ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជំនួយ​មនុស្ស​ធម៌​លើក​ទីមួយ​បាន​ទៅ​ដល់​ប្រទេស​​វ៉េណេស៊ុយអេឡា


រូបឯកសារ៖ ជំនួយមនុស្សធម៌ដំបូងចែកចាយដោយអង្គការកាកបាទក្រហមបាន​ទៅ​ដល់​ប្រទេស​វេ៉ណេស៊ុយអេឡា។ 

អង្គការ​សហប្រ​ជាជាតិ​ប្រាប់​ឲ្យ​ដឹងថា មួយ​ភាគ​បី​នៃ​ប្រជា​ពលរដ្ឋវ៉េណេស៊ុយ​អេឡា​ ៣០​លាននាក់ ​ត្រូវ​ការ​ម្ហូបអាហារ​​ជាបន្ទាន់​ និង​ថ្នាំ​សង្កូវ។

ជំនួយ​មនុស្ស​ធម៌​លើក​ទី១ ​បាន​ទៅ​ដល់​ប្រទេស​វ៉េណេស៊ុយអេឡា​ដែល​ពោរពេញ​ដោយ​វិបត្តិ​ កាល​ពី​ថ្ងៃ​អង្គារ។

យន្តហោះ​មួយ​គ្រឿង​ដែល​ដឹក​គ្រឿង​ផ្គត់​ផ្គង់​មក​ពីសហព័ន្ធ​កាកបាទ​ក្រហម​អន្តរ​ជាតិ​និងសង្គម​អឌ្ឍ​ចន្ទក្រហម ​បាន​ចុះ​ក្នុង​រដ្ឋ​ធានីការ៉ាកាស ​បន្ទាប់​ពីក្រុម​អង្គការ​នោះ​បាន​ឈាន​ដល់​កិច្ច​ព្រម​ព្រៀង​មួយ​កាល​ពី​ចុង​ខែ​មុន ​ជាមួយ​រដ្ឋា​ភិបាល​របស់​ប្រធានា​ធិបតី​លោក Nicolas Maduro ដើម្បី​ផ្តល់​ការ​ជួយ​ឧបត្ថម្ភ។ រូបភាពនៅលើ ​បណ្តាញ​ព័ត៌មាន​សង្គម​បាន​បង្ហាញ​ពី​ក្រុម​បុគ្គលិកពាក់​អាវកាក់​ពណ៌ខៀវ​ ដោយ​មានសញ្ញា​សម្គាល់​កាកបាទ​ក្រហម​នៅ​ក្រោម​ប្រអប់​ចេញ​ពី​យន្តហោះ។

មន្រ្តី​ម្នាក់​របស់រដ្ឋាភិបាល​បាន​ប្រាប់​ទីភ្នាក់​ងារ​ព័ត៌មាន​បារាំង AFP ថា ការ​ដឹក​ជញ្ជូន​នោះ ​រួមមាន​គ្រឿង​ផ្គត់​ផ្គង់​បរិក្ខារ​ពេទ្យ​សំ​ខាន់​ៗ​។ គណៈកម្មាធិការកាកបាទ​ក្រ​ហមអន្តរជាតិ​បាន​និយាយ​ថា ​នៅ​ទី​បញ្ចប់ ​ខ្លួន​សង្ឃឹម​នឹង​បាន​ជួយ​មនុស្ស​ ៦​សែន ៥ម៉ឺន​នាក់ ​ដែល​ត្រូវការ​ជំនួយ​នៅ​ក្នុង​ប្រទេសវ៉េណេស៊ុយអេឡា។

ប្រធានាធិបតី​វ៉េណេស៊ុយអេឡា​លោក ​Maduro ​កាល​ពី​ដំបូង​បាន​ច្រាន​ចោលការ​ស្នើ​សុំផ្តល់​ជំនួយ​មក​ពី​សហរដ្ឋ​អាមេរិកនិង​ប្រទេស​ផ្សេង​ទៀត ​ទោះ​បី​ប្រ​ទេស​របស់​លោក​បាន​ស្ថិត​នៅ​ក្នុង​ភាព​ច្រ​បូក​ច្របល់​ ហើយ​ទទួល​រង​ផល​ប៉ះពាល់​មក​ពីការ​មិន​រីក​ចម្រើន​សេដ្ឋ​កិច្ចជាង ​៤ឆ្នាំ​ក៏ដោយ ​រួម​ជាមួយ​ការ​ខ្វះ​ខាត​ម្ហូបអាហារ​និង​ថ្នាំ​សង្កូវយ៉ាង​ខ្លាំង។​

លោក​បាន​អះអាង​ថា ការ​ស្នើ​ផ្តល់​ជំនួយ​របស់​អាមេរិក​នោះ​ជាលេស​នៃ​ការ​ឈ្លានពាន​ខាង​យោ​ធា​របស់​សហរដ្ឋ​អាមេ​រិក​ ហើយ​បាន​ច្រាន​ចោល​ការ​អះអាង​ថា ​ពលរដ្ឋ​របស់​លោក​ត្រូវការ​ជំនួយ​ឧបត្ថម្ភមក​ពី​ខាង​ក្រៅ។

​អង្គការ​សហប្រ​ជាជាតិ​ប្រាប់​ឲ្យ​ដឹងថា មួយ​ភាគ​បី​នៃ​ប្រជា​ពលរដ្ឋវ៉េណេស៊ុយ​អេឡា​ ៣០​លាននាក់ ​ត្រូវ​ការ​ម្ហូបអាហារជាបន្ទាន់​ និង​ថ្នាំ​សង្កូវ៕

XS
SM
MD
LG