អតីតបក្សប្រឆាំង បានតវ៉ាទៅអង្គការសហប្រជាជាតិ និងសហគមន៍អឺរ៉ុបក្នុងករណីធ្វើទុក្ខបុកម្នេញអតីតសកម្មជនដ៏លេចធ្លោចំនួនពីររូបទាំងនៅក្នុងសកម្មភាពនយោបាយ និងការងារ។
នៅក្នុងលិខិតទៅអ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិ និងតំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេសដែល VOA ទទួលបាននៅថ្ងៃច័ន្ទនេះ លោកស្រី មូរ សុខហួរអនុប្រធានគណបក្សសង្រ្គោះជាតិ បានរៀបរាប់ពីការធ្វើទុក្ខលើលោក ថៃ ទឹម និងលោក ស៊ុន ធន់ អតីតសមាជិកក្រុមប្រឹក្សាខេត្តរបស់គណបក្ស និងជាគ្រូបង្រៀននៅក្នុងខេត្តកំពង់ធំ ដើម្បីឱ្យអ្នកទាំងពីរចុះចូលជាមួយនឹងគណបក្សកាន់អំណាច និងបដិសេធចោលការធ្វើសកម្មភាពជាមួយនឹងអតីតបក្សប្រឆាំងចាប់ពីដំណាច់ខែមិថុនាតទៅ។
លោកស្រីមូរ សុខហួរបានបន្ថែមថា៖
«យើងមានភស្តុតាងច្បាស់ដែលថាលោកអភិបាលខេត្តបានបញ្ជាឱ្យការិយាល័យអប់រំស្រុកបណ្តេញលោកគ្រូទាំងពីរ។ ពួកគេត្រូវបានទម្លាក់ឋានៈនិងតួនាទីចាប់តាំងពីគណបក្សសង្គ្រោះជាតិត្រូវបានរំលាយក្នុងឆ្នាំ២០១៧»។
តាមសេចក្តីរាយការណ៍សារព័ត៌មាននានាឱ្យដឹងថា លោកស៊ុន ធន់ ត្រូវបានជនមិនស្គាល់ឈ្មោះចំនួនបួននាក់វាយធ្វើបាបកាលពីថ្ងៃទី២៨ខែមិថុនា ហើយត្រូវប៉ូលិសឃាត់ខ្លួនជាច្រើនថ្ងៃដោយមិនឱ្យគ្រួសារទៅជួបទេមុននឹងដោះលែងមកវិញ។
លោក ស៊ុន ធន់ ក៏ជាអ្នកដែលតែងតែចូលរួមបញ្ចេញមតិជាប្រចាំនៅវេទិកាពិភាក្សាតាមវិទ្យុរបស់ VOA ផងដែរ។
អាជ្ញាធរកម្ពុជានៅមិនទាន់មានការឆ្លើយតបយ៉ាងណាពីការចោទប្រកាន់នេះនៅឡើយទេ។
សម្ពាធមកលើអ្នកគាំទ្រអតីតបក្សប្រឆាំងបានកើនឡើងបន្ទាប់ពីលោក សម រង្ស៊ីប្រធានស្តីទី គណបក្ស បានប្រកាសពីគម្រោងវិលត្រឡប់ចូលប្រទេសវិញនៅចុងឆ្នាំនេះ ដើម្បីបន្តជីវភាពនយោបាយនៅក្នុងប្រទេស បន្ទាប់ពីរស់នៅនីរទេសខ្លួនអស់ជាងពីរឆ្នាំ៕
