ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុម​អតីត​មន្ត្រី​អាមេរិក​ប្រឆាំង​របាយការណ៍​រដ្ឋបាល​លោក Trump ដែល​ភ្ជាប់​បញ្ហា​ភេរវកម្ម​ជាមួយ​នឹង​អន្តោប្រវេសន៍


លោក​រដ្ឋមន្ត្រី​យុត្តិធម៌​អាមេរិក Jeff Sessions ថ្លែង​នៅ​ក្នុង​ក្រុង​កិច្ចប្រជុំ​មួយ​របស់​គណៈកម្មាការ​សហព័ន្ធ​ស្តី​ពី​សុវត្ថិភាព​សាលារៀន កាលពី​ថ្ងៃទី១៦ ខែសីហា ឆ្នាំ២០១៨ ក្នុង​រដ្ឋធានី​វ៉ាស៊ីនតោន។

អតីត​មន្ត្រី​ផ្នែក​សន្តិសុខ​ជាតិ​អាមេរិក​មួយ​ក្រុម​មាន​ប្រតិកម្ម​ប្រឆាំង​ទៅ​នឹង​របាយការណ៍​ដ៏​ចម្រូងចម្រាស​របស់​រដ្ឋបាល​លោក​ប្រធានាធិបតី Donald Trump អំពី​ទំនាក់ទំនង​រវាង​អំពើ​ភេរវកម្ម​និង​បញ្ហា​អន្តោប្រវេសន៍។ ក្រុម​អតីត​មន្ត្រី​ទាំង​នោះ​បាន​និយាយ​ថា របាយការណ៍​នេះ​បង្ហាញ​មិន​ត្រឹមត្រូវ​ឲ្យ​គេ​យល់​ឃើញ​ថា ជន​អន្តោប្រវេសន៍​ជា​អ្នក​ទទួល​ខុសត្រូវ​ចំពោះ​ការ​វាយប្រហារ​ភេរវកម្ម​ភាគ​ច្រើន​នៅ​ក្នុង​សហរដ្ឋ​អាមេរិក។

នៅ​ក្នុង​លិខិត​មួយ​ច្បាប់​ដែល​ផ្ញើ​ទៅ​កាន់​រដ្ឋមន្ត្រី​ក្រសួង​យុត្តិធម៌​សហរដ្ឋ​អាមេរិក​លោក Jeff Sessions និង​រដ្ឋមន្ត្រី​ក្រសួង​សន្តិសុខ​មាតុភូមិ​លោកស្រី Kirstjen Nielsen កាល​ពី​ពេល​ថ្មីៗ​នេះ មន្ត្រី​នានា​ដែល​ក្នុង​នោះ​មាន​ទាំង​លោក James Clapper អតីត​នាយក​ផ្នែក​ស៊ើបការណ៍​សម្ងាត់​ជាតិ និង​លោក Richard Clarke អតីត​មន្ត្រី​ប្រឆាំង​ភេរវកម្ម​ប្រចាំ​សេតវិមាន​ផង​ដែរ បាន​សម្ដែង​ការ​ព្រួយ​បារម្ភ​អំពី «ការ​លើក​ឡើង​មិន​ត្រឹម​ត្រូវ​និង​ការ​មិន​ដាក់​បញ្ចូល​នូវ​ព័ត៌មាន​មួយ​ចំនួន» នៅ​ក្នុង​របាយការណ៍​របស់​សេតវិមាន​ដែល​បាន​ចេញ​ផ្សាយ​កាល​ពី​ខែ​មករា ឆ្នាំ ២០១៨ កន្លង​ទៅ​នេះ និង​បាន​ជំរុញ​រដ្ឋបាល​លោក Trump ឲ្យ​ដោះស្រាយ​ចម្ងល់​ទាំង​នេះ។

អតីត​មន្ត្រី ១៨ រូប​ដែល​ធ្លាប់​បម្រើ​ការ​ទាំង​ក្នុង​រដ្ឋាភិបាល​អាមេរិក​គ្រប់គ្រង​ដោយ​គណបក្ស​ប្រជាធិបតេយ្យ និង​រដ្ឋាភិបាល​អាមេរិក​ដែល​គ្រប់គ្រង​ដោយ​គណបក្ស​សាធារណរដ្ឋ បាន​សរសេរ​នៅ​ក្នុង​លិខិត​នោះ​យ៉ាង​ដូច្នេះ​ថា៖ «ជា​ទូទៅ របាយការណ៍​នេះ​ទំនង​ជា​ត្រូវ​បាន​បង្កើត​ឡើង​ដោយ​ធ្វើ​ឲ្យ​សាធារណជន​យល់​ច្រឡំ​ថា ជន​អន្តោប្រវេសន៍​និង​សូម្បី​តែ​សមាជិក​ក្រុម​គ្រួសារ​របស់​ពួកគេ​ដែល​មាន​សញ្ជាតិ​អាមេរិក គឺ​ជា​អ្នក​ទទួលខុស​ត្រូវ​ចំពោះ​ការ​វាយ​ប្រហារ​ភេរវកម្ម​ភាគ​ច្រើន​ដែល​បាន​កើត​ឡើង​នៅ​ក្នុង​សហរដ្ឋ​អាមេរិក ខណៈ​ដែល​ការ​ស្រាវជ្រាវ​ស្ថិតិ​និង​បទ​ពិសោធ​របស់​យើង​កន្លង​មក បាន​បង្ហាញ​ថា មិន​មាន​ការ​ជាប់​ទាក់ទង​គ្នា​ណា​មួយ​រវាង «ភាព​ជា​ជន​បរទេស» និង​សកម្មភាព​ភេរវកម្ម​ក្នុង​រយៈពេល ១៥ ឆ្នាំ​កន្លង​មក​នេះ​ទេ»។

របាយការណ៍​នេះ​ត្រូវ​បាន​ចេញ​ផ្សាយ​ដោយ​ក្រសួង​យុត្តិធម៌ និង​ក្រសួង​សន្តិសុខ​មាតុភូមិ។របាយការណ៍​នេះ​បាន​ឲ្យ​ដឹង​ថា បុគ្គល ៣ នាក់​ក្នុង​ចំណោម ៤ នាក់​ដែល​ត្រូវ​បាន​កាត់ទោស​ពី​បទ​ចោទ​ប្រកាន់​ពាក់ព័ន្ធ​នឹង​អំពើ​ភេរវកម្ម​អន្តរជាតិ​ចាប់​តាំង​ពី​មាន​ការ​វាយ​ប្រហារ​ថ្ងៃ​ទី ១១ ខែ​កញ្ញា ឆ្នាំ ២០០១ មក គឺ​ជា​ជន​ដែល​កើត​នៅ​បរទេស។

លោក​ប្រធានាធិបតី Donald Trump បាន​បញ្ជា​ឲ្យ​ចេញ​របាយការណ៍​នេះ​ឡើង​ដែល​ជា​ផ្នែក​មួយ​នៃ​បទ​បញ្ជា​ហាម​ឃាត់​ការ​ធ្វើ​ដំណើរ​របស់​លោក​កាល​ពី​ខែ​មីនា ឆ្នាំ ២០១៧ ដែល​បទ​បញ្ជា​នោះ​ហាម​ឃាត់​ប្រជាពលរដ្ឋ​នៃ​ប្រទេស​មាន​អ្នក​កាន់​សាសនា​ឥស្លាម​ច្រើន​ជាង​គេ​បំផុត​ចំនួន ៦ ប្រទេស​មិន​ឲ្យ​ធ្វើ​ដំណើរ​មក​កាន់​សហរដ្ឋ​អាមេរិក។ បទបញ្ជា​ហាម​ឃាត់​ការ​ធ្វើ​ដំណើរ​នេះ​បាន​ស្នើ​ឲ្យ​ចេញ​ផ្សាយ​នូវ​របាយការណ៍​ជា​លើក​ដំបូង​មួយ​ស្ដី​ពី «ជន​បរទេស» នៅ​ក្នុង​សហរដ្ឋ​អាមេរិក​ដែល​ត្រូវ​បាន​ចោទ​ប្រកាន់​ពី​បទ​ល្មើស​ទាក់ទង​នឹង​អំពើ​ភេរវកម្ម​នៅ​ក្នុង​សហរដ្ឋ​អាមេរិក។

តែ​ផ្ទុយ​ទៅ​វិញ របាយការណ៍​នេះ​បែរ​ជា​ផ្ដោត​ទៅ​លើ​ជន​ជាប់​ចោទ​ផ្នែក​ភេរវកម្ម​ដែល​ជា «អ្នក​ដែល​កើត​នៅ​បរទេស» ទៅ​វិញ ដែល​នេះ​គឺ​ជា​ផ្នែក​ដ៏​ទូលំទូលាយ​មួយ​ដែល​រួម​បញ្ចូល​ទាំង​ពលរដ្ឋ​អាមេរិក​ដែល​កើត​នៅ​បរទេស​ចំនួន ១៤៨ នាក់ ព្រម​ទាំង​ជន​សង្ស័យ​ភេរវកម្ម​ដែល​ជា​ជន​បរទេស​ដែល​ត្រូវ​បាន​បញ្ជូន​មក​កាន់​សហរដ្ឋ​អាមេរិក​ដើម្បី​កាត់​ទោស​ពី​បទ​ឧក្រិដ្ឋកម្ម​ដែល​ជន​ទាំង​នោះ​បាន​ប្រព្រឹត្ត​នៅ​ឯ​ក្រៅ​ប្រទេស​ផង​ដែរ។

របាយការណ៍​នេះ​បាន​បង្ហាញ​ថា មនុស្ស ៤០២ នាក់​ក្នុង​ចំណោម ៥៤៩ នាក់​ដែល​ត្រូវ​បាន​ផ្ដន្ទាទោស​ពី​បទ​ចោទ​ប្រកាន់​ភេរវកម្ម​នៅ​ក្នុង​សហរដ្ឋ​អាមេរិក​រវាង​ថ្ងៃ​ទី ១១ ខែ​កញ្ញា ឆ្នាំ ២០០១ និង​ថ្ងៃ​ទី ៣១ ខែ​ធ្នូ ឆ្នាំ ២០១៦ គឺ​ជា​អ្នក​ដែល​កើត​នៅ​បរទេស។

ក្រុម​អ្នក​រិះគន់​បាន​រិះគន់​របាយការណ៍​នេះ​ថា បាន​និយាយ​បំផ្លើស​អំពី​ការ​គំរាម​កំហែង​នៃ​អំពើ​ភេរវកម្ម​ដែល​បង្ក​ឡើង​ដោយ​ជន​បរទេស ដោយ​ប្រើ​ពាក្យ «អ្នក​កើត​នៅ​បរទេស» ជំនួស​ឲ្យ​ពាក្យ «ជន​បរទេស» ទៅ​វិញ។

ក្រុម​អ្នក​រិះគន់​ទាំង​នេះ​បាន​និយាយ​ថា ប្រសិនបើ​របាយការណ៍​នេះ​មិន​ជំនួស​ពាក្យ​នេះ​ទេ នោះ​របាយការណ៍​នេះ​ប្រហែល​ជា​នឹង​បង្ហាញ​ថា មាន​ករណី​ផ្ដន្ទាទោស​ភេរវកម្ម​តិច​ជាង​ពាក់​កណ្ដាល​តែ​ប៉ុណ្ណោះ​ដែល​បាន​ប្រព្រឹត្តិ​ឡើង​ដោយ​ជន​បរទេស។

លោក Matt Olsen អតីត​នាយក​មជ្ឈមណ្ឌល​ប្រឆាំង​ភេរវកម្ម​ជាតិ​បាន​ប្រាប់ VOA ថា៖ «អ្វី​ដែល​យើង​បាន​ឃើញ​ចេញ​ពី​ក្រសួង​សន្តិសុខ​មាតុភូមិ​នេះ គឺ​ជា​រឿង​មិន​ពិត និង​ខុស​ទាំង​ស្រុង»។ លោក Olsen ដែល​ជា​មន្ត្រី​មួយ​រូប​ក្នុង​ចំណោម​មន្ត្រី​ដែល​បាន​ចុះហត្ថលេខា​លើ​លិខិត​នោះ បាន​អះអាង​ថា៖ «របាយការណ៍​នេះ​មិន​ត្រឹម​តែ​ខុស​ទាក់ទិន​នឹង​ពាក្យពេចន៍​ដែល​បាន​ប្រើ​នោះ​ទេ ប៉ុន្តែ​វា​ក៏​បង្ហាញ​ពី​ទិដ្ឋភាព​មិន​ត្រឹមត្រូវ​មួយ​អំពី​អ្នក​ដែល​ទទួល​ខុស​ត្រូវ​ចំពោះ​អំពើ​ភេរវកម្ម​ផង​ដែរ។

របាយការណ៍​នេះ​គួរតែ​ផ្ដោត​លើ​អ្នក​ដែល​មាន​គំនិត​ជ្រុល​និយម មិន​មែន​លើ​ប្រទេស​ដែល​ពួក​គេ​កើត​នោះ​ទេ»។ របាយការណ៍​នេះ​បាន​ធ្វើ​ឲ្យ​អង្គការ​សិទ្ធិ​មនុស្ស ៣ ដាក់​ពាក្យ​បណ្ដឹង​ជា​ផ្លូវការ។

អង្គការ​ទាំង​នោះ​គឺ​អង្គការ Muslim Advocates អង្គការ Protect Democracy និង​អង្គការ Brennan Center for Justice ដោយ​ដំបូង​បាន​ដាក់​ញត្តិ​ស្នើ​ក្រសួង​យុត្តិធម៌ និង​ក្រសួង​សន្តិសុខ​មាតុភូមិ​ឲ្យ​កែ​តម្រូវ ឬ​ដក​របាយការណ៍​នេះ​ចេញ ប៉ុន្តែ​ក្រោយ​មក​បាន​ប្ដឹង​ក្រសួង​ទាំង​ពីរ​នេះ​ពី​បទ​រំលោភ​ច្បាប់​ស្ដី​ពី​គុណភាព​ព័ត៌មាន ដែល​ជា​ច្បាប់​មួយ​តម្រូវ​ឲ្យ​របាយការណ៍​ដែល​ចេញ​ដោយ​រដ្ឋាភិបាល​ឲ្យ​បំពេញ​តាម​ស្តង់ដារ​នៃ «អត្ថប្រយោជន៍ ភាព​មិន​លម្អៀង និង​សុចរិត​ភាព»។

មន្ត្រី​ក្រសួង​យុត្តិធម៌ និង​មន្ត្រី​ក្រសួង​សន្តិសុខ​មាតុភូមិ​បាន​ឆ្លើយ​តប​កាល​ពី​ពេលថ្មីៗ​នេះ​ចំពោះ​អង្គការ​ទាំង​នោះ​ថា គ្មាន​ហេតុផល​ណា​មួយ​ដែល​ពួកគេ​ត្រូវ​កែ​តម្រូវ ឬ​ដក​របាយការណ៍​នេះ​ចេញ​នោះ​ទេ​នៅ​ក្រោម​ច្បាប់​ស្ដី​ពី​គុណភាព​ព័ត៌មាន​នេះ។ ក្រុម​អង្គការ​សិទ្ធិ​មនុស្ស​ទាំង​នេះ​បាន​ប្ដឹង​ឧទ្ធរណ៍​ចំពោះ​ការ​សម្រេច​របស់​ទីភ្នាក់ងារ​នេះ​កាល​ពី​ថ្ងៃ​ទី ១៣ ខែ​កញ្ញា​កន្លង​ទៅ​នេះ ដោយ​មាន​ការ​គាំទ្រ​ពី​អតីត​មន្ត្រី​ផ្នែក​សន្តិសុខ​នានា។

ដោយ​ហៅ​របាយការណ៍​នេះ​ថា «នាំ​ឲ្យ​មាន​ការ​ភ័ន្ត​ច្រឡំ» អតីត​មន្ត្រី​ទាំងនោះ​បាន​ជំរុញ​ក្រសួង​សន្តិសុខ​មាតុភូមិ និង​ក្រសួង​យុត្តិធម៌​ឲ្យ «ពិចារណា​ឡើង​វិញ​នូវ​ការ​ឆ្លើយ​តប​របស់​ពួកគេ​ចំពោះ​ចម្ងល់» អំពី​របាយការណ៍​នេះ។

អ្នក​នាំ​ពាក្យ​ក្រសួង​យុត្តិធម៌​បាន​បដិសេធ​មិន​ធ្វើ​អត្ថាធិប្បាយ​ចំពោះ​រឿង​នេះ។

លោក​ស្រី Katie Waldman អ្នក​នាំ​ពាក្យ​ក្រសួង​សន្តិសុខ​មាតុភូមិ បាន​បញ្ជាក់​តាម​រយៈ​អ៊ីមែល​មក​ថា៖ «យើង​មិន​អាច​មើល​លើ​សកម្មភាព​ប្រឆាំង​ភេរវកម្ម​ដោយ​ផ្ដោត​លើ​ព្រឹត្តិការណ៍​មុន​ថ្ងៃ​ទី ៩ ខែ​កញ្ញា ឆ្នាំ ២០០១ នោះ​បាន​ទេ។ ក្រសួង​សន្តិសុខ​មាតុភូមិ​បាន​ប្រើ​ទិន្នន័យ​ប្រវត្តិសាស្ត្រ​ដើម្បី​ឈាន​ទៅ​ដល់​ការ​វាយ​តម្លៃ​នេះ ប៉ុន្តែ​ប្រសិន​បើ​យើង​គ្រាន់​តែ​សម្លឹង​មើល​លើ​អ្វី​ដែល​ពួក​ភេរវជន​បាន​ធ្វើ​កាល​ពី​អតីតកាល យើង​នឹង​មិន​អាច​ទប់​ស្កាត់​សកម្មភាព​វាយ​ប្រហារ​ភេរវកម្ម​នា​ពេល​អនាគត​បាន​ទេ»។

លោក Sirine Shebaya មេធាវី​ជាន់ខ្ពស់​នៃ​អង្គការ Muslim Advocates បាន​និយាយ​ថា ក្រសួង​ទាំង​នេះ​ទំនងជា​នឹង​បដិសេធ​សំណើ​របស់​ពួកគេ​ម្ដង​ទៀត។ លោក Sirine Shebaya បាន​និយាយ​យ៉ាង​ដូច្នេះ​ថា៖ «យើង​សង្ឃឹម​ថា ក្រសួង​សន្តិសុខ​មាតុភូមិ និង​ក្រសួង​យុត្តិធម៌​នឹង​ពិនិត្យ​មើល​ឡើង​វិញ​លើ​របាយការណ៍​ទាំង​នេះ ហើយ​នឹង​កែ​តម្រូវ ឫ​ក៏​ដក​របាយការណ៍​ទាំង​នេះ​ចេញ។

អ្វី​ដែល​ទំនង​ជា​នឹង​កើត​ឡើង​បន្ថែម​ទៀត​នោះ​គឺ​ថា យើង​នឹង​រង់ចាំ​ការ​ឆ្លើយតប​របស់​ក្រសួង​ទាំង​នោះ។ ហើយ​ប្រសិនបើ​ការ​ឆ្លើយតប​របស់​ពួកគេ​មិន​ធ្វើ​ឲ្យ​ពួក​យើង​ពេញ​ចិត្ត​នោះ​ទេ ពួក​យើង​នឹង​ប្ដឹង​ទៅ​តុលាការ​ម្ដង​ទៀត»៕

ប្រែ​សម្រួល​ដោយ ហេង រស្មី

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG