ម៉ាស់នៅកន្លែងធ្វើការ ខណៈដែលរដ្ឋាភិបាលបារាំងលើកទឹកចិត្តឲ្យឪពុកម្តាយត្រឡប់ទៅធ្វើការវិញ និងព្យាយាមទប់ស្កាត់កុំឲ្យមានការឆ្លងជំងឺកូវីដ១៩។
កាលពីថ្ងៃចន្ទប្រទេសបារាំងមានអ្នកឆ្លងវីរុសកូរ៉ូណាថ្មីចំនួន៣.០៨២នាក់ ដែលចំនួននេះតិចជាងក្នុងពេលកន្លងទៅ តែនៅតែខ្ពស់បើធៀបជាមួយប្រទេសអឺរ៉ុបជិតខាង។ ប្រទេសបារាំងមានអ្នកស្លាប់រហូតមកដល់ពេលនេះដោយសារជំងឺកូដ១៩ មានចំនួនជាង៣០.៦០០នាក់៕
