លោកវេជ្ជបណ្ឌិត Anthony Fauci ដែលជាអ្នកជំនាញកំពូលសហរដ្ឋអាមេរិកខាងផ្នែកជំងឺឆ្លង បាននិយាយថា លោកមើលឃើញថាមានក្ដីសង្ឃឹមល្អចំពោះការប្រើថ្នាំ Remdisivir ដើម្បីព្យាបាលជំងឺកូវីដ១៩។
ថ្លែងនៅក្នុងពេលប្រជុំជាមួយនឹងលោកប្រធានាធិបតី Donald Trump និងក្រុមការងារទប់ទល់នឹងជំងឺកូវីដ១៩ កាលពីថ្ងៃពុធម្សិលមិញ លោក Fauci បានបញ្ជាក់ថា ការសិក្សាលើថ្នាំ Remdisivir បានបង្ហាញថា ថ្នាំនេះ «អាចទប់ស្កាត់» វីរុសកូរ៉ូណាបាន។
លោកបានបន្ថែមថា លទ្ធផលនេះ «មើលទៅទំនងជាមិនល្អអស្ចារ្យផុតលេខនោះទេ» ប៉ុន្តែវាជា ភស្តុតាងដ៏ខ្លាំងក្លាមួយ ដែលបង្ហាញថា ថ្នាំ Remdisivir នេះគឺអាចទៅរួច។
លោក Fauci បានបញ្ជាក់ថា ស្ថានភាពជំងឺរបស់អ្នកជំងឺកូវីដ១៩ មាន «ភាពប្រសើរជាងមុនចំនួន ៣១%» បន្ទាប់ពីបានប្រើថ្នាំ Remdisivir នេះ ប៉ុន្តែលោកមិនបានផ្ដល់ព័ត៌មានលំអិតអំពីចំណុចនេះទេ។ លោកសង្កត់ធ្ងន់ថា ថ្នាំនេះអាចត្រូវបានប្រើដើម្បីព្យាបាលអ្នកជំងឺកូវីដ១៩ តែប៉ុណ្ណោះ គឺវាមិនមែនជាវ៉ាក់សាំងការពារជំងឹនេះនោះទេ។
ថ្នាំ Remdesivir នេះ ត្រូវបានបង្កើតឡើងដោយក្រុមហ៊ុន Gilead កាលពីមួយទសវត្សរ៍មុន និងបានបង្ហាញថា មានប្រសិទ្ធភាពប្រឆាំងនឹងវីរុសមួយចំនួនទាំងនៅក្នុងមន្ទីរពិសោធន៍ និងនៅក្នុងការពិសោធន៍លើសត្វ៕
