នៅពេលការបោះឆ្នោតជាតិថ្ងៃទី២៣ ខែកក្កដា កំពុងខិតចូលមកដល់នោះ អ្នកបោះឆ្នោតវ័យក្មេងមួយចំនួន បានបង្ហាញពីក្តីរំពឹងថា រដ្ឋាភិបាលថ្មីនឹងបន្តគិតគូរដល់ការបង្កើតការងារជូនកម្លាំងពលកម្មដែលជានិសិ្សតទើបបញ្ចប់ការសិក្សា និងដោះស្រាយបញ្ហាប្រឈមផ្សេងៗទៀតដូចជាការជន់លិចផ្នែកខ្លះនៅទីក្រុងភ្នំពេញពេលរដូវវស្សាចូលមកដល់។ ពួកគេក៏បង្ហាញសុទិដ្ឋិនិយមថា រដ្ឋាភិបាលថ្មីនឹងបន្តដោះស្រាយជម្លោះដីធ្លី លុបបំបាត់អំពើពុករលួយ ក៏ដូចជារកទីផ្សារកសិកម្មជូនកសិករ។
កញ្ញា ខេន សុវិមាន ជានិស្សិតឆ្នាំទី២ នៅសាកលវិទ្យាល័យភូមិន្ទភ្នំពេញកំពុងមានក្តីបារម្ភចំពោះទីផ្សារការងារនៅពេលបញ្ចប់ការសិក្សា ដូច្នេះហើយកញ្ញាចង់ឃើញរដ្ឋាភិបាលអាណត្តិក្រោយ ផ្តល់អាទិភាពលើការបង្កើតការងារជូនយុវជននៅក្នុងប្រទេស។
កញ្ញាប្រាប់វីអូអេថា៖ «ក្នុងការបោះឆ្នោតហ្នឹងដែរ ខ្ញុំរំពឹងថា រាជរដ្ឋាភិបាលថ្មីគាត់នឹង ជួយបំពេញរាល់ចំណុចខ្វះខាត រាល់ចន្លោះខ្វះខាតនៅក្នុងប្រទេសយើង ហើយនិងជួយឱ្យប្រទេសយើងមានការអភិវឌ្ឍជាដរាបទៅមុខ។ ហើយសម្រាប់ដូចខ្ញុំជាសិស្សនិស្សិតផងដែរ ចង់ឱ្យគាត់ជួយដូចជាផ្តល់ទីផ្សារនៅក្នុងការងារដល់ប្អូនៗសិស្សនិស្សិត»។
ជាពលរដ្ឋរស់នៅក្នុងទីក្រុងភ្នំពេញ កញ្ញា សុវិមាន លើកឡើងពីបញ្ហាប្រឈមមួយចំនួនរបស់អ្នករស់នៅទីក្រុង ដូចជាបញ្ហាចរាចរណ៍ និងប្រព័ន្ធលូបង្ហូរទឹក ដែលកញ្ញាថា គួរមានការកែលម្អ។
កញ្ញាបន្ថែមថា៖ «សម្រាប់ខ្ញុំអ្នកនៅក្នុងទីក្រុងផ្ទាល់ បញ្ហាដែលយើងជួបប្រទះ ភាគច្រើនហ្មងការកកស្ទះ ហើយនិងពេលរដូវភ្លៀង គឺមានការដូចជាភ្លៀងលិចទឹក ពិបាកក្នុងការធ្វើដំណើរ»។
ក្រៅពីនោះ កញ្ញាក៏រំពឹងថារដ្ឋាភិបាលអាណត្តិក្រោយ នឹងប្រឹងប្រែងដោះស្រាយវិវាទដីធ្លីដែលនៅសេសសល់ ឱ្យបានឆាប់រហ័ស ព្រោះកញ្ញាសង្កេតឃើញថា ការតវ៉ារឿងដីធ្លីនៅបន្តកើតមាន។
និស្សិតផ្នែកប្រព័ន្ធផ្សព្វផ្សាយ លោក ភួង ខេមរា អាយុ ២០ឆ្នាំ បង្ហាញក្តីរីករាយដែលបានចូលរួមការបោះឆ្នោត ហើយបានឱ្យដឹងពីក្តីរំពឹងរបស់គាត់ថា ការបង្កើតការងារជារឿងចំាបាច់ដែលរដ្ឋាភិបាលត្រូវធ្វើជូននិស្សិតបញ្ចប់ការសិក្សា និងពលរដ្ឋដើម្បីកាត់បន្ថយការចំណាកស្រុក។
លោកសង្ឃឹមថា រដ្ឋាភិបាលនឹងជួយរក្សាលំនឹងថ្លៃទំនិញលើទីផ្សារដែលបានកើនឡើងនៅក្នុងរយៈពេលប៉ុន្មានឆ្នាំចុងក្រោយនេះ។
លោកថ្លែងថា៖ «មួយទៀត បើសិនជាការដែលយើងមិនដំឡើងតម្លៃទំនិញ គឺជាចំណែកមួយធ្វើឱ្យប្រជាជនគាត់អាចរស់នៅក្នុងប្រទេសបានយ៉ាងសុខស្រួល ដោយមិនមានការភ័យខ្លាចទៅលើការឡើងថ្លៃនូវទំនិញ ហើយគាត់អត់មានប្រាក់ចំណូលដើម្បីទិញទាំងអស់ហ្នឹង។ អ៊ីចឹង បើសិនជារាជរដ្ឋាភិបាល បានដោះស្រាយលើបញ្ហានេះ ខ្ញុំជឿថា ប្រជាជននឹងស្រឡាញ់ នឹងគាំទ្ររាជរដ្ឋាភិបាលអស់ពីកម្លាំងចិត្ត ហើយនិងបោះឆ្នោតជូនពួកគាត់ផងដែរ»។
លោក ប្រាក់កែវ រិទ្ធីឯក អាយុ១៩ឆ្នាំ និស្សិតឆ្នាំទី២ ផ្នែកវិទ្យាសាស្ត្រកំព្យូរទ័រ ដែលបានចុះឈ្មោះសម្រាប់ការបោះឆ្នោតនៅឆ្នាំ២០២៣នេះនិយាយថា មេដឹកនាំជំនាន់ថ្មី អាចមានគោលនយោបាយថ្មីៗ ក្នុងការគ្រប់គ្រងប្រទេស ដើម្បីលុបបំបាត់អំពើពុករលួយ។
លោកប្រាប់វីអូអេថា៖ «ខ្ញុំគិតថា អាចល្អភាគច្រើន ដោយសារតែគិតទៅថារលកក្រោយត្រូវតែច្រានរលកមុខ រលកក្រោយចឹងទៅគាត់អាចល្អជាង។ ឬក៏អាចខ្សោយជាង អាហ្នឹងយើងមើលតាមភាពជាក់ស្តែងដែរ។ ប៉ុន្តែខ្ញុំគិតថា ភាគរយល្អច្រើនជាង ដោយសារគិតថា ជំនាន់ក្រោយយើង យើង familiar ជាមួយគ្រឿងបរិក្ខារទំនើបអស់ហើយ»។
ចំណែកនិសិ្សតឆ្នាំទី២ ផ្នែកប្រព័ន្ធផ្សព្វផ្សាយម្នាក់ទៀត កញ្ញា សុន ស្រីសួគ៌ អាយុ ២០ ឆ្នាំ មើលឃើញទុក្ខលំបាករបស់កសិករ នៅក្នុងការលក់ទិន្នផលដែលប្រមូលបាន។
កញ្ញាប្រាប់វីអូអេថា៖ «សម្រាប់ទៅបោះឆ្នោតលើកហ្នឹង ខ្ញុំរំពឹងថា រដ្ឋាភិបាលក៏នឹងកែតម្រូវនូវវិស័យមួយចំនួន ជាកសិកម្ម គឺខ្ញុំចង់ឱ្យគាត់បង្កើតនូវទីផ្សារ សម្រាប់ប្រជាជនកសិករ ដោយសារឥឡូវហ្នឹង យើងអត់ឃើញមានទីផ្សារច្រើនសម្រាប់ពួកគាត់ ដែលធ្វើឱ្យពួកគាត់ពិបាកក្នុងការដាំដុះ។ នៅពេលដែលដាំដុះហើយ អត់ដឹងយកទៅដាក់លក់ទីតាំងនៅឯណាអ៊ីចឹង។ អ៊ីចឹង អាចបង្កឱ្យពួកគាត់ខូចខាត ហើយធ្វើឱ្យជីវភាពពួកគាត់ធ្លាក់ទៅតាមហ្នឹងដែរអ៊ីចឹងទៅ»។
យុវជនខ្លះទៀត ដែលមានសិទ្ធិបោះឆ្នោត បានមើលឃើញភាពខ្វះចន្លោះនៅក្នុងការបោះឆ្នោត ដែលគ្មានគណបក្សជំទាស់ចូលរួម។ ទោះយ៉ាងណា ពួកគេចង់ឃើញរដ្ឋាភិបាលថ្មីបន្តផ្តល់អាទិភាពខ្ពស់ចំពោះវិស័យអប់រំ ដើម្បីបង្កើនធនធានមនុស្សដែលមានសមត្ថភាពប្រកួតប្រជែងក្នុងទីផ្សារការងារជាមួយបណ្តាប្រទេសផ្សេងទៀត។
និស្សិតឆ្នាំទី៤ ផ្នែកទំនាក់ទំនងអន្តរជាតិក្នុងសាកលវិទ្យាល័យមួយនៅទីក្រុងភ្នំពេញ លោក សែម ជាដារ៉ាវិបុល អាយុ ២២ឆ្នាំ ប្រាប់វីអូអេថា លោកមានអារម្មណ៍រីករាយដែលបានចូលរួមបោះឆ្នោតជាលើកដំបូង ហើយលោករំពឹងថា វិស័យអប់រំនឹងជាកិច្ច ការចម្បងដែលរដ្ឋាភិបាលថ្មីត្រូវយកចិត្តទុកដាក់ ដើម្បីបំពេញតម្រូវការទីផ្សារការងារទាំងក្នុងនិងក្រៅប្រទេស និងរួមចំណែកដល់ការអភិវឌ្ឍប្រទេសជាតិ។
លោកថ្លែងថា៖ «បើសម្រាប់ខ្ញុំផ្ទាល់ ក្នុងនាមខ្ញុំជានិស្សិត អ្វីដែលខ្ញុំចង់ឃើញ ហើយនិងចង់បានជាងគេបំផុត គឺផ្នែកការអប់រំ ខ្ញុំចង់ឱ្យមានការអភិវឌ្ឍ ឬក៏ជំរុញបន្ថែម និងអភិវឌ្ឍបន្ថែមទៅលើប្រព័ន្ធអប់រំរបស់ប្រទេស»។
បើតាមរបាយការណ៍ប្រចាំឆ្នាំ២០២២ ស្តីពីការងាររបស់ក្រសួងការងារ និងបណ្តុះបណ្តាលវិជ្ជាជីវៈ ស្ថានភាពទីផ្សារការងារកម្ពុជាមានភាពរឹងមាំរក្សាបាន អត្រាអ្នកមានការងារធ្វើខ្ពស់ប្រមាណ ៩៩,៣ភាគរយ នៃកម្លាំងពលកម្មសរុបចំនួនប្រមាណ ១០,៨លាននាក់ ក្នុងនោះអ្នកកំពុងធ្វើការក្នុងប្រទេសក្នុងវិស័យឧស្សាហកម្មចំនួន ២,៥លាននាក់ ស្មើនឹង ២៣ភាគរយ វិស័យសេវាកម្មចំនួន ៣,១លាននាក់ ស្មើនឹង ២៩ភាគរយ វិស័យកសិកម្មចំនួន ៣,៤លាននាក់ ស្មើនឹង ៣១ភាគរយ មន្ត្រីសាធារណៈចំនួន៥០ម៉ឺននាក់ស្មើនឹង ៥ភាគរយ និងពលករទេសន្តរប្រវេសន៍មានចំនួន ១,៣លាននាក់ ស្មើនឹង ១២ភាគរយ។
ដោយឡែក លោកសុខ ឥសាន អ្នកនាំពាក្យគណបក្សកាន់អំណាចដែលគេជឿយ៉ាងទូលំទូលាយថានឹងឈ្នះការបោះឆ្នោតនោះ ប្រាប់វីអូអេអំឡុងពេលមានការធ្វើយុទ្ធនាការឃោសនាបោះឆ្នោតថា គណបក្សប្រជាជនកម្ពុជាបន្តយកចិត្តទុកដាក់លើការផ្តល់សេវាសាធារណៈទាន់ពេលវេលា និងជួយពលរដ្ឋក្រីក្រ ហើយបន្តដោះស្រាយវិវាទដីធ្លីដែលករណីខ្លះមានការប្តឹងផ្តល់ទៅតុលាការ។
លោកថ្លែងដោយសំដៅលើបញ្ហាដីធ្លីថា៖ «សរុបមក ទំនាស់ដីធ្លីដែលកើតឡើង កន្លងទៅនេះ រាជរដ្ឋាភិបាល បានខិតខំដោះស្រាយបានជាមូលដ្ឋានហើយ។ ហើយចំពោះបញ្ហាដែលថា មានការចោទប្រកាន់ទៅតាមផ្លូវតុលាការ ខ្ញុំយល់ថា លើកលែងតែករណីធ្ងន់ធ្ងរ ដែលបងប្អូនបង្កើតឡើងជាសកម្មភាព សកម្មភាព។ ហើយនៅពីក្រោយខ្នង មានសកម្មភាពនយោបាយនៅពីក្រោយខ្នង។ អាហ្នឹងរាជរដ្ឋាភិបាលមិនអាច ទទួលដោះស្រាយបានទេ វាត្រូវតែបញ្ជូនតាមផ្លូវតុលាការដើម្បីដោះស្រាយហើយ។
នៅក្នុងការបោះឆ្នោតជ្រើសរើសសមាជិកសភាសម្រាប់អាណត្តិទី៧ គណបក្សនយោ បាយចំនួន ១៨ ត្រូវបានចុះបញ្ជីនៅគណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីឈរឈ្មោះបោះឆ្នោត។
ដោយសារតែគណបក្សចំនួន១៧ មានថវិកានិងសំឡេងគាំទ្រតិចតួច គណបក្សប្រជាជនកម្ពុជា ដែលកំពុងកាន់អំណាចទំនងជានឹងទទួលបានអាសនៈទាំងអស់ ហើយបង្កើតរដ្ឋាភិបាលថ្មី។ អង្គការអន្តរជាតិជាច្រើនចាត់ទុកការបោះឆ្នោតនេះថា ជាការបោះឆ្នោតក្លែងក្លាយ។
ក៏ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់វីអូអេកាលពី ដើមខែកក្កដានេះថា រដ្ឋាភិបាលដែលនឹងកើតក្រោយថ្ងៃទី២៣ ខែកក្កដា ឆ្នាំ២០២៣នេះ នឹងដំណើរការទៅជាប្រក្រតី ហើយនិងមានទំនាក់ទំនងជាធម្មតាជាមួយប្រទេសជាមិត្ត និងដៃគូអភិវឌ្ឍន៍នានា ដូចពេលក្រោយកាលបោះឆ្នោតឆ្នាំ២០១៨ ដែលក្រុមជំទាស់បានចោទប្រកាន់ថា ជាការបោះឆ្នោតក្លែងក្លាយផងដែរនោះ។
គួររំឭកថា អ្នកដែលបានចុះឈ្មោះបោះឆ្នោតជាតិឆ្នាំ២០២៣នេះ មានចំនួនសរុបជាង៩,៧លាននាក់ ក្នុងនោះមានទាំងអ្នកបោះឆ្នោតវ័យក្មេងដែលមានអាយុចន្លោះចាប់ពី១៨ដល់២៥ឆ្នាំផងដែរ៕
