ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គ្រូហុងស៊ុយហុងកុងទស្សន៍ទាយថាលោកត្រាំនឹងជួបសំណាងមិនល្អក្នុងឆ្នាំ២០១៨


លោក ដូណាល់ ត្រាំ ប្រធានាធិបតី​សហរដ្ឋ​អាមេរិក ថ្លែង​ក្នុង​កិច្ច​ប្រជុំ​មួយ​ជាមួយ​មន្ត្រី​អំពី​ហេដ្ឋា​រចនា​សម្ព័ន្ធ ​នៅ​បន្ទប់​ទទួល​ទាន​អាហារ​នៃ​សេត​វិមាន ក្នុង​រដ្ឋ​ធានី​វ៉ាស៊ីនតោន កាល​ពី​ថ្ងៃទី​១២ កុម្ភៈ ២០១៨។

ស្រប​ពេល​ដែល​រាសី​ចក្រ​របស់​ចិន​ឈាន​ចូល​ដល់​ឆ្នាំ​ចរ​នៅ​ថ្ងៃ​សុក្រ​ខាង​មុខ​នេះ​ អ្នក​ជំនាញ​ហុងស៊ុយ​មក​ពី​ទីក្រុង​ហុងកុង​មួយ​ចំនួន​បាន​ធ្វើ​ការ​ទស្សន៍​ទាយ​លើ​មេដឹកនាំ​ពិភព​លោក​នានា។

ដោយ​កើត​ឆ្នាំ ​១៩៤៦​ ដែល​ត្រូវ​នឹង​ឆ្នាំ​ចរ ​ប្រធានាធិបតី​សហរដ្ឋ​អាមេរិក​លោក ដូណាល់ ត្រាំ​ នឹង​ជួប​សំណាង​អាក្រក់ ​ដោយសារ​តែ​ឆ្នាំ​កំណើត​របស់​លោក​ប៉ះ​គ្នា​ជាមួយ​នឹង​ឆ្នាំ​ចរ​ក្នុង​ឆ្នាំ ​២០១៨ ​នេះ។ នេះ​បើ​យោង​តាម​ការ​បញ្ជាក់​របស់​គ្រូ​ទាយ​នានា។

ហុងស៊ុយ​ដែល​មាន​ន័យ​ថា ​«ខ្យល់ ​ទឹក» ​មាន​ឥទ្ធិពល​គ្រប​ដណ្ដប់​នៅ​តាម​ផ្នែក​ភាគ​ច្រើន​នៃ​ទ្វីប​អាស៊ី ​ដែល​ប្រជាពលរដ្ឋ​បាន​សម្រប​ជីវភាព​រស់នៅ​របស់​ពួក​គេ​តាម ​និង​ដាក់​វត្ថុ​នានា​នៅ​តាម​ទីតាំង​ផ្សេងៗ​ដោយ​ប្រុង​ប្រយ័ត្ន ដូចជា​កែវ​ស្រា ឬ​ក៏​គ្រាប់​គ្រីស្តាល់​នៅ​ក្នុង​ការិយាល័យ​ធ្វើ​ការ និង​ក្នុង​ផ្ទះ​ជា​ដើម ដើម្បី​ឲ្យ​ទទួល​បាន​សំណាង​ល្អ ​និង​លាភ​ច្រើន។

ទស្សនវិជ្ជា​បាន​បញ្ជាក់​ថា រាល់​ព្រឹត្តិការណ៍​ទាំង​អស់​បាន​កើត​ឡើង​ដោយសារ​តុល្យភាព​នៃ​ធាតុ​ទាំង ៥ ដែល​បង្កើត​ចក្រវាល​នេះ​ឡើង ដែល​នោះ​គឺ​ធាតុ​លោហៈ​ ធាតុ​ឈើ ​ធាតុ​ទឹក ​ធាតុ​ភ្លើង​ និង​ធាតុ​ដី។

ឆ្នាំ​កំណើត​របស់​លោក ត្រាំ​ គឺ «ឆ្នាំ​ចរ​ធាតុ​ភ្លើង» ប៉ុន្តែ​ឆ្នាំ ២០១៨ នេះ គឺ «ឆ្នាំ​ចរ​ធាតុ​ដី» ដែល​ជា​ធាតុ​មិន​ស៊ីមេទ្រី​គ្នា។

ធាតុ​ភ្លើង​នៃ​តារាង​ថ្ងៃ​ខែ​ឆ្នាំ​កំណើត​ផ្ទាល់​ខ្លួន​របស់​លោក ត្រាំ​ នឹង​ប៉ះ​ពាល់​ដល់​សុខភាព​របស់​លោក។ នេះ​បើ​តាម​ការ​បញ្ជាក់​របស់​គ្រូ​ហុងស៊ុយ​អ្នកស្រី Thierry Chow។ គ្រូ​ហុងស៊ុយ​នេះ​បាន​ទាយ​ទៀត​ថា ដោយសារ​ធាតុ​ភ្លើង​តំណាង​ឲ្យ​ការ​និយាយ​ស្ដី ពាក្យ​សម្ដី​របស់​លោក ត្រាំ​ អាច​នាំ​ឲ្យ​មាន «បញ្ហា​ពិត​ប្រាកដ» និង​ផល​ប៉ះពាល់​ជាក់​ស្ដែង​កើត​ឡើង​បាន​ផង​ដែរ។

គ្រូ​ហុងស៊ុយ​រូប​នេះ​បាន​បញ្ជាក់​ប្រាប់​ទីភ្នាក់ងារ​ព័ត៌មាន AFP ថា៖ «ដោយសារ​មាន​ធាតុ​ភ្លើង និង​ធាតុ​ដី​ច្រើន​ពេក នោះ​វា​នឹង​បណ្ដាល​ឲ្យ​លោក ត្រាំ​ មាន​អតុល្យភាព​នៅ​ក្នុង​សំណាង​របស់​លោក»៕

XS
SM
MD
LG