នៅក្នុងចំណាត់ការជាប្រវត្តិសាស្រ្តមួយ អង្គការពាណិជ្ជកម្មពិភពលោក (World Trade Organization) បានជ្រើសតាំងស្រ្តីនិងជនជាតិអាហ្វ្រិកដំបូងគេបង្អស់ដើម្បីដឹកនាំអង្គការពិភពលោកមួយនេះ។
អ្នកជំនាញសេដ្ឋកិច្ចជនជាតិនីហ្សេរីយ៉ាលោកស្រី Ngozi Okonjo-Iweala អាយុ ៦៦ឆ្នាំ ត្រូវបានជ្រើសរើសជាអគ្គនាយិកាអង្គការពាណិជ្ជកម្មពិភពលោកកាលពីថ្ងៃចន្ទ ទី១៥ ខែកុម្ភៈ ឆ្នាំ២០២១ ដោយតំណាងពីប្រទេសចំនួន ១៦៤ ដែលជាសមាជិករបស់អង្គការនេះ។
លោកស្រី Okonjo-Iweala បាននិយាយនៅអំឡុងពេលសន្និសីទសារព័ត៌មានកាលពីថ្ងៃចន្ទថា លោកស្រី ពិតជាចង់ចាប់ផ្តើមធ្វើការកែទម្រង់អង្គការពាណិជ្ជកម្មពិភពលោក និងធ្វើបច្ចុប្បន្នភាពលើគោលការណ៍ផ្សេងៗដើម្បីសម្របនឹងបញ្ហានៅសតវត្សរ៍ទី២១។
លោកស្រីបានថ្លែងថា៖ «ខ្ញុំ មានក្តីសោមនស្សចំពោះជំនឿទុកចិត្តដែលអ្នកមានមកលើរូបខ្ញុំ មិនមែនគ្រាន់តែដោយសារខ្ញុំជាស្រ្តី និងជាជនជាតិអាហ្វ្រិកប៉ុណ្ណោះទេ ប៉ុន្តែមកលើចំណេះដឹង និងបទពិសោធន៍របស់ខ្ញុំ។ ហើយដូចអ្នកខ្លះបានលើកឡើងរួចហើយ គឺគួបផ្សំសេចក្តីក្លាហាន និងឆន្ទៈនៅក្នុងការធ្វើការជាមួយអ្នកទាំងអស់គ្នាដើម្បីធ្វើកំណែទម្រង់ធំៗដែលអង្គការពាណិជ្ជកម្មពិភពលោកត្រូវការដើម្បីរៀបចំគោលជំហររបស់ខ្លួនឡើងវិញសម្រាប់ពេលអនាគត»។
លោកស្រីបានបន្តថា ការងារអាទិភាពរបស់លោកស្រី គឺផ្តោតលើបញ្ហាជំងឺកូវីដ១៩ រួមមានការធ្វើការជាមួយកម្មវិធី COVAX និងវិធានការណ៍ពន្លឿនរបស់អង្គការសុខភាពពិភពលោក ACT Accelerator ដើម្បីពន្លឿនការផ្គត់ផ្គង់ និងការចាក់វ៉ាក់សាំងដល់ពលរដ្ឋនៅតាមណ្តាប្រទេសក្រីក្រនានា។
លោកស្រីបានថ្លែងទៀតថា៖ «យើងក៏ជំរុញការងារស្រាវជ្រាវ ដែលនេះជាអ្វីខ្ញុំហៅថាជាមធ្យោបាយទីបី ដែលវ៉ាក់សាំងអាចត្រូវបានផលិតនៅតាមបណ្តាប្រទេសជាច្រើនថែមទៀត ខណៈត្រូវយកចិត្តទុកដាក់ផងដែរថា យើងលើកទឹកចិត្តដល់ការស្រាវជ្រាវ និងការច្នៃប្រឌិតណា ដែលផ្សារភ្ជាប់ទៅនឹងកម្មសិទ្ធិបញ្ញា។ នេះ គឺជាការងារដែលយើងត្រូវផ្តោតការយកចិត្តទុកដាក់»។
ការជ្រើសតាំងលោកស្រី Okonjo-Iweala ជាប្រធានអង្គការពាណិជ្ជកម្មពិភពលោកត្រូវបានពន្យារពេលអស់ជាច្រើនខែ ដោយសារអតីតប្រធានាធិបតីអាមេរិកលោក Donald Trump មិនគាំទ្របេក្ខភាពរបស់លោកស្រី ដោយអះអាងថា លោកស្រីខ្វះបទពិសោធន៍ផ្នែកពាណិជ្ជកម្មផ្ទាល់ បើប្រៀបជាមួយនឹងបេក្ខជនដទៃទៀត។
រដ្ឋបាលលោកប្រធានាធិបតី Joe Biden បានទម្លាក់ចោលការបដិសេធរបស់សហរដ្ឋអាមេរិក និងបានត្រួសត្រាយផ្លូវឲ្យលោកស្រី Okonjo-Iweala ទទួលបានការងារជាប្រធានអង្គការពាណិជ្ជកម្មពិភពលោកមួយនេះ។
អ្នកជំនាញសេដ្ឋកិច្ចជនជាតិនីហ្សេរីយ៉ារូបនេះ ធ្លាប់បម្រើការជាបុគ្គលិកអស់រយៈពេល ២៥ឆ្នាំនៅធនាគារពិភពលោក ជាកន្លែងដែលលោកស្រីជួយជ្រោមជ្រែងដើម្បីបុព្វហេតុកំណើនសេដ្ឋកិច្ចនៅតាមបណ្តាប្រទេសក្រីក្រ។ បន្ទាប់មក លោកស្រីបានទទួលតំណែងធំបំផុតទីពីរនៅធនាគារពិភពលោក ដែលសម្រាប់តំណែងនេះ លោកស្រីត្រូវទទូលបន្ទុកលើការផ្តល់ហិរញ្ញប្បទានចំនួន ៨១ពាន់លានដុល្លារសម្រាប់ទ្វីបអាហ្វ្រិក អាស៊ីខាងត្បូង អឺរ៉ុប និងអាស៊ីភាគកណ្តាល។
នៅឆ្នាំ ២០១២ លោកស្រីបានទទួលបរាជ័យនៅក្នុងកិច្ចប្រឹងប្រែងដើម្បីទទួលបានតំណែងកំពូលនៅធនាគារពិភពលោក ដោយសារតែទម្លាប់ពីមុនមកធនាគារពិភពលោកតែងតែត្រូវស្ថិតក្រោមការដឹកនាំរបស់ជនជាតិអាមេរិកាំង។
លោកស្រី Okonjo-Iweala ក៏ធ្លាប់បានបម្រើការជារដ្ឋមន្រ្តីក្រសួងហិរញ្ញវត្ថុនីហ្សេរីយ៉ាផងដែរ និងបានជួយសម្របសម្រួលកិច្ចព្រមព្រៀងនៅឆ្នាំ២០០៥ ដើម្បីលុបចោលបំណុលរាប់ពាន់លានដុល្លាររបស់ប្រទេសនីហ្សេរីយ៉ាជាមួយនឹងក្រុមបណ្តាប្រទេសផ្តល់ឥណទាន Paris Club។
លោកស្រីទទួលបានបរិញ្ញាប័ត្រផ្នែកសេដ្ឋកិច្ចពីសាកលវិទ្យាល័យ Harvard និងសញ្ញាប័ត្រថ្នាក់បណ្ឌិតផ្នែកសេដ្ឋកិច្ច និងការអភិវឌ្ឍក្នុងតំបន់ពីសាកលវិទ្យាល័យ Massachusetts Institute of Technology (MIT)។
ប្រធានាធិបតីនីហ្សេរីយ៉ាលោក Muhammadu Buhari បាននិយាយថា ការបោះឆ្នោតជ្រើសតាំងលោកស្រី Okonjo-Iweala ដើម្បីដឹកនាំអង្គការពាណិជ្ជកម្មពិភពលោកនាំមកនូវ «ក្តីសប្បាយរីករាយ និងកិត្តិយសកាន់តែច្រើនសម្រាប់ប្រទេសនីហ្សេរីយ៉ា»។
លោកស្រី Okonjo-Iweala បានលើកឡើងកាលពីថ្ងៃចន្ទថា អង្គការពាណិជ្ជកម្មពិភពលោក កំពុងប្រឈមនឹងបញ្ហាជាច្រើន និងជាបញ្ហាស្មុគស្មាញ ប៉ុន្តែមិនមែនមិនអាចដោះស្រាយបាននោះទេ។
បន្ថែមពីលើការដោះស្រាយបញ្ហាប្រឈមផ្នែកសេដ្ឋកិច្ចជុំវិញការរាតត្បាតវីរុសកូរ៉ូណា ប្រធានអង្គការពាណិជ្ជកម្មពិភពលោកថ្មីរូបនេះ ត្រូវដោះស្រាយបញ្ហាពាក់ព័ន្ធនឹងពាណិជ្ជកម្ម ដែលកើតឡើងជាយូរមកហើយដែលបានធ្វើឲ្យបណ្តាប្រទេសមួយចំនួនខ្វែងគំនិតគ្នា រួមមានជម្លោះពាណិជ្ជកម្មរវាងសហរដ្ឋអាមេរិក និងចិន ក៏ដូចជា សម្ពាធលើការកែទម្រង់ច្បាប់ពាណិជ្ជកម្មជាដើម៕
ប្រែសម្រួលដោយលោក ណឹម សុភ័ក្រ្តបញ្ញា
