លោក Bill Weld អតីតអភិបាលរដ្ឋ Massachusetts បាននិយាយថាលោកបានបង្កើតគណៈកម្មាធិការស្ទាបស្ទង់មតិមួយសម្រាប់ឈរឈ្មោះជាបេក្ខជនប្រធានាធិបតីស.រ.អា.ហើយលោកជាអ្នកសាធារណរដ្ឋទីមួយដែលចាត់វិធានការនឹងប្រកួតប្រជែងនឹងប្រធានាធិបតីស.រ.អា. Donald Trump។
លោក Weld បានប្រកាសកាលពីថ្ងៃសុក្រថាលោកនឹងប្រកួតប្រជែងនឹងលោក Trump សម្រាប់ការតែងតាំងជាបេក្ខជនប្រធានាធិបតីស.រ.អា.ខាងគណបក្សសាធារណរដ្ឋក្នុងឆ្នាំ២០២០។
ប្រជាប្រិយភាពរបស់លោក Trump ក្នុងចំណោមពួកសាធារណរដ្ឋខ្ពស់ ដូច្នេះលោកមិនទំនងជានឹងចាញ់អ្នកប្រជែងម្នាក់នៅក្នុងការបោះឆ្នោតបឋមរបស់គណបក្សសាធារណរដ្ឋទេ។
លោក Weld អាយុ ៧៣ឆ្នាំ មិនសូវមានគេស្គាល់ច្រើនទេក្នុងប្រទេសជាតិ ក៏ប៉ុន្តែមានគែគោរពលោកច្រើននៅក្នុងចំណោមពួកមន្ត្រីនៃគណបក្សសាធារណរដ្ឋ។
លោកបានជាប់ឆ្នោតលើកដំបូងជាអភិបាលរដ្ឋ Massachusetts កាលពីឆ្នាំ១៩៩០ ដោយលោកមានជ័យជម្នះលើបេក្ខជនអភិរក្សនិយមម្នាក់ខាងគណបក្សប្រជាធិបតេយ្យ។ លោក Weld បានក្លាយទៅជាអភិបាលរដ្ឋមានប្រជាប្រិយភាពខ្លាំងម្នាក់របស់រដ្ឋ Massachusetts ដោយលោកបានជាប់ឆ្នោតពីរដងដោយមានការគាំទ្រច្រើនគួរសម។
នៅពេលលោកកាន់តំណែងជាអភិបាលរដ្ឋ លោកបានធ្វើតាមគោលនយោបាយសារពើពន្ធជាប្រពៃណីរបស់គណបក្សសាធារណរដ្ឋដោយរក្សាពន្ធដារនិងចំណាយរបស់រដ្ឋាភិបាលឱ្យនៅទាប ក៏ប៉ុន្តែលោកប្រកាន់យកគោលជំហរសេរីនិយមអំពីការពន្លូតកូននិងសិទ្ធិពួកមនុស្សស្រឡាញ់មនុស្សមានភេទដូចគ្នា។
នៅក្នុងការប្រកាសសេចក្តីប្រាថ្នារបស់លោកក្នុងការឈរឈ្មោះជាបេក្ខជនប្រធានាធិបតីស.រ.អា.កាលពីថ្ងៃសុក្រនៅក្នុងក្រុង Bedford រដ្ឋ New Hampshire លោក Weld បាននិយាយថាប្រទេសអាមេរិកកំពុងឋិតក្នុង«ហានិភ័យធ្ងន់ធ្ងរ»មួយហើយលោកបានព៌ណនាលោក Trump ថាជា«អ្នកសម្លុតគេនៅក្នុងទីធ្លាសាលារៀន»៕
