អតីតសកម្មជនសហជីពមួយរូប លោក ឡេង សេងហុង បានបង្ហាញខ្លួនក្នុងសាលសវនាការនៅតុលាការក្រុងភ្នំពេញ នាព្រឹកថ្ងៃអង្គារនេះ ដើម្បីផ្តល់ចម្លើយដល់ក្រុមប្រឹក្សាជំនុំជម្រះពាក់ព័ន្ធនឹងទំនាក់ទំនងរបស់លោកក្នុងចលនាឲ្យមានការគាំទ្រពីមហាជន អនុវត្តផែនការវិលត្រឡប់ចូលប្រទេសរបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
មិនខុសពីជនជាប់ចោទមុនៗ លោក ឡេង សេងហុង ដែលត្រូវបានចោទពីបទរួម«គំនិតក្បត់ និងញុះញង់» ត្រូវបានក្រុមប្រឹក្សាជំនុំជម្រះសួរអំពីការទទួលផែនការពីថ្នាក់ដឹកនាំអតីតគណបក្សសង្គ្រោះជាតិ ដែលមានខ្លះរស់នៅប្រទេសកាណាដា នៅក្នុងការធ្វើសកម្មភាពកៀរគរការគាំទ្រពីប្រជាពលរដ្ឋ និងកងកម្លាំងប្រដាប់អាវុធបើកផ្លូវឲ្យលោក សម រង្ស៊ី បានចូលមកប្រទេសកម្ពុជា។
ក្នុងការសួរដេញដោលនៅក្នុងសវនាការនាព្រឹកថ្ងៃអង្គារនេះ ក្រុមប្រឹក្សាជំនុំជម្រះបានសួរឲ្យលោក ឡេង សេងហុង ឆ្លើយបំភ្លឺគោលបំណងចូលរួមសិក្ខាសាលានៅប្រទេសម៉ាឡេស៊ី និងប្រទេសថៃ កាលពីអំឡុងឆ្នាំ២០១៩ ជាទីដែលត្រូវតុលាការសង្ស័យថា មានការជួបជុំក្រុមថ្នាក់ដឹកនាំ មន្ត្រី និងសកម្មជនរបស់អតីតគណបក្សសង្គ្រោះជាតិ ដើម្បីអនុវត្តទម្រង់បាតុកម្មដូចនៅទីក្រុងហុងកុង និងប្រមូលក្រុមពលករដែលធ្វើការនៅប្រទេសថៃឲ្យមកចូលរួមដំណើរវិលត្រឡប់របស់អតីតមេដឹកនាំគណបក្សសង្គ្រោះជាតិលោក សម រង្ស៊ី ចូលប្រទេសកំណើតវិញ។
ប៉ុន្តែលោក ឡេង សេងហុង អាយុ៣៤ឆ្នាំ បានប្រាប់ក្រុមប្រឹក្សាជំនុំជម្រះថា លោកមិនមានការជាប់ពាក់ព័ន្ធនឹងផែនការមាតុភូមិនិវត្តន៍របស់លោក សម រង្ស៊ី ក្រោមហេតុផលថា ផែនការដែលទាមទារឲ្យមហាជន និងកងកម្លាំងប្រដាប់អាវុធក្រោកឈរប្រឆាំងនឹងរដ្ឋាភិបាលនោះ អាចបង្កអសន្តិសុខដល់សង្គម។
តំណាងអយ្យការលោក សេង ហៀង បានតាំងសំណួរថា៖ «ក្នុងនាមលោកជាពលរដ្ឋលោកយល់ថា ផែនការវិលត្រឡប់[នោះ]ត្រឹមត្រូវទេ?» លោក ឡេង សេងហុង តបភ្លាមៗថា៖ «ខ្ញុំគិតថា មិនត្រឹមត្រូវតាមច្បាប់»។
តំណាងអយ្យការបន្តសំណួរថា៖ «ហេតុអ្វីខុសច្បាប់?» លោក ឡេង សេងហុង ដែលជាអតីតប្រធានសមាគម សហព័ន្ធនិស្សិតបញ្ញវន្តកម្ពុជាផងនោះលើកឡើងដោយសំដៅទៅលោក សម រង្ស៊ី ថា៖ «ព្រោះគាត់និយាយមកឲ្យធ្វើសកម្មភាពប្រមែប្រមូល[ពលរដ្ឋ] ខ្ញុំគិតថា ជារឿងនាំឲ្យមានអសន្តិសុខសង្គម»។
អំឡុងពេលសួរដេញដោលក្នុងសវនាការជាង១ម៉ោង តំណាងអយ្យការលោក សេង ហៀង និងមេធាវីការពារជនជាប់ចោទលោក សំ សុគង់ បានជជីកសួរអំពីទំនាក់ទំនងរបស់លោក ឡេង សេងហុង ជាមួយនឹងលោក ឃាន វិសេស ទាក់ទិនការទៅចូលរួមសិក្ខាសាលានៅប្រទេសម៉ាឡេស៊ី និងរយៈពេលនៃការស្គាល់គ្នារវាងលោក ឡេង សេងហុង និងលោក ឃាន វិសេស។
ប៉ុន្តែលោក ឡេង សេងហុង លើកឡើងក្នុងសវនាការថា ទំនាក់ទំនងរបស់លោកជាមួយលោក ឃាន វិសេស ដែលជាអតីតមន្ត្រីផ្នែករដ្ឋបាលនៅគណបក្សសង្គ្រោះជាតិនោះ គឺជាទំនាក់ទំនងរាប់អានជាមិត្តធម្មតាប៉ុណ្ណោះ។ ហើយនៅពេលលោកស្នាក់នៅប្រទេសម៉ាឡេស៊ី អំឡុងឆ្នាំ២០១៩នោះ លោកក៏មិនបានចូលរួមសិក្ខាសាលារៀបចំដោយអតីតគណបក្សសង្គ្រោះជាតិដែរ ដោយសារលោកឃើញមានឈ្មោះលោក សម រង្ស៊ី ក្នុងបញ្ជីនៃអ្នកចូលរួម។
លោក ឡេង សេងហុង ប្រាប់ក្រុមប្រឹក្សាជំនុំជម្រះថា ដោយហេតុលោក សម រង្ស៊ី ត្រូវបានរកឃើញថា មានទោសនៅតុលាការកម្ពុជា ដូច្នេះលោកខ្លាចមានជាប់ពាក់ព័ន្ធនឹងកំហុសឆ្គងណាមួយ ទើបបានជាលោកមិនចូលរួមសិក្ខាសាលានោះ។
នៅក្នុងសំណុំរឿងដែលមានជាប់ពាក់ព័ន្ធនឹងព្រឹត្តិការណ៍វិលត្រឡប់របស់លោក សម រង្ស៊ី កាលពីថ្ងៃទី៩ ខែវិច្ឆិកាឆ្នាំ២០១៩ មានអ្នកគាំទ្រ សកម្មជន មន្ត្រីគណបក្សតាមបណ្តាខេត្ត និងរាជធានី និងថ្នាក់ដឹកនាំរបស់បក្សនេះយ៉ាងហោចណាស់ជិត១៤០នាក់ ត្រូវបានតុលាការចោទប្រកាន់ ឬរងការចាប់ខ្លួនទាក់ទងនឹងបទ«ក្បត់ជាតិ» បទ «រួមគំនិតក្បត់» ឬបទ«ញុះញង់ឲ្យប្រពឹត្តបទឧក្រិដ្ឋ»ជាដើម។ នេះបើយោងតាមក្រុមអ្នកការពារសិទ្ធិមនុស្សនៅប្រទេសកម្ពុជា។
នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូលោក អំ សំអាត ប្រាប់វីអូអេនៅថ្ងៃអង្គារនេះថា សំណុំរឿងចាក់ស្រេះខាងលើ មិនអាចនឹងបញ្ចប់បានលឿននៅតុលាការទេ ព្រោះថា ជាសំណុំរឿងមានជាប់ពាក់ព័ន្ធនឹងហេតុផលនយោបាយ។លោកជឿថា មានតែការស្រុះស្រួលខាងនយោបាយប៉ុណ្ណោះ ទើបអាចបញ្ចប់សំណុំរឿងនេះបាន។
«វាជាបទពិសោធន៍កន្លងមក បើសិនជា ការចរចាផ្នែកនយោបាយ ធ្វើទៅបានហើយមានការស្រុះស្រួលគ្នាទៅបាន អ៊ីចឹងរឿងទាំងអស់ហ្នឹងវា...រឿងទាំងអស់ហ្នឹងការបញ្ចប់ វាអាចនឹងឆាប់ទៅបាន ហើយវាជារឿងមួយអាចនឹងត្រូវបានដោះស្រាយតាមផ្នែកនយោបាយនោះ»។
នៅចុងបញ្ចប់សវនាការនៅថ្ងៃអង្គារនេះ លោកចៅក្រម រស់ ពិសិដ្ឋ ប្រធានក្រុមប្រឹក្សាជំនុំជម្រះប្រកាសបន្តសវនាការនៅថ្ងៃទី២១ ខែធ្នូ ឆ្នាំ២០២១ ខាងមុខ៕
