ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​រ៉ាត់ រត្នមុនី​បង្ហាញ​ខ្លួន​នៅ​តុលាការ ​ខណៈ​គ្រួសារ​បន្ត​ការពារ​ភាព​ស្អាត​ស្អំ​របស់​លោក


លោករ៉ាត់ រត្នមុនី ក្នុងសម្លៀកបំពាក់អ្នកទោស ត្រូវមន្ត្រីនគរបាលនាំឡើងរថយន្ត ធ្វើដំណើរត្រឡប់ទៅពន្ធនាគារព្រៃស រាជធានីភ្នំពេញ ថ្ងៃទី០១ ខែកក្កដា ឆ្នាំ២០២០។ (ហ៊ុល រស្មី/វីអូអេ)

ឪពុក​ម្តាយ​បង្កើត​និង​សមាជិក​គ្រួសារ​របស់​លោក ​រ៉ាត់​ រត្នមុនី​ បាន​អំពាវនាវ​សារ​ជា​ថ្មី​ឲ្យ​តុលាការ​ផ្តល់​យុត្តិធម៌​ដល់​លោក​ មុនី​ ជា​អ្នក​ជួយ​បកប្រែ​ឲ្យ​បណ្តាញ​ព័ត៌មាន​រដ្ឋ​រុស្ស៊ី​ RT ​នៅ​ក្រោយ​ពេល​តុលាការ​កំពូល​បាន​ប្រកាស​លើក​ពេល​ចេញ​សាល​ក្រម​ សម្រាប់​បណ្តឹង​ទាស់​នឹង​ការ​កាត់​ក្តី​របស់​សាលា​ឧទ្ទរណ៍។​

សំណុំ​រឿង​នេះ​ពាក់ព័ន្ធ​នឹង​ការ​ផលិត​ខ្សែភាព​យន្ត​មួយ​ ស្តីពី​ការ​ជួញដូរ​ផ្លូវ​ភេទ​ដែល​អាជ្ញាធរ​ចោទ​ថា​ នេះ​ជា​ការ​ប្រឌិត​រឿង​ដែល​មិន​ឆ្លុះ​បញ្ចាំង​ការពិត​នៅ​កម្ពុជា។​

លោកស្រី​ចៅក្រម​ គឹម សត្ថាវី​ នៃ​តុលាការ​កំពូល​ នៅ​ព្រឹក​ថ្ងៃ​ពុធ​នេះ ​បាន​លើក​ពេល​ប្រកាស​សាលក្រម​សម្រាប់​បណ្តឹង​ទាស់​របស់​លោក​ រត្នមុនី​ ទៅ​ថ្ងៃទី​១៥ ​ខែ​កក្កដា​ខាង​មុខ​ បន្ទាប់​ពី​បើក​សវនាការ​ដែល​គ្មាន​ភាគី​ខាង​បណ្តាញ​ព័ត៌មាន​របស់​រុស្ស៊ី​ RT ​ចូល​រួម។​

កាលពី​ខែ​វិច្ឆិកា ​ឆ្នាំ​២០១៩​ សាលា​ឧទ្ធរណ៍​បាន​ប្រកាស​ច្រាន​ចោល​បណ្តឹង​ជំទាស់​របស់​លោក ​រ៉ាត់​ រត្នមុនី​ ដែល​ត្រូវ​បាន​សាលា​ដំបូង​រាជធានី​ភ្នំពេញ​ កាត់​ទោស​ឲ្យ​ជាប់​ពន្ធនាគារ​ពីរ​ឆ្នាំ។​ កាល​ពី​ថ្ងៃទី​២៦ ​ខែ​មិថុនា ​ឆ្នាំ​២០១៩​ តុលាការ​ក្រុង​ភ្នំពេញ​បាន​ផ្តន្ទាទោស​លោក ​រ៉ាត់ រត្នមុនី ​ឲ្យ​ជាប់​ពន្ធនាគារ​រយៈពេល​ពីរ​ឆ្នាំ​ ពី​បទ​ «ញុះញង់​ឲ្យ​មាន​ការ​រើស​អើង» ​ពាក់​ព័ន្ធ​នឹង​ការ​ចេញ​ផ្សាយ​ខ្សែ​ភាពយន្ត​ឯកសារ​ «ម្ដាយ​ខ្ញុំ​លក់​ខ្ញុំ» ​ដែល​ផលិត​ដោយ​បណ្តាញ​ព័ត៌មាន​រដ្ឋ​រុស្ស៊ី ​RT។​

លោក ធួក រ៉ាត់ អាយុ៧០ឆ្នាំ ឪពុកបង្កើតរបស់លោក រ៉ាត់ រត្នមុនី និយាយជាមួយអ្នកកាសែត នៅក្រៅតុលាការកំពូល រាជធានីភ្នំពេញ ថ្ងៃទី០១ ខែកក្កដា ឆ្នាំ២០២០។ (ហ៊ុល រស្មី/វីអូអេ)
លោក ធួក រ៉ាត់ អាយុ៧០ឆ្នាំ ឪពុកបង្កើតរបស់លោក រ៉ាត់ រត្នមុនី និយាយជាមួយអ្នកកាសែត នៅក្រៅតុលាការកំពូល រាជធានីភ្នំពេញ ថ្ងៃទី០១ ខែកក្កដា ឆ្នាំ២០២០។ (ហ៊ុល រស្មី/វីអូអេ)

លោក ​ធួក​ រ៉ាត់​ វ័យ​៧០​ឆ្នាំ ​ឪពុក​បង្កើត​របស់​លោក ​មុនី​ ប្រាប់​វីអូអេ​ នៅក្រៅ​របង​តុលាការ​កំពូល​ថា ​កូន​ប្រុស​បង្កើត​របស់​លោក ​បាន​រង​អយុត្តិធម៌​ចំពោះ​អំពើ​ដែល​កូន​ប្រុស​របស់​លោក​មិន​បាន​ប្រព្រឹត្ត។​

«វា​ដូច​អយុត្តិធម៌​ដែរ​ ព្រោះ​កាសែត​គេ​ខាង ​RT​ គេ​ថា​តប​មក​យូរ​ហើយ​ ពាក្យ​គេ​ថា​ គឺ​យើង​គ្រាន់​តែ​បកប្រែ​ដល់​មាន​ទោស។ ​អា​ហ្នឹង​វាមាន​អយុត្តិធម៌​ដែរ​ នៅក្នុង​គ្រួសារ​ខ្ញុំ​នោះ​បាទ»។​

លោក​ រត្នមុនី​ អាយុ​៤៩​ឆ្នាំ​ នៅ​ព្រឹក​ថ្ងៃ​ពុធ​នេះ​ ត្រូវ​បាន​មន្ត្រី​នគរបាល​ជាតិ​នាំ​ទៅ​ឃុំ​ខ្លួន​វិញ​ នៅ​ពន្ធនាគារ​ព្រៃ​ស​ ដែល​នៅ​ចម្ងាយ​ជាង​១០​គីឡូ​ម៉ែត្រ​ពី​ក្រុង​ភ្នំពេញ​ ក្រោយ​បញ្ចប់​សវនាការ។​

ភរិយា​របស់​លោក​ មុនី គឺ​អ្នកស្រី​ ឡុង គឹមហ៊ាង​ អាយុ​៣៦​ឆ្នាំ​ និង​មាន​កូន​ប្រុស​ម្នាក់​ អាយុ​២​ឆ្នាំ​ ៦​ខែ​ បន្ត​សើ្ន​សុំ​ឲ្យ​តុលាការ​ដោះលែង​ និង​ទម្លាក់​ចោល​បទ​ចោទ​ប្រកាន់​លើ​ស្វាមី​អ្នកស្រី។​

អ្នក​ស្រី​យល់​ថា​ ការ​ឃុំខ្លួន​ស្វាមី​អ្នកស្រី​គ្រាន់​តែ​ជា​បែប​ផែន​នៃ​ការ​បន្លាច​អ្នក​កាសែត ​ឲ្យ​ខ្លាច​មិន​ហ៊ាន​រាយ​ការណ៍​ព័ត៌មាន​ ពាក់ព័ន្ធ​នឹង​ការ​ជួញ​ដូរ​មនុស្ស​តែ​ប៉ុណ្ណោះ។

​អតីត​អ្នក​ការពារ​សិទ្ធិ​លំនៅដ្ឋាន​រូប​នេះ ​បាន​ប្រាប់​វីអូអេ​ពី​ប្រទេស​ថៃ​យ៉ាង​ដូច្នេះ​ថា៖

​«សម្រាប់​ខ្ញុំ​ការ​ឃុំ​ខ្លួន​ប្តី​ខ្ញុំ​ហ្នឹង​ គឺ​ជា​រឿង​ដែល​រំលោភ​សិទ្ធិ​គាត់​ធ្ងន់​ធ្ងរ​ទៅ​ហើយ​ ហើយ​មួយ​ទៀត​ហ្នឹង​គឺ​វា​ជា​ការ​ដាក់​សម្ពាធ​ទៅ​ដល់​អ្នក​កាសែត​ដទៃ​ទៀត​ ដើម្បី​កុំ​ឲ្យ​ហ៊ាន​ធ្វើ​រឿង​ដែល​និយាយ​អំពី​ការ​រំលោភ​សិទ្ធិ​មនុស្ស​ការ​ជួញ​ដូរ​មនុស្ស​...​គឺ​ជា​ការ​គំរាម​កំហែង​ទៅ​ដល់​អ្នក​កាសែត​តែ​ប៉ុណ្ណឹង​ទេ។​ ហើយ​អ៊ីចឹង​ខ្ញុំ​សូម​អំពាវនាវ​ឲ្យ​រដ្ឋាភិបាល ​ឬ​ក៏​តុលាការ​ហ្នឹង​ដោះលែង​ប្តី​របស់​ខ្ញុំ​ ឲ្យ​មាន​សេរីភាព»។​

កន្លង​ទៅ​ តុលាការ​បាន​បង្គាប់​ឲ្យ​លោក​ រត្នមុនី​ បង់​ប្រាក់​ជំងឺ​ចិត្ត​ចំនួន​ ៧០​លាន​រៀល ​ឬ​ស្មើ​នឹង​ប្រមាណ​ ១៧.៥០០​ដុល្លារ​អាមេរិក​ ដល់​ដើម​បណ្តឹង​រដ្ឋប្បវេណី​ចំនួន​ពីរ​នាក់​ ដែល​ជា​តួ​សម្តែង​ក្នុង​ខ្សែ​ភាពយន្ត​ឯក​សារ​រឿង ​«ម្តាយ​ខ្ញុំ​លក់​ខ្ញុំ»។​ អាជ្ញាធរ​ថា​ពួកគេ​មិន​មាន​សាច់​រឿង​ដូច​ក្នុង​វីដេអូ​ ដែល​ផ្សាយ​ដោយ​សារ​ព័ត៌មាន​ RT​ នោះ​ទេ។​

លោក ឡោ ជុនធី មេធាវីការពារក្តីម្នាក់ឲ្យលោក រ៉ាត់ រត្នមុនី ផ្តល់បទសម្ភាសន៍ដល់អ្នកកាសែតនៅក្រៅតុលាការកំពូល រាជធានីភ្នំពេញ ថ្ងៃទី០១ ខែកក្កដា ឆ្នាំ២០២០។ (ហ៊ុល រស្មី/វីអូអេ)
លោក ឡោ ជុនធី មេធាវីការពារក្តីម្នាក់ឲ្យលោក រ៉ាត់ រត្នមុនី ផ្តល់បទសម្ភាសន៍ដល់អ្នកកាសែតនៅក្រៅតុលាការកំពូល រាជធានីភ្នំពេញ ថ្ងៃទី០១ ខែកក្កដា ឆ្នាំ២០២០។ (ហ៊ុល រស្មី/វីអូអេ)

លោក ​ឡោ ជុនធី​ មេធាវី​មួយ​រូប​របស់​លោក ​រ៉ាត់ រត្នមុនី​ បាន​ប្រាប់​ក្រុម​អ្នក​សារ​ព័ត៌មាន​ថា​ កូន​ក្តី​លោក​បាន​ចប់​ការងារ​ជាមួយ​ព័ត៌មាន​រដ្ឋ​រុស្ស៊ី​រួច​ទៅ​ហើយ​ នៅ​មុន​ការ​បញ្ចេញ​ភាពយន្ត​រឿង​ «ម្តាយ​ខ្ញុំ​លក់​ខ្ញុំ»​ កាល​ពី​ខែ​តុលា​ ឆ្នាំ​២០១៨។​ ហេតុ​ដូច្នេះ​លោក​ជឿ​ថា ​កូន​ក្តី​លោក​គ្មាន​ទោស។​

«RT​ គេ​ព្យាយាម​ហើយ។​ គេ​បាន​ដាក់​លិខិត​ទៅ​ស្ថានទូត​របស់​យើង​ នៅ​មូស្គូ​ បាន​ឆ្លើយ​បញ្ជាក់​ពី​អាណត្តិ​របស់​ការងារ​របស់​គាត់​ គាត់​អស់​អាណត្តិ​តាំង​ពី​ខែ​កុម្ភៈ​ ២០១៨​ម្ល៉េះ។ ​អ៊ីចឹង​អា​ការ​ផ្សព្វផ្សាយ​ពី​ថ្ងៃ​១៥​ តុលា​ហ្នឹង​ RT​ ជា​អ្នក​ធ្វើ»។​

លោក​មេធាវី​បន្ថែម​ថា​ ស្ថាប័ន​តុលាការ​មិន​មាន​សាក្សី​សំខាន់​ម្នាក់​ និង​ភាគី​ពាក់ព័ន្ធ​ផ្សេង​ទៀត​ ដូច​ជា​ខាង​ភាគី​ RT ​ដើម្បីគាំទ្រ​ដល់​ការ​កាត់​ទោស​កូន​ក្តី​របស់​លោក។​

វីអូអេ​ មិនទាន់​អាច​សុំ​ការ​អត្ថាធិប្បាយ​ពី​លោក​ អ៊ុក​ គឹមសិទ្ធិ ​អ្នក​នាំពាក្យ​តុលាការ​កំពូល​បាន​នៅ​ឡើយ​ទេ​ នៅ​ថ្ងៃ​ពុធ​នេះ។​

លោក​ ស៊ឹង សែនករុណា ​អ្នក​នាំពាក្យ​សមាគម​ការពារ​សិទ្ធិ​មនុស្ស​អាដហុក​ មាន​ប្រសាសន៍​ថា ​លោក ​រ៉ាត់ រត្នមុនី​ មិន​មែន​ជាអ្នក​ដែល​ត្រូវ​រងការ​ធ្វើ​ទុក្ខ​បុកម្នេញ​តាម​ផ្លូវ​ច្បាប់​ចំពោះ​ការ​ផ្សព្វផ្សាយ​ភាពយន្ត​ឯកសារ​រឿង​ «ម្តាយ​ខ្ញុំ​លក់​ខ្ញុំ»​ នោះ​ទេ ​ពីព្រោះ​លោក​ មុនី​ បាន​បំពេញ​ភារកិច្ច​ត្រឹម​តែ​ជា​អ្នក​បកប្រែ​ និង​សម្រប​សម្រួល​ឲ្យ​ក្រុម​ការងារ​ផលិត​ព័ត៌មាន​របស់​បណ្តាញ​ព័ត៌មាន ​RT ​ប៉ុណ្ណោះ។​

កាល​ពី​ឆ្នាំ​២០១៩​ លោកស្រី​ Ekaterina Yakovleva ​ប្រធាន​ផ្នែក​ផលិត​ភាពយន្ត​ឯកសារ​របស់​បណ្តាញ​ព័ត៌មាន​ RT​ បាន​សរសេរ​លិខិត​មួយ​ទៅ​លោក​ កែ វិចិត្ រ​ឯក​អគ្គរាជទូត​កម្ពុជា​ប្រចាំ​ក្រុង​ម៉ូស្គូ​ ប្រទេស​រុស្ស៊ី​ ដោយ​បញ្ជាក់​ជា​ថ្មី​ថា​ លោក​ មុនី​ ពិត​ជា​អ្នក​បក​ប្រែ​ និង​សម្រប​សម្រួល​ការ​ទំនាក់​ទំនង​ឲ្យ​បណ្តាញ​ព័ត៌មាន ​RT​ ប្រាកដ​មែន។​

រហូត​មក​ដល់​ពេល​នេះ​ លោក​ រ៉ាត់ រត្នមុនី​ ដែល​ជា​អតីត​អ្នក​ការពារ​សិទ្ធិ​កម្មករ​ក្នុង​វិស័យ​សំណង់​ បាន​ជាប់​ឃុំ​អស់​រយៈពេល ​១​ឆ្នាំ ​៦​ខែ មក​ហើយ​ គឺ​នៅ​សល់​តែ​ ៦​ខែ​ទៀត​ លោក​នឹង​មាន​សេរីភាព​ឡើង​វិញ៕

តួលេខនៃករណីឆ្លងជំងឺកូវីដ១៩

XS
SM
MD
LG