តុលាការសហព័ន្ធមួយបានលុបចោលភាគច្រើននៃគោលនយោបាយមួយរបស់រដ្ឋបាល Trump ដែលបដិសេធការផ្តល់សិទ្ធិជ្រកកោនដល់ជនអន្តោប្រវេសន៍ ដែលស្វះស្វែងឱ្យមានសុវត្ថិភាពពីអំពើហិង្សាក្នុងគ្រួសារ និងអំពើឃោរឃៅទាក់ទិននឹងពួកជនអន្ធពាលនៅអាមេរិក។
កាលពីខែមិថុនា លោក Jeff Sessions អតីតរដ្ឋមន្ត្រីក្រសួងយុត្តិធម៌ស.រ.អាបានធ្វើអន្តរាគមន៍ដោយផ្ទាល់នៅក្នុងករណីស្ត្រី Salvador ដែលគេស្គាល់ឈ្មោះថា A-B ដោយលោកបានបដិសេធការសុំសិទ្ធិជ្រកកោនរបស់អ្នកស្រីក្នុងឋានៈជា ជនរងគ្រោះដោយសារអំពើហិង្សាក្នុងគ្រួសារ ហើយលោកបានបញ្ជាឱ្យមានដំណើរការដកចេញ ដែលបង្គាប់ដល់ក្រុមមន្ត្រីខាងផ្នែកសិទ្ធិជ្រកកោនឱ្យបដិសេធ «ជាទូទៅ» នូវការពិនិត្យពិច័្ចយដំបូងដល់ជនអន្តោប្រវេសន៍ទាំងឡាយណា ដែលសុំសិទ្ធិជ្រកកោនផ្អែកលើអំពើហិង្សាក្នុងគ្រួសារ និងអំពើឃោរឃៅទាក់ទិននឹងជនអន្ធពាល។
លោក Emmet Sullivan ចៅក្រមតុលាការតំបន់ស.រ.អាបានដាក់អធិបញ្ជាលើបញ្ជារបស់លោក Sessions ដោយលោកបានមានប្រសាសន៍ថា វារំលោភលើច្បាប់អន្តោប្រវេសន៍ស.រ.អា ហើយថា «គ្មានមូលដ្ឋានខាងផ្លូវច្បាប់ដើម្បីឱ្យមានការហាមប្រាមឱ្យមានប្រសិទ្ធភាពបែបនេះទេ»។
