ការិយាល័យស៊ើបអង្កេតសហព័ន្ធ FBI របស់សហរដ្ឋអាមេរិក បានចាប់ខ្លួនមនុស្ស ៥ នាក់កាលពីថ្ងៃពុធម្សិលមិញ ដែលជាប់ពាក់ព័ន្ធនឹងផែនការចាប់បង្ខំអតីតមន្ត្រីក្រុងចិនម្នាក់និងក្រុមគ្រួសាររបស់មន្ត្រីនោះ ដែលកំពុងរស់នៅសហរដ្ឋអាមេរិក ឲ្យត្រឡប់ទៅកាន់ប្រទេសចិនវិញ ដែលជាផ្នែកមួយនៃយុទ្ធនាការប្រឆាំងអំពើពុករលួយរបស់រដ្ឋាភិបាលចិន ដែលមានឈ្មោះថា «ប្រតិបត្តិការប្រមាញ់កញ្ជ្រោង»។
មន្ត្រី FBI និយាយថា បុរសទាំង ៥ នាក់នោះ ដែលមានពលរដ្ឋអាមេរិកាំងម្នាក់ផងដែរ ត្រូវបានចាប់ខ្លួននៅក្នុងរដ្ឋ New Jersey រដ្ឋ New York និងរដ្ឋ California កាលពីព្រឹកថ្ងៃពុធម្សិលមិញ។ មនុស្ស ៣ នាក់ទៀត ដែលបានរងការចោទប្រកាន់នៅក្នុងការជាប់ពាក់ព័ន្ធនឹងផែនការនេះដែរ នៅរត់គេចខ្លួននៅឡើយនៅក្នុងប្រទេសចិន។
ជនជាប់ចោទទាំងនេះប្រឈមនឹងការចោទប្រកាន់ថា បានធ្វើជាភ្នាក់ងារខុសច្បាប់របស់រដ្ឋាភិបាលចិនសម្រាប់ការចូលរួមនៅក្នុងយុទ្ធនាការដើម្បី «រំខានយាយី ឈ្លបចាប់ និងគំរាមបង្ខំ» អ្នករស់នៅក្នុងសហរដ្ឋអាមេរិកឲ្យវិលត្រឡប់ទៅកាន់ប្រទេសចិនវិញ ដែលជាផ្នែកមួយនៃ «ប្រតិបត្តិការប្រមាញ់កញ្ជ្រោង»។ នេះបើតាមការបញ្ជាក់របស់ក្រសួងយុត្តិធម៌សហរដ្ឋអាមេរិក។
«ប្រតិបត្តិការប្រមាញ់កញ្ជ្រោង» របស់រដ្ឋាភិបាលចិននេះ បានចាប់ផ្តើមនៅឆ្នាំ ២០១៤ ដែលជាផ្នែកមួយនៃយុទ្ធនាការប្រឆាំងអំពើពុករលួយដ៏ធំរបស់ប្រធានាធិបតីចិនលោក Xi Jinping។ គោលបំណងនៃយុទ្ធនាការនេះ គឺដើម្បីចាប់ខ្លួនមន្ត្រីនិងពាណិជ្ជករចិនពុករលួយរាប់ពាន់នាក់ ដែលបានរត់គេចខ្លួនទៅបរទេស។
មន្ត្រីសហរដ្ឋអាមេរិកបាននិយាយថា «ប្រតិបត្តិការប្រមាញ់កញ្ជ្រោង» នេះ គឺជា «កិច្ចប្រឹងប្រែងខុសច្បាប់» ដែលធ្វើឡើងដើម្បីចាប់បញ្ជូនត្រឡប់ទៅប្រទេសចិនវិញនូវអ្នកប្រឆាំងនឹងរដ្ឋាភិបាលចិននៅទូទាំងពិភពលោក៕
