គណបក្សនយោបាយចំនួន៤ នៅថ្ងៃពុធនេះ បានរួមគ្នាបង្កើតចំណងនយោបាយថ្មីមួយដោយឱ្យឈ្មោះថា «សម្ព័ន្ធភាពឆ្ពោះទៅអនាគត» ក្នុងគោលដៅប្រកួតប្រជែងក្នុងការបោះឆ្នោតជាមួយគណបក្សប្រជាជនកម្ពុជា និងលើកស្ទួយការគោរពសិទ្ធិមនុស្ស និងដំណើរការប្រជាធិបតេយ្យ។
គណបក្សទាំង៤នោះ រួមមានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា ដែលសុទ្ធតែជាគណបក្សដែលមិនទាន់មានសំឡេងនៅរដ្ឋសភានៅឡើយ។
ការបង្កើតសម្ពន្ធភាពនេះកើតឡើង ខណៈពេលដែលគណបក្សភ្លើងទៀនដែលជាគណបក្សជំទាស់ដ៏ធំមួយមិនទាន់មានភាពប្រាកដប្រជាថាអាចចូលរួមការបោះឆ្នោតនាពេលខាងមុខ ដោយសារមិនមានឯកសារដើមនៃការចុះបញ្ជីគណបក្ស ដែលបណ្តាលឱ្យខ្លួនមិនអាចចូលរួមការបោះឆ្នោតកាលពីខែកក្កដា។
នៅក្នុងសេចក្តីថ្លែងការណ៍រួម ធ្វើឡើងក្រោយការប្រកាសបង្កើតសម្ពន្ធនយោបាយថ្មីនោះ ថ្នាក់ដឹកនាំគណបក្សទាំង៤បានលើកឡើងថា៖ «សម្ព័ន្ធភាពឆ្ពោះទៅអនាគត នឹងក្លាយជាកម្លាំងចលករថ្មីមួយសម្រាប់ជាការជំរុញ និងលើកទឹកចិត្តព្រមទាំងជាជម្រើសរបស់ប្រជាពលរដ្ឋខ្មែរក្នុងការចូលរួមកសាងសង្គមប្រជាធិបតេយ្យ យុត្តិធម៌សង្គម ការអភិវឌ្ឍប្រកបដោយសមធម៌ និងចីរភាព ព្រមទាំងភាពសុខដុមរមនាសម្រាប់ប្រជាជាតិខ្មែរទាំងមូលនាពេលអនាគត»។
សម្ពន្ធភាពថ្មីមួយនេះ នឹងបើកចំហសម្រាប់ការចូលរួមពីគ្រប់គណបក្សនយោបាយ ដែលមានទស្សនៈ គោលដៅ និងគោលជំហរនយោបាយដូចគ្នា ដើម្បីរួបរួមគ្នាសម្រេចគោលបំណងខាងលើនេះ ដោយឈរលើស្មារតីបង្រួបបង្រួម សាមគ្គីភាព និងឯកភាពជាតិ។
អ្នកនាំពាក្យគណបក្សភ្លើងទៀន លោក គីមសួរ ភិរិទ្ធ ប្រាប់វីអូអេនៅក្រៅពិធីប្រកាសបង្កើតសម្ពន្ធភាពនយោបាយថ្មីនេះថា សម្ពន្ធភាពនេះ មានសារៈសំខាន់សម្រាប់រាល់គណបក្សនយោបាយណាដែលប្រាថ្នាចង់បានលទ្ធិប្រជាធិបតេយ្យមួយដែលដំណើរការល្អនៅកម្ពុជា។
លោកថ្លែងថា៖ «សម្ពន្ធភាពនេះវាជារឿងចាំបាច់ សម្រាប់គណបក្សនយោបាយទាំងឡាយណាដែលមានគោលជំហរ គោលនយោបាយ និងឆន្ទៈ ដូចគ្នាក្នុងការស្តាលទ្ធិប្រជាធិបតេយ្យនៅក្នុងប្រទេសយើងពីពេលឥឡូវទៅថ្ងៃអនាគត»។
ក្រោយពីការបង្កើតសម្ពន្ធភាពនយោបាយនេះ មានការចោទសួរពីអ្នកសារព័ត៌មានអំពីហានិភ័យដែលអាចកើតឡើងទៅលើសម្ពន្ធភាពនេះ ខណៈគណបក្សភ្លើងទៀនកំពុងមានបញ្ហាផ្លូវច្បាប់ ទាក់ទិនការចុះបញ្ជីគណបក្សនយោបាយនៅក្រសួងមហាផ្ទៃ។ ក៏ប៉ុន្តែថ្នាក់ដឹកនាំគណបក្សទាំង៤បានការពារសម្ព័ន្ធនយោបាយនេះថា នឹងដំណើរការទៅស្របតាមច្បាប់។
ប្រធានគណបក្សប្រជាធិបតេយ្យមូលដ្ឋានលោក យ៉េង វីរៈ ថ្លែងថា ការចងសម្ពន្ធភាពនេះនឹងមិនបង្កើតបញ្ហាប្រឈមដល់គណបក្សដែលចូលរួមនោះទេ ព្រោះទោះបីគ្មានការចងសម្ពន្ធភាពយ៉ាងដូច្នេះក៏ដោយ ក៏ការរឹតត្បិតសិទ្ធិនយោបាយនៅតែមានដដែល។
លោកថ្លែងថា៖ «ការពិតទៅ ជាទូទៅទោះជាមិនចង នៅក្រៅសម្ពន្ធភាពក៏ដោយ ក៏យើងនៅជួបហៅថា បរិយាកាសសេរីភាពនយោបាយហ្នឹង នៅរឹតត្បិត មិនទាន់ទូលំទូលាយ សេរីភាពនយោបាយ។ អ៊ីចឹង យើងមិនចាត់ទុកថា វាជាការណ៍ដែលយើងព្រួយបារម្ភទេ ប៉ុន្តែជាការប្រឈមដែលយើងត្រូវព្យាយាមពុះពារជម្នះ»។
លោក ប៉ុល ហំម ប្រធានគណបក្សកែទម្រង់កម្ពុជាលើកឡើងថា បើសិនជាសម្ពន្ធភាពថ្មីនេះ ត្រូវបានគេដាក់ឱ្យស្ថិតក្រោមគំនាបណាមួយនោះ អ្នកខាតប្រយោជន៍គឺប្រជាជន។
លោកថ្លែងទៅកាន់អ្នកកាសែតថា៖ «យើងធ្វើដើម្បីផលប្រយោជន៍ជាតិ ហើយគេមានការរារាំង មានការសម្ពាធ មានបញ្ហាណាមួយ មិនមែនមកពីយើងទេ។ ដូច្នេះ ឧត្តមគតិរបស់យើង សម្បជញ្ញៈរបស់យើង ក៏អត់ស្តីបន្ទោសឱ្យយើងដែរ...ព្រោះយើងបានខិតខំប្រឹងប្រែង ធ្វើអស់ពីលទ្ធភាពរបស់យើងហើយ។ ហើយប្រជាពលរដ្ឋក៏លោកមិនស្តីបន្ទោសយើងដែរ»។
កន្លងមកមានការប្រកាសពីគណបក្សនយោបាយមួយចំនួនឱ្យមានការចងសម្ពន្ធភាពរួមគ្នា តែមិនមានការព្រមព្រៀងគ្នាជាលាយលក្ខណ៍អក្សរដូចគ្រានេះទេ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា ការចងសម្ពន្ធភាពរបស់គណបក្សនយោបាយទាំង៤ គឺជាគំនិតផ្តួចផ្តើមថ្មីមួយដើម្បីកៀរគរកម្លាំងនយោបាយ ដែលអាចនឹងទៅប្រជែងជាមួយគណបក្សគ្រប់គ្រងប្រទេស។ ប៉ុន្តែលោកបារម្ភថា បើសិនសម្ពន្ធនយោបាយថ្មីថ្មោងនេះ ទទួលបានការគាំទ្រច្រើនពីអ្នកបោះឆ្នោត បញ្ហាប្រឈមមួយចំនួននឹងអាចកើតឡើង ដូចអ្វីដែលបានកើតឡើងចំពោះអតីតគណបក្សសង្គ្រោះជាតិ។
លោកប្រាប់អ្នកកាសែតថា៖ «យើងឧទាហរណ៍ដូចជាគណបក្សសង្គ្រោះជាតិអ៊ីចឹង គឺអាចប្រឈមនឹងការប្រកួតប្រជែងខ្លាំងរវាងគណបក្សនយោបាយទាំងពីរអាចទៅទទួលបាននូវការដឹកនាំប្រទេស ឬកាន់អំណាច គឺឱកាសហ្នឹងហាក់ដូចជាអត់បាន នៅយូរអង្វែងទេ។ អ៊ីចឹងខ្ញុំ សម្រាប់ខ្ញុំ ខ្ញុំមើលឃើញថា វាគ្រាន់តែជាការចាប់ផ្តើម ប៉ុន្តែយើងនឹងតាមដានទាំងអស់គ្នាទៀតថា តើសម្ពន្ធភាពហ្នឹងអាចធ្វើឱ្យមានជំនឿជឿជាក់ពីគណបក្សនយោបាយផ្សេង ពីអ្នកនយោបាយផ្សេង ឬក៏ពីប្រជាពលរដ្ឋ យ៉ាងម៉េចទៀត យើងទាល់តែតាមដាន និងឃ្លាំមើលទាំងអស់គ្នា ដើម្បីយកមកឆ្លុះបញ្ចាំងអំពីការលើកឡើងនូវឆន្ទៈរបស់ពួកគាត់គណបក្សទាំង៤ហ្នឹង»។
អ្នកនាំពាក្យគណបក្សកាន់អំណាចលោក សុខ ឥសាន ថ្លែងថា សម្ពន្ធភាពនយោបាយថ្មីនេះនឹងមិនជាការគំរាមកំហែងដល់ការកាន់កាប់អំណាចរបស់គណបក្សប្រជាជនកម្ពុជានោះទេ ហើយថា គណបក្សដែលចូលរួមបង្កើតសម្ពន្ធនេះគឺជាក្រុមគណបក្សចាញ់ការបោះឆ្នោត។ លោកបានចោទសួរផងដែរពីរបៀបនៃការចាត់ចែងដាក់បេក្ខជនរបស់គណបក្សទាំង៤ដែលទំនងជាអាចមានភាពចម្រូងចម្រាសក្នុងពេលបោះឆ្នោតខាងមុខ។
លោកថ្លែងថា៖ «ខ្ញុំមិនចាប់អារម្មណ៍អីទេ ពីព្រោះឥឡូវភ្លើងទៀន និងគណបក្សបីទៀតសុទ្ធតែជាគណបក្សចាញ់ ហើយមកចងសម្ពន្ធភាពជាមួយគ្នាសួរថាដល់ពេលបោះឆ្នោត សួរថាឥឡូវរៀបចំដាក់បេក្ខភាពឈរឈ្មោះប្រកួតប្រជែងការបោះឆ្នោតយ៉ាងម៉េច ឥឡូវ? គណបក្សណាមានធនធានមនុស្សដាក់បេក្ខភាព អាហ្នឹងគណបក្សហ្នុងហើយ ជាខ្លឹមសាររបស់គណបក្សហ្នុង តែគណបក្សផ្សេងទៀតមិនអាចយកបេក្ខភាពរបស់គណបក្សមួយទៅឈរឈ្មោះរបស់គេហ្នឹងទៅធ្វើជារបស់ខ្លួនឯងបានទេ»។
ក្នុងការបោះឆ្នោតជាតិខែកក្កដាកន្លងទៅ គណបក្សភ្លើងទៀនខកខានមិនបានចូលរួមឈរឈ្មោះបោះឆ្នោត ដោយសារគ្មានឯកសារដើមបញ្ជាក់អំពីការចុះបញ្ជីគណបក្សនយោបាយនៅក្រសួងមហាផ្ទៃ។ ចំណែកគណបក្សកែទម្រង់កម្ពុជារបស់លោក អ៊ូ ច័ន្ទរ័ត្ន និងលោក ប៉ុល ហំម បានពហិការមិនចូលរួមការបោះឆ្នោត។ ដោយឡែកគណបក្សឆន្ទៈខ្មែរ និងគណបក្សប្រជាធិបតេយ្យមូលដ្ឋានបានចូលរួមការបោះឆ្នោត តែមិនអាចដណ្តើមបានអាសនៈតំណាងរាស្ត្រនៅរដ្ឋសភា។
យ៉ាងណាក៏ដោយ ការបង្កើតសម្ពន្ធភាពនយោបាយនេះ ក៏គេឃើញកើតមាននៅប្រទេសមួយចំនួនក្នុងតំបន់អាស៊ីអាគ្នេយ៍មុន និងក្រោយការបោះឆ្នោតជ្រើសតាំងតំណាងរាស្ត្រ ក្នុងនោះគឺប្រទេសថៃ និងប្រទេសម៉ាឡេស៊ី ទីដែលសំឡេងប្រឆាំងទទួលបានការគាំទ្រច្រើនពីប្រជាជន ហើយមានលទ្ធភាពឡើងកាន់អំណាច៕
