ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​ក្រុម​សន្តិសុខ​ស្ថាន​ទូត​អាមេរិក​តវ៉ា​ប្រឆាំង​នឹង​ការ​បញ្ឈប់​ពួក​គេ ក្រោយ​រង​ការ​ចោទ​ថា​បាន​ចែក​ចាយ​រូបភាព​អាស​អាភាស​របស់​ក្មេង​ស្រី


សន្តិសុខ​ដែល​ត្រូវ​បាន​ស្ថានទូត​សហរដ្ឋ​អាមេរិក​បញ្ឈប់​កាល​ពី​ប៉ុន្មាន​ខែ​មុន​​​និង​គ្រួសារ​របស់ពួកគេ​បាន​មក​ធ្វើ​បាតុកម្ម​តវ៉ា​រក​យុត្តិធម៌​ដោយ​អហិង្សា​នៅ​ខាង​មុខ​ស្ថានទូត​អាមេរិករាជធានី​ភ្នំពេញ​ ​កាល​ពីព្រឹក​ថ្ងៃទី​១៩ មិថុនា ឆ្នាំ ២០១៨។ (ទុំ ម្លិះ/VOA)
សន្តិសុខ​ដែល​ត្រូវ​បាន​ស្ថានទូត​សហរដ្ឋ​អាមេរិក​បញ្ឈប់​កាល​ពី​ប៉ុន្មាន​ខែ​មុន​​​និង​គ្រួសារ​របស់ពួកគេ​បាន​មក​ធ្វើ​បាតុកម្ម​តវ៉ា​រក​យុត្តិធម៌​ដោយ​អហិង្សា​នៅ​ខាង​មុខ​ស្ថានទូត​អាមេរិករាជធានី​ភ្នំពេញ​ ​កាល​ពីព្រឹក​ថ្ងៃទី​១៩ មិថុនា ឆ្នាំ ២០១៨។ (ទុំ ម្លិះ/VOA)

បន្ទាប់​ពី​ស្ថានទូត​អាមេរិក​ប្រចាំ​កម្ពុជា​បណ្តេញ​បុគ្គលិក​សន្តិសុខ​ចំនួន​៣២​នាក់​ ​ចេញ​ពី​ការងារ​កាលពី​ដើម​ខែ​មេសា​ ដោយ​ចោទ​ថា​បាន​ចែក​ចាយ​និង​មើល​រូបភាព​អាសអាភាស​របស់​ក្មេង​ស្រី​នៅ​ក្នុង​សារ​ជា​ក្រុម​ក្នុង​ហ្វេសប៊ុក​ ឬ Group Facebook Messenger​ នៅ​ព្រឹក​ថ្ងៃ​អង្គារ​នេះ​ អតីត​បុគ្គលិក​សន្តិសុខ​ដែល​ត្រូវ​បាន​បណ្តេញ​ចេញ​ជាង​២០​នាក់​បាន​នាំ​គ្នា​ទៅ​តវ៉ា​ទាមទារ​រក​ដំណោះ​ស្រាយ​នៅ​ខាង​មុខ​ស្ថានទូត។

នៅ​ព្រឹក​ថ្ងៃ​អង្គារ​នេះ​ អតីតបុគ្គលិក​សន្តិសុខ​ស្ថានទូត​អាមេរិក​ប្រចាំ​កម្ពុជា​ជាង​២០​នាក់​ ប្រមូល​ផ្តុំ​គ្នា​នៅ​មុខ​ស្ថានទូត​អាមេរិក​ ដើម្បី​តវ៉ា​ទាមទារ​រក​ដំណោះ​ស្រាយ​និង​សំណង​ជំងឺ​ចិត្ត​ ដោយ​ចោទ​ថា​ស្ថានទូត​នេះ​បញ្ឈប់​ពួក​គេ​ពី​ការងារ​ទាំង​អយុត្តិធម៌​ និង​មិន​មាន​ភស្តុតាង​ច្បាស់លាស់។

កំពុង​ឈរ​តវ៉ា​នៅ​ខាង​មុខ​ស្ថានទូត​អាមេរិក​ប្រចាំ​កម្ពុជា​ លោក​ ឡុង សេងប៊ុនហុង​ដែល​អះអាង​ថា លោក​បាន​ធ្វើ​ជា​សន្តិសុខ​នៅ​ស្ថានទូត​អាមេរិក​អស់​រយៈពេល​ជាង​១៩ឆ្នាំ​មក​ហើយ​ បាន​រៀបរាប់​ថា ស្ថានទូត​នេះ​បាន​បញ្ឈប់​សន្តិសុខ​ជាង​៣០​នាក់​ពី ការងារ​ ក្នុង​អំឡុង​ខែ​មេសា​ ដោយ​ចោទ​ថា​ ​ពួក​គេ​មើល​និង​ចែក​ចាយ​រូប​អាសអាភាស​របស់​កុមារ​ ក្នុង​សារ​ជា​ក្រុម​ក្នុង​ហ្វេសប៊ុក​ ឬ Group Facebook Messenger។​

លោក​បន្ថែម​ថា ការ​ចោទ​ប្រកាន់​នេះ​មិន​មាន​ភស្តុតាង​ ឬ​ស៊ើប​អង្កេត​ច្បាស់​លាស់​ និង​ថា​ ជា​ការ​ចោទ​ប្រកាន់​ធ្ងន់ធ្ងរ​ដែល​មាន​ចេតនា​រៀបចំ​ទុកជា​មុន​ ដើម្បី​បញ្ឈប់​ពួក​គេ​ពី​ការ​ងារ​ដោយ​មិន​ផ្តល់​សំណង​និង​ប្រាក់​អត្ថ​ប្រយោជន៍។​

លោក ​ឡុង សេងប៊ុនហុង ​បាន​បញ្ជា​ក់ថា៖

«ខ្ញុំ​មិន​អាច​ទទួល​យក​បាន​ទេ​ កំហុស​ទាំង​អស់​ហ្នឹង​ ជា​ពិសេស​កំហុសដូច​គ្នា។​ ហើយ​មួយ​ទៀត​ដែល​ពាក់​ព័ន្ធ​រឿង​ហ្នឹង គឺ​ការ​ដែល​គំរាម​កំហែង មុន​នឹង​យើង​វិនិច្ឆ័យ​ទោស នរណា​ម្នាក់ យើង​មិន​អាច​ទៅ​ដល់​ភ្លាម​ហៅ​គ្នា​ទៅ​ដល់ វាយ​អ្នក​ឯង បញ្ឈប់​អ្នក​ឯង​ទេ។​ នៅ​ពេល​ដែល​រឿង​អត់​ទាន់​ដឹង​អី គំរាម​បញ្ឈប់​គ្នា​មុន​ទៅ​ហើយ។ យើង​ត្រូវ​មើល​ការ​ងារ​ហ្នឹង តើការ​ងារ​ហ្នឹង​វា​យ៉ាង​ម៉េច? អាច​បញ្ឈប់​គ្នា​បាន​ទេ?​ គាត់​ទៅ​ដល់​និយាយ​ថា​បញ្ឈប់​តែ​ម្តង។​ អញ្ចឹង​អា​ការ​ដែល​គេ​បញ្ឈប់​អី​ហ្នឹង ជា​ការ​រៀបចំ​របស់​គេ​តែ​ម្តង»។

សន្តិសុខ​ដែល​ត្រូវ​បាន​ស្ថានទូត​សហរដ្ឋ​អាមេរិក​បញ្ឈប់​កាល​ពី​ប៉ុន្មាន​ខែ​មុន​និង​គ្រួសារ​របស់ពួកគេ​បាន​មក​ធ្វើ​បាតុកម្ម​តវ៉ា​រក​យុត្តិធម៌​ដោយ​អហិង្សា​នៅ​ខាង​មុខ​ស្ថានទូត​អាមេរិករាជធានី​ភ្នំពេញ​ ​កាល​ពីព្រឹក​ថ្ងៃទី​១៩ មិថុនា ឆ្នាំ ២០១៨។(ទុំ ម្លិះ/VOA)
សន្តិសុខ​ដែល​ត្រូវ​បាន​ស្ថានទូត​សហរដ្ឋ​អាមេរិក​បញ្ឈប់​កាល​ពី​ប៉ុន្មាន​ខែ​មុន​និង​គ្រួសារ​របស់ពួកគេ​បាន​មក​ធ្វើ​បាតុកម្ម​តវ៉ា​រក​យុត្តិធម៌​ដោយ​អហិង្សា​នៅ​ខាង​មុខ​ស្ថានទូត​អាមេរិករាជធានី​ភ្នំពេញ​ ​កាល​ពីព្រឹក​ថ្ងៃទី​១៩ មិថុនា ឆ្នាំ ២០១៨។(ទុំ ម្លិះ/VOA)

​បើ​តាម​ក្រុម​អ្នក​តវ៉ា​ឲ្យដឹង​ថា​ កាលពី​ខែ​មេសា​ ឆ្នាំ​២០១៨​ កន្លង​ទៅ​ ស្ថានទូត​អាមេរិក​ប្រចាំ​កម្ពុជា​បាន​បញ្ឈប់​បុគ្គលិក​ផ្នែក​សន្តិសុខ​ដែល​ជាជន​ជាតិ​ខ្មែរ​និង​ខ្មែរ-អាមេរិកាំង​ចំនួន​៣២​នាក់​ដោយ​ចោទ​ប្រកាន់​ថា​ ពួក​គេ​បាន​ចែក​ចាយ​រូបភាព​អាសអាភាស​កុមារ​ ​ក្នុង​សារ​ជា​ក្រុម​ក្នុង​ហ្វេសប៊ុក​ឬ Group Facebook Messenger របស់​ពួក​គេ។​ ពួកគេ​បញ្ជាក់​ថា ពួកគេ​ទទួល​បាន​ថវិកា​១២ភាគរយ​ ពី​ស្ថាន​ទូត​មុន​ពេល​បញ្ចប់​ការងារ​ផង​ដែរ។

យ៉ាង​ណាក៏​ដោយ​លោក​ ញ៉រ សីហា​ ដែល​អះអាង​ថា​ជា​អតីតបុគ្គលិក​សន្តិសុខ​ស្ថានទូត​ដែរ​នោះ បញ្ជា​ក់ថា ​កាលពី​ខែ​មីនា មន្រ្តី​ជាន់​ខ្ពស់​ផ្នែក​សន្តិសុខ​ក្នុង​ស្ថានទូត​បាន​ហៅ​សន្តិសុខ​ជា​ច្រើន​នាក់ ​ដែល​ស្ថិត​ក្នុង​ Group Facebook Messenger​ ដែល​ជា​ ​Group Facebook​ មាន​ការ​ចែក​ចាយ​រូបភាព​អាសអាភាស​នោះ​ទៅ​សួរ​នាំ​ និង​ដក​ហូត​កាត​បុគ្គលិក ដោយ​ចោទ​ថា រូបភាព​អាសអាភាស​ក្នុង​សារ​ជា​ក្រុម​ នោះ​ជា​ក្មេង​ស្រី​អាយុ​ក្រោម​១៨ឆ្នាំ។​ លោក​បន្ថែម​ថា ​ក្រោយ​ការ​ដក​ហូត​កាត​បុគ្គលិក​ពី​ពួក​គេ​ទាំង​ជាង​៣០​នាក់​ មន្រ្តី​ស្ថានទូត​បាន​ទុក​ពេល​ឲ្យ​ពួក​គេ​២សប្តាហ៍​ដើម្បី​តវ៉ា ​ប៉ុន្តែ​លោក​ថា ​រហូត​មក​ដល់​ពេល​នេះ​មិន​មាន​ការដោះ​ស្រាយ​ណាមួយ​ក្រៅ​តែ​ពី​ការ​ផ្តល់​ប្រាក់​១២​ភាគរយ ឲ្យ​ពួក​គេ​នោះ​ទេ។

លោក​បញ្ជាក់​ដោយ​ដៃ​កំពុង​កាន់​បដា​មាន​សរសេរ​ទាមទារ​ដំណោះ​ស្រាយ​ថា៖

«ពួក​ខ្ញុំ​ចង់​ទាមទារ​ជំងឺ​ចិត្ត​ដែល​គាត់​ចោទ​ប្រកាន់​ខ្ញុំ​អញ្ចឹង​ ព្រោះ​អីវា​ធ្វើ​ឲ្យ​ប៉ះពាល់ ដល់​ពេល​អ្នក​គេ​អត់​ដឹង​គេ​ថា ​ពួក​ខ្ញុំ​មក​ធ្វើ​ការ​ហើយ ម៉េច​បាន​ទៅ​លេង​រូប​អី​អញ្ចឹង? ទៅ​ធ្វើ​អី​អញ្ចឹង? អ្នក​គេ​អត់​ដឹង​គេ​ចោទ​ប្រកាន់ខ្ញុំ​អញ្ចឹង ព្រោះ​អី​កិត្តិយស​របស់​ខ្ញុំ​ដែល​គាត់​បញ្ឈប់​ចោល​ហ្នឹង ខ្ញុំ​រក​ការងារ​ធ្វើ​អត់​បាន​ទេ»។

អតីត​បុគ្គលិក​ស្ថានទូត​ទាំង​នោះ​បាន​អះអាង​ស្រដៀង​គ្នា​ថា ក្រោយ​ពី​ស្ថានទូត​បញ្ឈប់​ពី​ការ​ងារ ធ្វើ​ឲ្យ​ពួក​គេ​ប្រឈម​បញ្ហា​ក្នុង​ជីវភាព​គ្រួសារ ខណៈ​រង់ចាំ​ដំណោះ​ស្រាយ​ពី​ស្ថានទូត​អស់​រយៈពេល​ជាង​៣ខែ​កន្លង​ទៅ​នេះ។ ពួក​គេ​បន្ថែម​ថា ពួក​គេ​នឹង​បន្ត​ការ​តវ៉ា​និង​ប្តឹង​ទៅ​កាន់​ស្ថាប័ន​ពាក់​ព័ន្ធ​ផ្សេងៗ​រហូត​មាន​ដំណោះ​ស្រាយ។​

លោក​ David Josar​ អ្នក​នាំ​ពាក្យ​ស្ថានទូត​អាមេរិក​ប្រចាំ​កម្ពុជា ​បដិសេធ​មិន​ធ្វើ​អត្ថាធិប្បាយ​ពាក់​ព័ន្ធ​នឹង​ការ​បណ្តេញ​បុគ្គលិក​សន្តិសុខ​ទាំង​ជាង​៣០​នាក់​ចេញ​ពី​ស្ថានទូត​កាលពី​ខែ​មេសា​ ដោយ​អះអាង​ថា ជា​បញ្ហា​ផ្ទៃ​ក្នុង​របស់​បុគ្គលិក។

ទោះ​យ៉ាង​ណា​ លោក​បាន​ប្រាប់​ VOA ​តាម​រយៈ​សារអេឡិចត្រូនិច​ ឬ​អ៊ីមែល​នារសៀល​ថ្ងៃ​អង្គារ​នេះ​ តាម​សម្រង់ន័យ​ដើម​ជា​ភាសា​អង់គ្លេស​ និង​ត្រូវ​បាន​ប្រែ​សម្រួល​ជា​ភាសា​ខ្មែរ​ថា៖

«យើង​គោរព​សិទ្ធិ​ទាំងអស់គ្នា​ដើម្បីតវ៉ា​ដោយ​សន្តិភាព​ រួម​ទាំង​អតីត​សន្តិសុខ​ទាំង​នោះ​ផង។​ រដ្ឋា​ភិបាល​អាមេរិក​ចាត់​វិធានកា​លើ​ហេតុ​ការណ៍​ផ្សេងៗ​ដែល​មាន​ពាក់​ព័ន្ធនឹង​រូប​អាសអាភាស​របស់​កុមារ ​និង​ការ​កេង​ប្រវ័ញ្ច​លើ​កុមារ​យ៉ាង​ធ្ងន់ធ្ងរ»។

សន្តិសុខ​ដែល​ត្រូវ​បាន​ស្ថានទូត​សហរដ្ឋ​អាមេរិក​បញ្ឈប់​កាល​ពី​ប៉ុន្មាន​ខែ​មុន​និង​គ្រួសារ​របស់ពួកគេ​បាន​មក​ធ្វើ​បាតុកម្ម​តវ៉ា​រក​យុត្តិធម៌​ដោយ​អហិង្សា​នៅ​ខាង​មុខ​ស្ថានទូត​អាមេរិករាជធានី​ភ្នំពេញ​ ​កាល​ពីព្រឹក​ថ្ងៃទី​១៩ មិថុនា ឆ្នាំ ២០១៨។ (ទុំ ម្លិះ/VOA)
សន្តិសុខ​ដែល​ត្រូវ​បាន​ស្ថានទូត​សហរដ្ឋ​អាមេរិក​បញ្ឈប់​កាល​ពី​ប៉ុន្មាន​ខែ​មុន​និង​គ្រួសារ​របស់ពួកគេ​បាន​មក​ធ្វើ​បាតុកម្ម​តវ៉ា​រក​យុត្តិធម៌​ដោយ​អហិង្សា​នៅ​ខាង​មុខ​ស្ថានទូត​អាមេរិករាជធានី​ភ្នំពេញ​ ​កាល​ពីព្រឹក​ថ្ងៃទី​១៩ មិថុនា ឆ្នាំ ២០១៨។ (ទុំ ម្លិះ/VOA)

​អតីត​បុគ្គលិក​សន្តិសុខ​របស់​ស្ថានទូត​ទាំង​នោះ​មួយ​ចំនួន​បញ្ជាក់​ក្នុង​អំឡុង​ពេល​កំពុង​តវ៉ា​ថា​ ពួក​គេ​បាន​ដាក់​ញតិ្ត​ទៅ​ក្រសួង​ការងារ​និង​បណ្តុះ​បណ្តាល​ វិជ្ជាជីវៈ​ ខុទ្ទកាល័យ​លោក​នាយក​រដ្ឋ​មន្រ្តី​ ហ៊ុន សែន​ និង​ក្រសួង​ការ​បរទេស​ ដើម្បី​ឲ្យ​ជួយ​ដោះ​ស្រាយ​និង​ផ្តល់​ភាព​យុត្តិធម៌​ដល់​ពួក​គេ​រួច​ហើយ។

VOA​ មិន​អាចសុំការ​អត្ថាធិប្បាយ​ពី​លោក​ ហេង សួរ​ អ្នក​នាំ​ពាក្យ​ក្រសួង​ការ​ងារ​បាន​ទេ រហូត​ដល់​ល្ងាច​ថ្ងៃ​អង្គារ​នេះ។

លោក​ អំ សំអាត ​មន្រ្តី​ជាន់​ខ្ពស់​ផ្នែក​អង្កេត​នៃ​អង្គការ​ការពារ​សិទ្ធិ​មនុស្ស​លីកាដូ ប្រាប់​VOA ​ថា ការ​ដោះ​ស្រាយ​វិវាទ​ការងារ​ គឺ​ត្រូវ​សម្រេច​លើ​ការ​អនុ​វត្ត​បទ​បញ្ជា​ផ្ទៃ​ក្នុង​ ឬ​លក្ខន្តិកៈ​របស់​រដ្ឋាភិបាល​សាម៉ី។ ទោះ​យ៉ាង​ណា​លោក​ថា​ ស្ថានទូត​អាមេរិក​ប្រចាំ​កម្ពុជា​គួរ​តែបក​ស្រាយ​ពីមូល​ហេតុ​នៃ​ការ​បណ្តេញ​អតីត​សន្តិសុខ​ទាំង​នោះ​ឲ្យ​បាន​ច្បាស់។​

លោក​មាន​ប្រសាសន៍​ថា៖

«ខ្ញុំ​ក៏​មិន​ដឹងថា​នៅ​ក្នុង​កុងត្រា​ ឬ​ក៏​លក្ខន្តិកៈ​ ឬ​ក៏​បទ​បញ្ជា​ផ្ទៃ​ក្នុង​របស់​ស្ថានទូត​ជាមួយ​បុគ្គលិក​ហ្នឹង​វា​យ៉ាង​មេច​ដែរ អាហ្នឹង​វា​អាស្រ័យ​ទៅ​លើ​បទ​បញ្ជា​ផ្ទៃ​ក្នុង លក្ខន្តិកៈ​និង​កុងត្រា​របស់​ភាគី​ទាំង​ពីរ​ហ្នឹង។ ហើយ​បញ្ហា​សំខាន់​ខ្ញុំ​គិត​ថា វា​ជា​ដំណោះ​ស្រាយ​ល្អ គឺ​ការ​ដោះ​ស្រាយ និង​ការ​ចរចា​គ្នា​ដោយ​សន្តិ​វិធី​ពាក់​ព័ន្ធនឹង​បញ្ហា​ទាំង​អស់​ហ្នឹង ​ដើម្បីឲ្យ​មាន​ការ​ទទួល​យក​បាន​ណាមួយ​រវាង​ភាគី​ទាំង​ពីរ​ហ្នឹង»។

​ក្នុង​ការ​តវ៉ា​ដែល​ធ្វើ​ឡើង​តាំង​ពី​ម៉ោង​៨​ព្រឹក​ និង​បញ្ចប់​នៅ​ម៉ោង​១១​ព្រឹក​នេះ​ គេ​ឃើញ​មាន​ការឃ្លាំ​មើល​ពី​សមត្ថកិច្ច​ប្រមាណ​ជា​ជាង​៣០​នាក់​ ឈរ​លើ​ខឿន​មុខ​ស្ថានទូត​ខណៈ​អ្នក​តវ៉ា​កាន់​ជាបដារ​ទាមទារ​រក​ដំណោះ​ស្រាយ​ និង​រូបថត​របស់​លោក​នាយក​រដ្ឋ​មន្រ្តី ហ៊ុន សែន រូបថត​ប្រធានាធិបតី​អាមេរិក​ លោក​ ដូណាល់ត្រាំ​ ព្រម​ទាំង​មាន​ទង់​ជាតិ​កម្ពុជា​និង​អាមេរិក​ផង​ដែរ។

​អតីត​បុគ្គលិក​ទាំង​៣២​នាក់​ដែល​ធ្វើ​ការ​ចាប់​ពី​ជាង​៥ឆ្នាំ​ដល់ជិត​២០ឆ្នាំ​ ហើយ​ត្រូវ​បាន​បណ្តេញ​ចេញ​ពី​ការ​ងារ​នេះ ទាមទារ​ឲ្យ​ស្ថានទូត​អាមេរិក​ដោះ​ស្រាយ​ ជូន​ពួក​គេ​ចំនួន​៧​ចំណុច។​

ក្នុង​នោះ​ពួក​គេ​រក​យុត្តិធម៌​ពីការ​បញ្ឈប់​ដោយ​បង្ខំ​ និង​មិន​បង្ហាញ​ភស្តុតាង។​ ទាមទារ​ឲ្យ​ស្ថានទូត​កែ​ពាក្យ​ពី​ការ​បណ្តេញ​ចេញ មក​ជាការ​កាត់​បន្ថយបុគ្គលិក។​ ទាមទារ​សំណង​៦ខែ​ទៅ​តាម​ច្បាប់​កាត់​បន្ថយ​បុគ្គលិក។​ ប្តឹង​ពី​បទ​រំលោភ​សិទ្ធិបុគ្គលិក ដោយ​ដក​ហូតយក​ទូរស័ព្ទ​ ទៅ​ឆែក​មើល​គ្រប់​រូបភាព​និង​ឯកសារ​ផ្សេងៗ។​ ទារសំណង​ជំងឺ​ចិត្ត​ទៅ​លើការ​បង្ខូច​កេរ្តិ៍​ឈ្មោះ​ និង​កិតិ្តយស​ ដោយ​ការ​ចោទ​ប្រកាន់​គ្មាន​ភស្តុតាង​ជា​ដើម៕

XS
SM
MD
LG