អតីតអ្នកកាសែតដ៏ល្បីល្បាញមួយរូបរបស់សហរដ្ឋអាមេរិកនឹងចូលផ្តល់សក្ខីកម្មនៅសាលាក្តីខ្មែរក្រហមនៅសប្តាហ៍ក្រោយដើម្បីពិពណ៌នាអំពីអ្វីដែលគាត់បានឃើញផ្ទាល់នឹងភ្នែកនៅរយៈពេលចុងក្រោយនៃរបបខ្មែរក្រហម។
លោកឡាស អលសិន (Lars Olsen)មន្ត្រីផ្នែកទំនាក់ទំនងកិច្ចការច្បាប់នៃសាលាក្តីខ្មែរក្រហមបានឲ្យដឹងនៅថ្ងៃព្រហស្បតិ៍នេះថាលោកស្រីអេលីហ្សាបែត បេកឃើ (Elisabeth Becker) អតីតអ្នកឆ្លើយឆ្លងព័ត៌មានរបស់កាសែត Washington Post នឹងឡើងផ្តល់សក្ខីកម្មនៅថ្ងៃច័ន្ទទី៩ខែកុម្ភៈ សប្តាហ៍ក្រោយនេះទាក់ទងនឹងអ្វីដែលលោកស្រីបានឃើញដោយផ្ទាល់នឹងភ្នែកនូវរបបខ្មែរក្រហមនៅចុងឆ្នាំ១៩៧៨។
លោកស្រីអេលីហ្សាបែត បេកឃើ គឺជាអតីតអ្នកឆ្លើយឆ្លងព័ត៌មានឲ្យកាសែតWashington Post អំពីសង្គ្រាមនៅប្រទេសកម្ពុជាហើយលោកស្រីបានចូលមកក្នុងប្រទេសកម្ពុជាក្នុងអំឡុងពេលនៃរបបខ្មែរក្រហមនៅខែធ្នូឆ្នាំ១៩៧៨ជាមួយនឹងអ្នកកាសែតបរទេសម្នាក់ទៀតដែលពួកខ្មែរក្រហមអនុញ្ញាតឲ្យចូលក្នុងប្រទេសកម្ពុជាដោយសារតែយល់ថាអ្នកកាសែតទាំងនោះបានគាំទ្រនូវរបបថ្មីរបស់ពួកគេ។នៅក្នុងពេលនោះលោកស្រីបានជួបសម្ភាសន៍ជាមួយប៉ុល ពត បងធំទី១និងជាមេស្ថាបនិករបបខ្មែរក្រហមនៅពេលដែលប៉ុល ពតស្ថិតក្នុងអំណាច។
លោក ឡាស អលសិន បញ្ជាក់ថាការផ្តល់សក្ខីកម្មរបស់អ្នកស្រីនឹងផ្តល់សារៈសំខាន់ដល់ដំណើរការនីតិវិធីរបស់តុលាការ។
«លោកស្រីអេលីហ្សាបែត បេកឃើ បានសរសេរសៀវភៅអំពីរបបខ្មែរក្រហមជាច្រើន។ ខ្ញុំប្រាកដថាវាមានសារៈសំខាន់ក្នុងចំណោមភាគីនានានិងសារៈសំខាន់សម្រាប់នីតិវិធីដើម្បីចោទជាសំណួរទាក់ទងនឹងអ្វីដែលលោកស្រីបានឃើញក្នុងរបបខ្មែរក្រហម»។
ពួកខ្មែរក្រហមបានឡើងកាន់អំណាចនៅថ្ងៃទី១៧ខែមេសាឆ្នាំ១៩៧៥និងបានដួលរលំអំណាចទៅវិញនៅថ្ងៃទី៧ខែមករាឆ្នាំ១៩៧៩។ ក្នុងរយៈពេលជិតបួនឆ្នាំក្រោមការគ្រប់គ្រងអំណាចរបស់របបកុម្មុយនិស្តបែបម៉ៅនិយមមួយនេះមានប្រជាពលរដ្ឋកម្ពុជាយ៉ាងតិច១,៧លាននាក់បានស្លាប់និងត្រូវបានសម្លាប់។ បច្ចុប្បន្នអ្នកទទួលខុសត្រូវខ្ពស់បំផុតនៃរបបឃោរឃៅនេះចំនួនពីរនាក់គឺនួន ជានិងខៀវ សំផន កំពុងស្ថិតក្រោមការកាត់ទោស។
លោកស្រីអេលីហ្សាបែត បេកឃើ ក្រោយមកបានធ្វើជាអ្នកឆ្លើយឆ្លងសម្រាប់កាសែតThe New York Times។ លោកស្រីបានសរសេរសៀវភៅមួយនិយាយពីរបបខ្មែរក្រហមនៅប្រទេសកម្ពុជា។សៀវភៅបានបោះពុម្ពនៅឆ្នាំ១៩៨៦មានចំណងជើងថា«នៅពេលដែលសង្គ្រាមបានបញ្ចប់» «When the War was Over»។
លោក ឆាំង យុ នាយកមជ្ឈមណ្ឌលឯកសារកម្ពុជាដែលជាមណ្ឌលឯកសារស្រាវជ្រាវលើរបបខ្មែរក្រហមដ៏ធំមួយនៅកម្ពុជាមានប្រសាសន៍ថាលោកស្រីបេកឃើ ជាសាក្សីមានសារៈសំខាន់មួយរូប។
«គាត់ជាអ្នកដែលបានមកក្នុងរបបខ្មែរក្រហមក្នុងពេលដែលខ្មែរក្រហមកាន់កាប់អំណាច។ ដូច្នេះខ្ញុំគិតថាវាផ្តល់ជាទម្ងន់មួយដល់សំណុំរឿងទាំងមូលពីព្រោះគាត់បានឃើញជាក់ស្តែង។បានមកដល់ទីក្រុងភ្នំពេញ។វាមានសារៈសំខាន់ព្រោះព័ត៌មានខ្លះដែលយើងមិនបានឃើញផ្ទាល់ជាពិសេសចំពោះថ្នាក់លើ ដូច្នេះខ្ញុំគិតថាការយកគាត់មកធ្វើជាសាក្សីមានសារប្រយោជន៍»។
សាលាក្តីខ្មែរក្រហមបានអញ្ជើញអ្នកជំនាញការបរទេសមួយចំនួនឲ្យផ្តល់សក្ខីកម្មនាពេលកន្លងមកក្នុងប្រយោជន៍បំពេញបន្ថែមនូវការពិតដែលជនទាំងនោះបានជួបប្រទះឬបានស្រាវជ្រាវឃើញ។
យ៉ាងណាក៏ដោយបើតាមលោកឆាំង យុ លោកស្រីអេលីហ្សាបែត បេកឃើ មិនមែនជាអ្នកកាសែតតែម្នាក់នោះទេដែលត្រូវបានអនុញ្ញាតឲ្យចូលក្នុងប្រទេសកម្ពុជាក្នុងរបបខ្មែរក្រហម។អ្នកកាសែតដទៃទៀតមានដូចជាអ្នកកាសែតវៀតណាមនិងអ្នកកាសែតស៊ុយអែដ ជាដើម៕
