លោក Frank Lee អ្នកនាំពាក្យសម្រាប់ព្រឹត្តិការណ៍នេះ បានប្រាប់ VOA ថា ការប្រមូលផ្តុំនេះត្រូវបានប្រារព្ធឡើងជារៀងរាល់ឆ្នាំ ដើម្បីទាមទារឲ្យអាជ្ញាធរចិនបញ្ឈប់ការធ្វើបាប និងការប្រមូលសរីរាង្គមនុស្សពីអ្នកទោសមនសិកា រួមទាំង ក្រុមអ្នកហាត់ប្រាណ Falun Gong។
ការប្រមូលផ្តុំនេះ ក៏បានលើកកម្ពស់យុទ្ធនាការមួយដើម្បីទាមទារ នូវអតីតមេដឹកនាំចិន លោក Jiang Zemin យកមកកាត់ទោស ដែលត្រូវបានក្រុមនេះចោទប្រកាន់ពីការបញ្ជាឲ្យធ្វើការបង្រ្កាបកាលពីឆ្នាំ ១៩៩៩។
នៅថ្ងៃទី ១៣ ខែមិថុនា សភាតំណាងនៃសហរដ្ឋអាមេរិក បានអនុម័តជាឯកច្ឆ័ន្ចនូវសេចក្តីសម្រេចមួយដែលអំពាវនាវឲ្យប្រទេសចិន បញ្ឈប់ការធ្វើទុក្ខបុកម្នេញ និងការចាត់ទីដៅលើការផ្ទេរសរីរាង្គរបស់ក្រុមអ្នកហាត់ប្រាណ Falun Gong។
ការបោះឆ្នោតអនុម័តនេះត្រូវបានធ្វើឡើង បន្ទាប់ពីមានការចុះផ្សាយនូវរបាយការណ៍បោះពុម្ភផ្សាយមួយ ដែលអះអាងថាប្រទេសចិនបានពង្រីកការប្រមូលយកសរីរាង្គខុសច្បាប់ ដល់កម្រិតមួយដែលពុំធ្លាប់មានពីមុនមក។ របាយការណ៍នេះបានឲ្យដឹងថា អ្នកហាត់ Falun Gong ត្រូវបានចាត់ជាទីដៅនៃការប្រមូលសរីរាង្គ ដោយសារពួកគេទំនងជាថែរក្សារាងកាយបានល្អ។
មន្ត្រីរដ្ឋាភិបាលចិនបានបដិសេធការធ្វើខុស ដោយនិយាយថា ការចោទប្រកាន់ ពីការប្រមូលយកសរីរាង្គខ្នាតធំ សុទ្ធតែជារឿងប្រឌិតប៉ុណ្ណោះ។ ចាប់ពីឆ្នាំ ២០១៥ មករដ្ឋាភិបាលចិនបាននិយាយថា ខ្លួនបានបញ្ឈប់ការប្រើប្រាស់ជនល្មើសដែលជាប់ទោសប្រហារជីវិតជាប្រភពផ្ទេរសរីរាង្គ ហើយងាកមកប្រើប្រាស់នូវប្រព័ន្ធផ្តល់សរីរាង្គដោយស្ម័គ្រចិត្តវិញ។
សមាជិកសភាអាមេរិកមកពីគណបក្សសាធារណរដ្ឋ អ្នកស្រី Ileana Ros-Lehtinen និង លោក Dana Rohrabacher បានចូលរួម ការប្រមូលផ្តុំរបស់ក្រុមអ្នកហាត់ប្រាណ Falun Gong និងធ្វើសុន្ទរកថា ដោយបានសម្តែងនូវការគាំទ្ររបស់ខ្លួនចំពោះក្រុមនេះ។ សមាជិកព្រឹទ្ធសភា លោក Marco Rubio បានផ្តល់ការគាំទ្រក្នុងទម្រង់ជាសំណេរថ្លែងការណ៍មួយ។
បាតុករបានដង្ហែរក្បួនទៅកាន់កន្លែងរំឮកវិញ្ញាណក្ខន្ធ Lincoln Memorial ទីដែលពួកគេប្រារព្ធពិធីសាសនាក្រោមពន្លឺភ្លើងទៀននាពេលល្ងាច៕
ប្រែសម្រួលដោយ៖ ឆាយ គីមហ៊ង
