ក្រុមហ៊ុនអ៊ីតាលីឈ្មោះ Advent SRL ដែលផលិតឱសថដោយមានការអនុញ្ញាតពីអាជ្ញាធរបាននិយាយថា ខ្លួននឹងមានថ្នាំវ៉ាក់សាំងដំបូងៗប្រឆាំងនឹងជំងឺកូវីដ១៩នៅដំណាចខែមេសា។ ការសាកល្បងវ៉ាក់សាំងនេះយ៉ាងរហ័សក្នុងគ្លីនិកនឹងធ្វើដោយវិទ្យាស្ថាន Jenner នៃសាកលវិទ្យាល័យOxford នៅក្នុងចក្រភពអង់គ្លេស។
នៅពេលមនុស្សច្រើននាក់បានស្លាប់នៅទូទាំងពិភពលោកដោយសារជំងឺកូវីដ១៩ អ្នកវិទ្យាសាស្ត្រក៏បានប្រញាប់ប្រញាល់រកវ៉ាក់សាំងដើម្បីទប់ទល់នឹងជំងឺនេះ។ នៅពេលនេះវ៉ាក់សាំងមួយក្នុងបណ្តាវ៉ាក់សាំងប្រាំឈានមុខគេកំពុងត្រូវបានផលិតមានឈ្មោះថា ChAdOx-1nCov-19 ហើយត្រូវរំពឹងថានឹងប្រុងប្រៀបសម្រាប់ការសាកល្បងខាងគ្លីនិកនៅក្នុងពីរសប្តាហ៍ខាងមុខ។
ការបណ្តុះវ៉ាក់សាំងនេះធ្វើដោយវិទ្យាស្ថាន Jenner នៃសាកលវិទ្យាល័យ Oxford។ ការបណ្តុះវីរុសនេះបានផ្ទេរទៅក្រុមហ៊ុនផលិតឱសថអ៊ីតាលីឈ្មោះ Advent SRL ដែលជាផ្នែកមួយនៃក្រុម IRBM ដែលកំពុងផលិតវ៉ាក់សាំងនេះដំបូងចំនួនមួយពាន់កូនដបតូចៗ។
លោក Matteo Liguori ជានាយកផ្នែកចាត់ចែងកិច្ចការនៃក្រុមហ៊ុន IRBM។ លោកនិយាយថាគម្រោងការនេះរបស់វិទ្យាស្ថាន Jenner មានទាក់ទិននឹងការចម្លង spike protein ឬបន្លាប្រូតេអ៊ីនដែលជាបន្លានៃមេរោគកូរ៉ូណាកូវីដ១៩ចេញពីប្រូតេអ៊ីន។ កាលពីពេលថ្មីៗនេះ ក្រុមហ៊ុនរបស់លោកបានទទួល DNA នៃប្រូតេអ៊ីននេះពីវិទ្យាស្ថានអង់គ្លេសនេះ ហើយនៅពេលនេះកំពុងធ្វើការដើម្បីបញ្ចូលវាទៅក្នុងសម្ព័ន្ធមេរោគដែលក្រុមហ៊ុនលោកបានបង្កើតឡើង។
លោក Matteo Liguori បាននិយាយបន្ថែមថាសម្ព័ន្ធមេរោគនឹងធ្វើជាភ្នាក់ងារចម្លងដើម្បីធ្វើឱ្យ spike protein បន្លាប្រូតេអ៊ីនមានច្រើននៅក្នុងរាងកាយមនុស្សដែលតាមវិធីនេះនឹងបង្កើតអង្គបដិបក្ខក្នុងខ្លួនដើម្បីការពាររាងកាយមនុស្សពីមេរោគកូវីដ១៩។
លោក Matteo Liguori និយាយថា៖ «យើងផលិតថ្នាំនេះដាក់ក្នុងកូនដបតូចៗ។ យើងនឹងបញ្ជូនឱសថក្នុងកូនដបតូចៗទាំងនេះទៅកាន់វិទ្យាស្ថាន Jenner ដើម្បីឱ្យពួកគេធ្វើការសាកល្បងថ្នាំវ៉ាក់សាំងនេះលើមនុស្ស ប្រមូលទិន្នន័យនិងពិនិត្យផ្ទៀងផ្ទាត់ថាតើថ្នាំវ៉ាក់សាំងនេះមានសុវត្ថិភាពនិងមានប្រសិទ្ធភាពត្រឹមត្រូវឬទេ»។
វិទ្យាស្ថាន Jenner បានប្រើថ្នាំវ៉ាក់សាំងសាកល្បងមួយដើម្បីការពារមនុស្សប្រឆាំងនឹងមេរោគកូរ៉ូណាមួយទៀតគឺមេរោគនៃជំងឺ MERS ដែលនៅក្នុងការសាកល្បងខាង គ្លីនិកដំបូងបានជំរុញឱ្យមនុស្សមានភាពស៊ាំខ្លាំងប្រឆាំងនឹងជំងឺ MERS នៅក្រោយប្រើតែមួយដូស (dose)។
នៅពេលណាវិទ្យាស្ថាន Jenner ទទួលថ្នាំវ៉ាក់សាំងនេះពីប្រទេសអ៊ីតាលីវិទ្យាស្ថាន Jenner នឹងធ្វើការសាកល្បងខាងគ្លីនិកលើអ្នកស្ម័គ្រចិត្តជនអង់គ្លេសចំនួន៥១០នាក់ដែលជាមនុស្សពេញវ័យមានអាយុពី១៨ឆ្នាំទៅ៥៥ឆ្នាំ។
លោក Matteo Liguori បាននិយាយថា មានការរំពឹងថាមិនហួសពីខែកញ្ញាទេ ការធ្វើតេស្តសាកល្បងឱសថនេះនឹងចប់ ហើយថ្នាំនេះនឹងមានប្រើជាដំបូងសម្រាប់បុគ្គលិកសុខាភិបាល។
លោក Liguori បានថ្លែងថា៖ «ដោយសារមានភាពបន្ទាន់ យើងយល់ឃើញថា ជាការមានប្រយោជន៍ខ្លាំងដែលត្រូវចាត់វិធានការឱ្យបានឆាប់រហ័សតាមដែលអាចធ្វើបានក្នុងការអភិវឌ្ឍថ្នាំវ៉ាក់សាំងមួយដែលយើងរំពឹងថា ការសិក្សាស្រាវជ្រាវខាង គ្លីនិកនឹងធ្វើបានលឿនជាងនៅក្នុងស្ថានភាពឯទៀតៗ»។
លោក Liguori បាននិយាយថាមានអ្នកវិទ្យាសាស្ត្រប្រមាណ២០០នាក់មកពីប្រទេសមួយចំនួនធ្វើការពេញ២៤ម៉ោងក្នុងមួយថ្ងៃនៅឯទីស្នាក់ការធំរបស់ក្រុមហ៊ុនលោកនៅPomezia នៅខាងក្រៅក្រុង Rome ដើម្បីធ្វើថ្នាំវ៉ាក់សាំងប្រឆាំងនឹងមេរោគកូរ៉ូណាថ្មីនេះឱ្យបានឆាប់រហ័សតាមដែលអាចធ្វើបាន។ អ្នកវិទ្យាសាស្ត្រខ្លះក្នុងបណ្តាអ្នកវិទ្យាសាស្ត្រទាំងនេះមានទាក់ទិននឹងការធ្វើថ្នាំវ៉ាក់សាំងប្រឆាំងនឹងជំងឺ Ebola កាលពីឆ្នាំ២០១៤និងឆ្នាំ២០១៥៕
ប្រែសម្រួលដោយឈឹម សុមេធ
