ការបែងចែកគ្នាជាជាងការរួបរួមគ្នាកំពុងតែកើតឡើងនៅក្នុងសន្និបាតគណបក្សសាធារណរដ្ឋកាលពីថ្ងៃព្រហស្បតិ៍ ខណៈដែលលោក Ted Cruz សមាជិកព្រឹទ្ធសភារដ្ឋ Texas បានរិះគន់បេក្ខជនប្រធានាធិបតីខាងគណបក្សសាធារណរដ្ឋ លោក Donald Trump នៅថ្ងៃចុងក្រោយបង្អស់នៃសន្និបាតគណបក្សដែលមានរយៈពេល៤ថ្ងៃ។
ដោយថ្លែងទៅកាន់ប្រតិភូពីរដ្ឋរបស់លោកកាលពីថ្ងៃព្រហស្បតិ៍នៅក្នុងសន្និបាតគណបក្ស ដែលរៀបចំឡើងនៅក្នុងទីក្រុង Cleveland លោក Cruz បាននិយាយថា លោកនឹងបោះឆ្នោតគាំទ្របេក្ខជនប្រធានាធិបតីខាងគណបក្សប្រជាធិបតេយ្យ លោកស្រី Hillary Clinton ប៉ុន្តែលោកមិនបានបញ្ជាក់ទេ ថាតើលោកនឹងបោះឆ្នោតឲ្យលោក Trump ឬក៏អត់។
លោក Cruz បាននិយាយយ៉ាងដូច្នេះថា «ខ្ញុំមិនមានទម្លាប់គាំទ្រឲ្យជនណាដែលនិយាយវាយប្រហារមកលើភរិយារបស់ខ្ញុំ និងអ្នកណាដែលនិយាយវាយប្រហារឳពុករបស់ខ្ញុំនោះទេ»។ លោកក៏បានបន្ថែមទៀតថា លោកមិនធ្វើដូចជាកូនឆ្កែ និងនិយាយអរគុណដល់នរណាដែលនិយាយមួលបង្កាច់ភរិយានិងឳពុករបស់លោកនោះទេ។
ក្នុងអំឡុងពេលនៃយុទ្ធនាការដើម្បីទទួលបានការតែងតាំងជាបេក្ខជនប្រធានាធិបតីពីគណបក្សសាធារណរដ្ឋ លោក Trump បាននិយាយវាយប្រហារទៅលើភរិយារបស់លោក Cruz គឺអ្នកស្រី Heidi និងឳពុករបស់លោក គឺលោក Rafael។
លោក Trump បានឆ្លើយតបទៅនឹងការរិះគន់របស់លោក Cruz លើបណ្តាញសង្គម Twitter ដោយនិយាយថា ការរួបរួមគ្នានៅក្នុងគណបក្សសាធារណរដ្ឋគឺទទួលបានជ័យជម្នះ។ ក្រៅពីមនុស្សមួយក្រុមតូចដែលរងការចាញ់យ៉ាងធ្ងន់ធ្ងរនិងគួរឲ្យអាម៉ាស់ គណបក្សនេះគឺមានការរួបរួមគ្នាណាស់»។
លោក Cruz គឺជាគូប្រជែងចុងក្រោយបង្អស់របស់លោកTrump នៅក្នុងការប្រជែងដើម្បីទទួលបានការតែងតាំងជាបេក្ខជនប្រធានាធិបតីពីគណបក្សសាធារណរដ្ឋ ដែលក្នុងពេលនោះលោក Trump បានហៅលោក Cruz ថា Ted ជាមនុស្សនិយាយកុហក។ ប៉ុន្តែដូចសព្វមួយដងដែរ លោក Cruz បានមានវត្តមាននៅក្នុងសន្និបាតគណបក្សសាធារណរដ្ឋ ក្នុងទីក្រុង Cleveland រដ្ឋ Ohio ដើម្បីថ្លែងសុន្ទរកថាទៅកាន់សមាជិកគណបក្ស ជាមួយនឹងមនុស្សរាប់លាននាក់មើលតាមកញ្ចក់ទូរទស្សន៍៕
