សមាជិកព្រឹទ្ធសភាអាមេរិកលោក Mitt Romney បេក្ខជនប្រធានាធិបតីនៃគណបក្សសាធារណរដ្ឋឆ្នាំ២០១២ បាននិយាយនៅថ្ងៃពុធនេះថា លោកនឹងបោះឆ្នោតដើម្បីផ្តន្ទាទោសប្រធានាធិបតីលោកដូណាល់ត្រាំពីបទរំលោភអំណាចប្រធានាធិបតី ទោះបីជាព្រឹទ្ធសភាទាំងមូលឲ្យលោកប្រធានាធិបតី Trump រួចពីការចោទប្រកាន់ទាំងពីរក៏ដោយ។
នៅក្នុងសុន្ទរកថាដ៏គួរឱ្យកត់សម្គាល់នៅមុនការបោះឆ្នោតព្រឹទ្ធសភា លោកRomney បាននិយាយថា «អ្វីដែលប្រធានាធិបតីបានធ្វើគឺខុស ខុស់ខ្លាំងណាស់» ក្នុងការស្នើឱ្យប្រទេសអ៊ុយក្រែនស៊ើបអង្កេតលោក Joe Biden អតីតអនុប្រធានាធិបតី ដែលជាគូប្រជែងសំខាន់មួយចំណោមប្រកួតប្រជែងរបស់លោកត្រាំសម្រាប់ការបោះឆ្នោតឆ្នាំ២០២០និងកូនប្រុសគឺ លោក Hunter Biden ទាក់ទងនឹងក្រុមហ៊ុនឧស្ម័នធម្មជាតិអ៊ុយក្រែន។
លោក Romney ដែលចាញ់ឆ្នោតអតីតប្រធានាធិបតីបារ៉ាក់អូបាម៉ាសម្រាប់តំណែងប្រធានាធិបតីមុនពេលលោកទទួលបានអាសនៈព្រឹទ្ធសភារដ្ឋ Utah ដែលនៅភាគខាងលិចកាលពី២ឆ្នាំមុន បាននិយាយថា «ប្រសិនបើឈ្មោះទាំងនេះមិនមែនជា Bidens នោះលោកប្រធានាធិបតីនឹងមិនធ្វើអ្វីដែលគាត់បានធ្វើនោះទេ»។
លោកបាននិយាយថា ការរំលោភអំណាចរបស់លោកប្រធានាធិបតី Trump «ជាការរំលោភជាក់ស្តែង ...ទៅលើគុណតម្លៃជាមូលដ្ឋានរបស់យើង»។
ប៉ុន្តែលោក Romney បាននិយាយថា លោកនឹងមិនបោះឆ្នោតផ្តន្ទាទោសលោកTrump សម្រាប់ការចោទប្រកាន់ទី២ដែលថា លោកបានរារាំងការត្រួតពិនិត្យរបស់សភាលើសកម្មភាពរបស់របស់លោកទាក់ទងនឹងប្រទេសអ៊ុយក្រែននោះទេ។ លោក Romney បានក្លាយជាសមាជិកព្រឹទ្ធសភាដំបូងគេរបស់គណបក្សសាធារណរដ្ឋដែលសម្រេចចិត្តខាងនយោបាយខុសពីគណបក្សក្នុងការកាត់ទោសលោក Trump។
រហូតមកដល់ពេលនេះ មិនមានសមាជិកព្រឹទ្ធសភាសាធារណរដ្ឋផ្សេងទៀតប្រកាសថា ពួកគេនឹងបោះឆ្នោតផ្តន្ទាទោសលោក Trump ដើម្បីដកលោកចេញពីតំណែងទេ ហើយក៏មិនមានសមាជិកព្រឹទ្ធសភាគណបក្សប្រជាធិបតេយ្យប្រកាសថា នឹងបោះឆ្នោតឲ្យលោក Trump រួចពីការចោទប្រកាន់ដែរ។ ការបោះឆ្នោតដកលោកត្រាំចេញពីតំណែងត្រូវការសំឡេងភាគច្រើន២ភាគ៣គឺ៦៧សំឡេងក្នុងព្រឹទ្ធសភាដែលមានសំឡេងសាធារណរដ្ឋ៥៣ទល់នឹងសំឡេងគណបក្សប្រជាធិបតេយ្យ៤៧៕
