បុគ្គលិកក្រុមណាហ្គាវើលដ៍៤នាក់ កាលពីព្រឹកថ្ងៃអង្គារ បានចេញមុខតវ៉ា ដោយចាត់ទុកការបញ្ឈប់ពួកគេ និងបុគ្គលិកប្រមាណ៧០នាក់ទៀត កាលពីចុងខែវិច្ឆិកា ឆ្នាំ២០២៣នេះ ជារឿងអយុត្តិធម៌។ ពួកគេអះអាងថាបុគ្គលិកប្រមាណ៧០នាក់កាលពីពេលថ្មីៗនេះ ជារូបភាពបង្ខំឱ្យចុះហត្ថលេខាលាឈប់ពីការងារ។
កាលពីព្រឹកថ្ងៃអង្គារ អ្នកតវ៉ាជំទាស់នឹងក្រុមហ៊ុនណាហ្គាវើលដ៍មួយចំនួនបានចេញមុខតវ៉ាឱ្យថៅកែក្រុមហ៊ុនណាហ្គាវើលដ៍ទទួលយកពួកគេចូលធ្វើការវិញ ក្រោយមានការសម្របសម្រួលពីខាងស្នងការដ្ឋាននគរបាលរាជធានីភ្នំពេញជាមួយក្រុមហ៊ុនដែលបានសម្រេចថា ចំពោះបុគ្គលិកណាដែលមិនទាន់បានចុះហត្ថលេខាលើការបញ្ឈប់ពីការងារ អាចចូលធ្វើការវិញ។ នេះបើតាមអ្នកតវ៉ា។ ប៉ុន្តែជាក់ស្តែង ពួកគេទាំង៤នាក់មិនត្រូវបានក្រុមហ៊ុនណាហ្គាវើលដ៍ទទួលយកពួកគេចូលធ្វើការនោះទេ នាព្រឹកថ្ងៃអង្គារនេះ។
កញ្ញា ប៉ុន ស្រីចិន្តា អាយុ៣១ឆ្នាំ បុគ្គលិកក្រុមហ៊ុនណាហ្គាវើលដ៍ដែលត្រូវបានគេបញ្ឈប់ពីការងារកាលពីពេលថ្មីៗនេះ ប្រាប់វីអូអេថាកាលពីថ្ងៃទី១៧ ខែវិច្ឆិកា ខណៈពួកគេកំពុងតែធ្វើការដូចសព្វដង ស្រាប់តែក្រុមហ៊ុនបានប្រាប់ពួកគេថាខាងក្រុមហ៊ុននឹងបញ្ចប់កិច្ចសន្យារបស់ពួកគេ ដោយគ្រាន់តែលើកឡើងថា«ក្រុមហ៊ុនមិនត្រូវការពួកគេទៀតនោះទេ»។ កញ្ញាចាត់ទុកការបញ្ឈប់គេពីការងារនេះ ជារឿងអយុត្តិធម៌សម្រាប់កម្មករ ដោយអះអាងថាពួកគេមានសមត្ថភាពធ្វើការ និងមិនបានធ្វើអ្វីខុសទៅគោលការណ៍ឬបទបញ្ជារបស់ក្រុមហ៊ុនឡើយ។
កញ្ញាថ្លែងថា៖ «និយាយទៅវាគឺជារឿងអយុត្តិធម៌ខ្លាំងបំផុតដែលសម្រាប់ថា ពួកខ្ញុំនៅមានសមត្ថភាពធ្វើការ ហើយពួកខ្ញុំអត់មានកំហុសអីទាំងអស់។ ហើយច្បាប់បទបញ្ជាផ្ទៃក្នុងអីគឺពួកខ្ញុំអត់មានប្រព្រឹត្តខុសទាំងអស់។ អ៊ីចឹងគឺគាត់បញ្ឈប់មួយគឺហេតុផលរបស់គាត់ ដែលខ្ញុំសួរទៅគឺគាត់ប្រាប់ថាក្រុមហ៊ុនលែងត្រូវពួកខ្ញុំ។ ហើយបង្ខំឱ្យពួកខ្ញុំស៊ីញ៉េបញ្ចប់កុងត្រាភ្លាមៗនៅថ្ងៃទី១៧ ហ្នឹងតែម្តង»។
កញ្ញាបន្ថែមថាការបញ្ឈប់ពួកគាត់ពីការងារនេះ ក៏អាចបណ្តាលមកពីកញ្ញានិងបុគ្គលិកដែលត្រូវបានគេបញ្ឈប់ទាំងអស់នោះ ធ្លាប់បានចូលរួមក្នុងការតវ៉ាជាមួយនឹងក្រុមកូដករសហជីព កាលពីឆ្នាំ២០២១។
កញ្ញាបញ្ជាក់ថាបើសិនមិនមានដំណោះស្រាយឱ្យពួកគេចូលធ្វើការវិញទេ កញ្ញានឹងបន្តតវ៉ាទៀត។
កញ្ញាបញ្ជាក់ថា៖ «ខ្ញុំនៅតែតវ៉ាព្យាយាមចង់ចូលធ្វើការវិញរហូតទល់តែពួកគាត់ព្រមទទួលយកពួកខ្ញុំចូលធ្វើការវិញ។ និយាយទៅស្នើសុំទៅខាងក្រសួងការងារ ក្រសួងពាក់ព័ន្ធ ខាងផេកស្នងការដែលគាត់បានទទួលការស្រាយបំភ្លឺពីខាងក្រុមហ៊ុនហ្នឹងឱ្យគាត់ជួយអន្តរាគមន៍ផង»។
កញ្ញា សៀក កញ្ញា អាយុ៣៧ឆ្នាំ បុគ្គលិកណាហ្គាវើល៍ម្នាក់ទៀតដែលត្រូវបានក្រុមហ៊ុនបញ្ឈប់កាលពីពេលថ្មីៗនេះ លើកឡើងថាក្រុមហ៊ុនណាហ្គាវើលដ៍បានសម្រេចបញ្ចប់ការងាររបស់កញ្ញា ដោយមិនបានផ្តល់ហេតុផលជាក់លាក់ណាមួយនោះទេ។ កញ្ញាបន្តថាក្រោយពីមានការអន្តរាគមន៍ពីស្នងការនគរបាលរាជធានីភ្នំពេញ កាលពីថ្ងៃទី២២ ខែវិច្ឆិកា ជាមួយភាគីក្រុមហ៊ុនណាហ្គាវើលដ៍ មានការបញ្ជាក់ពីខាងនគរបាលថាចំពោះបុគ្គលិកណាដែលមិនបានចុះហត្ថលេខាលើលិខិតស្នាមបញ្ចប់ការងារនឹងត្រូវចូលធ្វើការវិញជាធម្មតា។
កញ្ញាថ្លែងថា៖ «ពេលឃើញក្រុមហ៊ុនស្រាយបំភ្លឺជាមួយស្នងការថាអ្នកដែលអត់ព្រមបញ្ចប់ស៊ីញ៉េហ្នឹងអាចចូលធ្វើការវិញបានខ្ញុំសប្បាយចិត្ត។ ដល់ពេលឥឡូវមកមុននឹងខ្ញុំទៅអគារAcademy គឺខាងអគារAcademy ចាក់សោ ហើយខ្ញុំក៏បានសួរបងៗសន្តិសុខនៅហ្នឹងដែរថាខ្ញុំទៅធ្វើម៉េចដើម្បីបានCheck in [ម៉ោងចូលធ្វើការ] វិញ»។
ចំណែកបុគ្គលិកម្នាក់ទៀត កញ្ញា ជឹម រដ្ឋា អាយុ២៥ឆ្នាំ បញ្ជាក់ក្នុងអំឡុងពេលតវ៉ានៅមុខអគារណាហ្គាវើលដ៍ថាក្រុមហ៊ុនបានបង្ខំឱ្យកញ្ញាចុះហត្ថលេខាបញ្ចប់កិច្ចសន្យាការងារ ទាំងដែលកញ្ញាមិនបានព្រមព្រៀងក្នុងការចុះហត្ថលេខានោះទេ ហើយបានដកហូតកាតការងារ និងថតវីដេអូ ដើម្បីបញ្ជាក់ថាកញ្ញាបានសម្រេចបញ្ចប់ការងារជាមួយក្រុមហ៊ុន។
កញ្ញាថ្លែងថា៖ «ខ្ញុំទាំង៤នាក់ជាកម្មករដែលរងគ្រោះ ហើយត្រូវបានគេបង្ខំឱ្យស៊ីញ៉េបញ្ចប់កិច្ចសន្យា ខ្ញុំអត់ព្រមស៊ីញ៉េ គេដកកាតការងារបណេ្តញខ្ញុំចេញ គេបង្ខំខ្ញុំឱ្យថតវីដេអូ ដើម្បីធ្វើជាភស្តុតាងសម្រាប់ក្រុមហ៊ុនគេ ខ្ញុំអត់ដឹងទេ»។
កញ្ញា ជឹម រដ្ឋា បន្តថាកញ្ញាស្នើឱ្យស្នងការនគរបាលរាជធានីភ្នំពេញត្រួតពិនិត្យឡើងវិញចំពោះការបកស្រាយ ដោយឱ្យបុគ្គលិកដែលមានមិនបានចុះហត្ថលេខាលើកិច្ចសន្យាបញ្ចប់ការងារអាចត្រឡប់ចូលធ្វើការវិញជាធម្មតា ឬយ៉ាងណា។
វីអូអេពុំទាន់អាចសុំការអត្ថាធិប្បាយពី អ្នកនាំពាក្យស្នងការរាជធានីភ្នំពេញលោក សំ វិច្ឆិកា និងក្រុមហ៊ុនណាហ្គាវើលដ៍បាននៅឡើយទេ។
គួរបញ្ជាក់ថាកាលពីឆ្នាំ២០២១ ក្រុមហ៊ុនកាស៊ីណូណាហ្គាវើលដ៍បានបញ្ឈប់កម្មករនិយោជិតប្រមាណ១.៣០០នាក់ពីការងារ។ ការបញ្ឈប់នេះនាំឱ្យមានការតវ៉ាពីរបីឆ្នាំចុងក្រោយនេះពីសំណាក់សមាជិកសហជីពទ្រទ្រង់សិទ្ធិបុគ្គលិកកម្មករខ្មែរនៃក្រុមហ៊ុនណាហ្គាវើលដ៍។ ការបញ្ឈប់បុគ្គលិកទ្រង់ទ្រាយធំនេះត្រូវបានមើលឃើញថាជាចេតនាក្នុងការបំបាត់សហជីពឯករាជ្យនៅក្រុមហ៊ុនកាស៊ីណូមួយនេះ៕
