អង្គភាពគ្រប់គ្រងបាល់ទាត់ពិភពលោក បានពន្យារពេលការដាក់ដេញថ្លៃធ្វើជាម្ចាស់ផ្ទះការប្រកួតបាល់ទាត់ពិភពលោក (World Cup) នាឆ្នាំ២០២៦ បន្ទាប់ពីមានការចោទប្រកាន់ដោយក្រសួងយុត្តិធម៌របស់ស.រ.អាពីបទពុករលួយ និងការទទួលសំណូកកាលពីខែមុននេះ ទៅលើមន្រ្តីរបស់សហព័ន្ធបាល់ទាត់ FIFA ចំនួន៩រូប និងនាយកប្រតិបត្តិសាជីវកម្មចំនួន៥រូប។ ប្រតិកម្មរបស់ពិភពលោកចំពោះរឿងអាស្រូវនេះមានការផ្លាស់ប្តូរយ៉ាងលឿន ដោយអ្នកខ្លះមិនត្រឹមតែនិយាយអំពីការប្រព្រឹត្តិល្មើសរបស់សហព័ន្ធ FIFA ដែលទទួលរងការចោទប្រកាន់នោះទេ ប៉ុន្តែពួកគេថែមទាំងបាននិយាយអំពីតួនាទីរបស់ស.រ.អាក្នុងការបង្ហាញរឿងនេះឲ្យដឹងជាសាធារណៈ។
នៅពេលដែលស.រ.អាចោទប្រកាន់បទល្មើសកម្រិតព្រហ្មទណ្ឌទៅលើនាយកប្រតិបត្តិកំពូលរបស់ សហព័ន្ធ FIFA រឿងនេះត្រូវបានមនុស្សជាច្រើននៅទ្វីបអឺរ៉ុប និងនៅជុំវិញពិភពលោកស្វាគមន៍យ៉ាងខ្លាំង។ នេះបើយោងតាមលោក Keir Radnedge អ្នកនិពន្ធផ្នែកកីឡាបាល់ទាត់ជនជាតិអង់គ្លេស ដែលបាននិយាយប្រាប់វីអូអេតាមប្រព័ន្ធ Skype។
«សម្រាប់មនុស្សភាគច្រើន វាច្បាស់ណាស់គឺ ពួកគេគាំទ្រ។ ប្រសិនបើអ្នកក្រឡេកមើលប្រព័ន្ធផ្សព្វផ្សាយក្នុងចក្រភពអង់គ្លេសក្នុងរយៈពេល៥ ឬ៧ឆ្នាំចុងក្រោយនេះ រឿងនេះគួរតែត្រូវបានកើតឡើងជាយូរណាស់មកហើយ។ មានការខឹងសម្បារដោយសារដំណើរការនេះមិនត្រូវបានធ្វើឡើងឲ្យបានលឿនជាងនេះ ហើយអ្នកទាំងនោះមិនត្រូវចាប់ខ្លួនឲ្យបានឆាប់ជាងនេះ។ ក៏ប៉ុន្តែផ្នែកខ្លះនៃបញ្ហានេះ គឺពិតជាដោយសារតែប្រព័ន្ធគ្រប់គ្រងដ៏ធំទូលាយរបស់ FIFA ផងដែរ»។
រឿងអាស្រូវពុករលួយបានធ្វើឲ្យមានការលាលែងពីតំណែងរបស់លោក Sepp Blatter ប្រធានសហព័ន្ធ FIFA មិនដល់មួយសប្តាហ៍ផង បន្ទាប់ពីលោកបានជាប់ឆ្នោតធ្វើជាប្រធានសហព័ន្ធសារជាថ្មី។
លោក David Larkin គឺជាមេធាវីផ្នែកកីឡារបស់ស.រ.អា។ លោកនិយាយថា ប្រតិបត្តិការរបស់ FIFA មិនបានធ្វើឡើងប្រកបដោយតម្លាភាពទេ។
«ដូច្នេះខ្ញុំគិតថា បញ្ហាឥឡូវនេះគឺ អំពីការរៀបចំ ហើយខ្ញុំគិតថា វាមានសារៈសំខាន់ក្នុងការនិយាយពីរចនាសម្ព័ន្ធ និងជជែកដេញដោលគ្នាថាតើអ្វីទៅជា FIFA។ ខ្ញុំចង់អះអាងថា ជាមូលដ្ឋានមានមនុស្សចំនួន២៥នាក់ អាចច្រើនជាងឬតិចជាងនេះ ដែលសម្រេចចិត្តរួមគ្នាធ្វើឲ្យមានរឿងបែបនេះឡើង ហើយជាគោលការណ៍ ពួកគេបានធ្វើឲ្យរឿងនេះមានដំណើរការយ៉ាងសម្ងាត់ និងគ្មានការទទួលខុសត្រូវ»។
ការចោទប្រកាន់ដែលត្រូវបានលាតត្រដាងកាលពីខែមុន បានបង្ហាញឲ្យឃើញអំពើពុករលួយ និងការសូកប៉ាន់របស់សហព័ន្ធដែលមានមូលដ្ឋាននៅប្រទេសស្វីសមួយនេះ ដែលជាអង្គភាពរៀបចំការប្រកួត World Cup និងការប្រកួតសំខាន់ៗដទៃទៀត។ លោក David Francis អ្នកនិពន្ធនៃទស្សនាវដ្តី«គោលនយោបាយបរទេស» បង្ហាញពីទស្សនៈរបស់លោកអំពីគោលបំណងរបស់អាមេរិកក្នុងការស៊ើបអង្កេតទៅលើរឿងនេះថា៖
«អ្នកចាប់បានអ្នកពាក់ព័ន្ធតូចតាច គឺបានអ្នកតូចតាចមកនិយាយអំពីរឿងនោះ ហើយវានឹងនាំដល់ការចាប់បានអ្នកដែលពាក់ព័ន្ធសំខាន់ៗផ្សេងទៀត។ នេះជាអ្វីដែលយើងបានឃើញនៅប៉ុន្មានសប្តាហ៍ចុងក្រោយនេះ។ តែឥឡូវនេះ តើអ្វីទៅដែលជំរុញឲ្យស.រ.អាធ្វើបែបនេះ? ខ្ញុំពិតជាឆ្ងល់ថា តើការស៊ើបអង្កេតនេះ នៅតែបន្តទៀតឬទេ បន្ទាប់ពីមានការប្រកួតបាល់ទាត់ពិភពលោក ពីព្រោះថា ស.រ.អានឹងមិនអាចបានធ្វើជាម្ចាស់ផ្ទះនៅក្នុងឆ្នាំ២០២២ទេ ទោះបីជាមានរឿងអ្វីកើតឡើងក៏ដោយ»។
ទោះជាមនុស្សមួយចំនួនអាចមិនយល់ស្របក៏ដោយ លោក David Larkin និយាយថា រហូតមកដល់ពេលនេះ កិត្តិនាមរបស់របស់ FIFA នៅតែមានភាពស្អាតស្អំ និងមានស្វយ័តភាពនៅឡើយ ក៏ប៉ុន្តែកិត្តិនាមនោះត្រូវបានបំផ្លាញដោយការចោទប្រកាន់របស់អាមេរិកអំពីរឿងពុករលួយនោះ។ តែទោះបីជាយ៉ាងណា Keir Radnedge ចង្អុលបង្ហាញថា FIFA នៅតែមានបុគ្គលិកដែលមានគំនិតល្អៗរាប់រយនាក់ទៀត ដែលប្រើប្រាស់បាល់ទាត់ដើម្បីជាការអភិវឌ្ឍដល់យុវជន សុខភាព និងដើម្បីការអប់រំ។
«ការងារដែលពួកគេកំពុងធ្វើ ត្រូវបានបំផ្លាញដោយមនុស្សមួយក្រុមនេះនៅថា្នក់កំពូលដែលគិតតែពីការរកលុយជាធំ»។
ប្រទេសដែលធ្វើជាម្ចាស់ផ្ទះសម្រាប់ការប្រកួត World Cup ឆ្នាំ២០២៦ នឹងត្រូវជ្រើសរើសដោយសមាជិករបស់ FIFA នៅក្នុងពេលប្រជុំសភារបស់ខ្លួននៅប្រទេសម៉ាឡេស៊ីក្នុងឆ្នាំ២០១៧។ ក៏ប៉ុន្តែ សហព័ន្ធ FIFA និយាយថា ខ្លួនអាចនឹងពន្យារពេលការសម្រេចចិត្តនេះ៕
ប្រែសម្រួលដោយ ប៊ុន ប៉េងហ៊ុយ
