ក្រុមហ៊ុន Facebook និង Google គ្រោងសាងសង់ខ្សែកាបក្រោមសមុទ្រពីសហរដ្ឋអាមេរិក ភ្ជាប់ទៅកាន់ប្រទេសពីរក្នុងអាស៊ានចំនួនពីរវិញដោយសារគម្រោងខ្សែកាបភ្ជាប់ទៅទីក្រុងហុងកុង ត្រូវបានលុបចោលដោយបញ្ហាសន្តិសុខជាតិ។
បន្ទាប់ពីបានលុបចោលគម្រោងខ្សែកាបក្រោមសមុទ្រដែលតភ្ជាប់សហរដ្ឋអាមេរិកជាមួយហុងកុងដោយសារសម្ពាធពីរដ្ឋាភិបាលសហរដ្ឋអាមេរិក ក្រុមហ៊ុន Facebook និងក្រុមហ៊ុន Google ឥឡូវនេះ បានឲ្យដឹងថា ពួកគេនឹងតខ្សែកាបស្រដៀងគ្នានេះជាមួយប្រទេសសិង្ហបុរី និងឥណ្ឌូណេស៊ីវិញ។
លោក Kevin Salvadori អនុប្រធានបណ្តាញវិនិយោគនៃក្រុមហ៊ុន Facebook បានប្រាប់សារព័ត៌មាន Reuters ថា៖ «ខ្សែកាបឈ្មោះ Echo និងខ្សែកាប Bifrost គឺជាខ្សែពីរដំបូងគេដែលនឹងរត់កាត់ផ្លូវចម្រុះថ្មីមួយតាមសមុទ្រ Java ហើយពួកគេនឹងបង្កើន សមត្ថភាពក្រោមផ្ទៃសមុទ្រទាំងអស់ក្នុងតំបន់អន្តរប៉ាស៊ីហ្វិកប្រហែល៧០ភាគរយ»។
លោក Salvadori មិនបានផ្តល់អត្ថាធិប្បាយអំពីការចំណាយលើគម្រោងនេះទេ។
លោកបាននិយាយថា ខ្សែកាប Echo ដែលនឹងត្រូវបង្កើតឡើងក្នុងភាពជាដៃគូរជាមួយក្រុមហ៊ុន Google និងក្រុមហ៊ុនទូរគមនាគមន៍ឥណ្ឌូណេស៊ី XL នឹងសាងសង់រួចរាល់នៅឆ្នាំ២០២៣។
លោកបន្តថា ចំណែកខ្សែកាប Bifrost ដែលកំពុងត្រូវបានធ្វើឡើងជាមួយក្រុមហ៊ុន Telin ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Telkom របស់ឥណ្ឌូណេស៊ី និងសាជីវកម្ម Keppel របស់សិង្ហបុរីគួរតែរួចរាល់ត្រឹមឆ្នាំ២០២៤។
គម្រោងទាំងពីរ នឹងត្រូវការការអនុម័តផ្លូវច្បាប់។
ទីភ្នាក់ងារសារព័ត៌មាន Reuters បានរាយការណ៍ថា ពលរដ្ឋឥណ្ឌូណេស៊ីភាគច្រើន ប្រើប្រាស់អ៊ីនធើណិតតាមទូរស័ព្ទ។ លោកបន្ថែមថា មានតែ១០ភាគរយប៉ុណ្ណោះដែលមានអ៊ីនធើណិតល្បឿនលឿនប្រើប្រាស់ ហើយពលរដ្ឋជាច្រើនដែលមិនមានអ៊ីនធើណិតប្រើប្រាស់ទាល់តែសោះ។
ក្រុមហ៊ុន Facebook បាននិយាយថា គម្រោងសម្រាប់ខ្សែកាបទៅហុងកុងត្រូវបានលុបចោលដោយសាររដ្ឋាភិបាលសហរដ្ឋអាមេរិកលើកឡើងពីបញ្ហាសន្តិសុខជាតិអំពីតំណភ្ជាប់ទំនាក់ទំនងដោយផ្ទាល់ទៅហុងកុង។
ក្រុមហ៊ុន Facebook និងក្រុមហ៊ុន Google ក៏មានពាក់ព័ន្ធនឹងគម្រោងខ្សែកាបផ្សេងទៀតជុំវិញពិភពលោកដែរ។
ក្រុមហ៊ុន Facebook បានប្រកាសកាលពីខែឧសភាឆ្នាំមុនថា ខ្លួននឹងសាងសង់ខ្សែកាបប្រវែង៣៧,០០០គីឡូម៉ែត្រក្រោមសមុទ្រនៅជុំវិញទ្វីបអាហ្វ្រិក។
គម្រោងរបស់ក្រុមហ៊ុន Google គឺខ្សែកាបក្រោមសមុទ្រ Equiano អាចភ្ជាប់អឺរ៉ុបនិងអាហ្វ្រិកនៅពេលដែលសាងសង់រួចរាល់៕
ប្រែសម្រួលដោយកញ្ញា ទុំ ម្លិះ
