ភ្ជាប់​ទៅ​គេហទំព័រ​ទាក់ទង

អ្នកជំនាញ៖ កម្ពុជា​ត្រូវការ​កំណើន​យល់ដឹង​អំពី​ការទប់ស្កាត់​អំពើ​ឃោរឃៅ​ពេល​ឃើញ​មាន​សញ្ញា​ហិង្សា​ថ្មី


លោក​បណ្ឌិត Noel Morada នាយក​មជ្ឈមណ្ឌល​អាស៊ី​ប៉ាស៊ីហ្វិក​សម្រាប់​ការអនុវត្ត​កាតព្វកិច្ច​ក្នុង​ការទប់ស្កាត់​អំពើ​ឧក្រិដ្ឋកម្ម​ឃោរឃៅ​លើ​មនុស្ស​ជាតិ (Asia Pacific Center for the Responsibility to Protect) ថ្លែង​ក្នុង​ពិធី​បើក​កិច្ចពិភាក្សា​ថ្នាក់​ជាតិ​លើក​ទី២ អំពី​ការ​ទប់ស្កាត់​អំពើ​ឃោរឃៅ​នៅ​កម្ពុជា ដែល​បាន​រៀបចំ​ឡើង​កាលពី​ថ្ងៃទី ២២ ខែ សីហា ឆ្នាំ ២០១៧។ (ហ៊ុល រស្មី/VOA)

លោក​បណ្ឌិត​ Noel Morada ​ថ្លែង​​ថា​ ប្រទេស​កម្ពុជា​ ត្រូវ​បន្ត​បង្កើន​ការ​យល់​ដឹង​អំពី​បទដ្ឋាន​ការ​អនុវត្ត​កាតព្វ​កិច្ច​ក្នុងការ​ទប់​ស្កាត់​ ដើម្បី​បើក​ផ្លូវ​ឲ្យការអនុវត្ត​ន៍ផែនការ​កម្រិត​ជាតិ​នា​នា​ប្រព្រឹត្ត​ទៅ​ប្រកប​ដោយ​ប្រសិទ្ធភាព​ក្នុងការ​​រារាំងមិន​ឲ្យមាន​អំពើហិង្សា​អមនុស្ស​ធម៌​នេះ។​

របាយ​ការណ៍​មួយ​បង្ហាញថា ​ប្រទេស​កម្ពុជា​នៅ​តែ​ប្រឈមនឹង​សញ្ញា​ ដែ​ល​អាច​នាំ​ទៅ​រកអំពើ​ហិង្សា​ធ្ងន់ធ្ងរ​សារ​ជាថ្មី​ ​ខណៈ​ដែល​ប្រជាជន​រស់នៅ​ក្នុង​ប្រទេសកំពុង​ប្រឈម​នឹង​ការ​រំលោភ​បំពាន​សិទ្ធិ​មនុស្ស​ ការ​វាយ​ប្រហារ​នា​នា​ទៅ​លើ​ក្រុម​ជំទាស់​ និង​អំពើ​អយុត្តិធម៌​សង្គម​ផ្សេងៗ​ទៀត។​ ​អ្នក​ជំនាញ​យល់​ថា​ កម្ពុជា​នៅ​មាន​ឱកាស​ក្នុង​ការ​ទប់ស្កាត់​បញ្ហា​ទាំងនេះ​បាន។​

អ្នក​ជំនាញ​ធ្វើ​ការលើ​គម្រោងទប់ស្កាត់​អំពើឃោរឃៅ​ បាន​ចាត់​ទុកថាប្រទេស​កម្ពុជា​ ​ជាប្រទេស​ដែល​បាន​សម្រេច​កិច្ចការ​ងារ​ជាច្រើន​ក្នុងការ​រារាំង​មិនឲ្យ​មាន​អំពើ​សម្លាប់​រង្គាល​ ​តែ​បាន​ស្នើ​ឲ្យ​ប្រទេស​នេះ​បន្ត​លើក​កម្ពស់​ការ​យល់​ដឹង​អំពី​គោលការណ៍​នៃ​ «ទំនួល​ខុសត្រូវ​ក្នុង​ការ​ការ​ពារ»​ ដែល​ទទួល​ស្គាល់​ដោយ​អង្គការ​សហប្រជាជាតិ​ក្នុង​ការ​ទប់​ស្កាត់​អំពើ​ឃោរឃៅ។

ថ្លែង​ទៅ​កាន់ក្រុម​មន្ត្រី​រដ្ឋាភិបាល​ ​និង​មិនមែន​រដា្ឋភិបាល និង​សាស្ត្រាចារ្យ​ នៅ​ក្នុង​កិច្ច​ពិភាក្សា​ថ្នាក់​ជាតិ​លើក​ទី២​ អំពីការ​ទប់​ស្កាត់​អំពើ​ឃោរឃៅនៅរាជធានី​ភ្នំពេញ​កាលពីថ្ងៃ​អង្គារ​កន្លង​ទៅ​ ​លោក​បណ្ឌិត​ Noel Morada ​នាយក​មជ្ឈមណ្ឌល​អាស៊ី​ប៉ាស៊ីហ្វិក​សម្រាប់​ការ​អនុវត្ត​ន៍កាតព្វកិច្ច​ក្នុង​ការ​ទប់​ស្កាត់​អំពើ​ឧក្រិដ្ឋកម្ម​ឃោរឃៅ​លើ​មនុស្ស​ជាតិ ​(Asia Pacific Center for the Responsibility to Protect)​ ​មាន​ប្រសាសន៍​ថា​ ប្រទេស​កម្ពុជា​ ត្រូវ​បន្ត​បង្កើន​ការ​យល់​ដឹង​អំពី​បទដ្ឋាន​ការ​អនុវត្ត​កាតព្វ​កិច្ច​ក្នុងការ​ទប់​ស្កាត់​ ដើម្បី​បើក​ផ្លូវ​ឲ្យការអនុវត្ត​ន៍ផែនការ​កម្រិត​ជាតិ​នា​នា​ប្រព្រឹត្ត​ទៅ​ប្រកប​ដោយ​ប្រសិទ្ធភាព​ក្នុងការរារាំងមិន​ឲ្យមាន​អំពើហិង្សា​អមនុស្ស​ធម៌​នេះ។​

«​ទីមួយ​បង្កើនការ​យល់​ដឹង​ និង​ធ្វើ​ឲ្យ​ការ​យល់​ដឹង​នោះ​កាន់តែ​ស៊ីជម្រៅ​អំពី​គោលការណ៍​នៃទំនួល​ខុស​ត្រូវ​ក្នុង​ការ​ការ​ពារ​ និង​ការ​បង្ការ​អំពើឃោរឃៅ។​ ​ទី​ពីរ​ ​ខ្ញុំ​គិត​ថា​ នេះ​ជា​បញ្ហា​សំខាន់​ណាស់​ដែល​ត្រូវ​ធ្វើ​ឲ្យ​មាន​ការ​យល់ដឹង​ច្រើន​អំពី​គោលការណ៍​នៃទំនួល​ខុសត្រូវ​ក្នុង​ការ​ការ​ពារ​ ​និង​ការ​បង្ការ​អំពើ​ឃោរឃៅ​ ដោយ​ផ្អែក​លើ​ស្ថានភាព​នៅថ្នាក់​មូលដ្ឋាន»។

ការ​អនុវត្ត​ន៍​កាតព្វកិច្ច​ក្នុង​ការ​ទប់​ស្កាត់​ ឬ​ហៅ​ម៉្យាង​ទៀត​ថា​ ទំនួល​ខុសត្រូវ​ក្នុង​ការ​ការ​ពារ​ ដែលភាសា​អង់​គ្លេស​ហៅ​ថា​ Responsibility to Protect ​គឺ​ជា​បទដ្ឋាន​ថ្មី​មួយ​ ​ដើម្បី​ទប់​ស្កាត់​ និង​បញ្ឈប់​អំពើ​ប្រល័យ​ពូជសាសន៍​ ឧក្រិដ្ឋកម្ម​សង្គ្រាម​ ការលុប​បំបាត់​ជាតិ​សាសន៍​ និង​ឧក្រិដ្ឋកម្ម​ប្រឆាំង​មនុស្ស​ជាតិ។​ ​ទំនួល​ខុសត្រូវ​ក្នុងការ​ការ​ពារ​មិន​មែន​ជាច្បាប់​ទេ​ ប៉ុន្តែ​គឺ​ជាការ​ប្តេជ្ញា​ចិត្ត​ផ្នែក​នយោបាយ​ ​ដើម្បី​ណែ​នាំ​រដ្ឋ​នានា​ ​និង​ការ​រៀបចំ​ថ្នាក់​អនុតំបន់​ ​ថ្នាក់​តំបន់​ និង​ថ្នាក់​អន្តរជាតិ​ក្នុង​ការ​ការពារប្រជាជន​ពី​ឧក្រិដ្ឋកម្ម​ ​និង​ការ​រំលោភ​បំពាន​ទាំង​នេះ។​

លោក​បណ្ឌិត Noel Morada ​បាន​លើក​ឡើង​បន្ថែម​ថា​ ​រដ្ឋាភិបាល​កម្ពុជា​ត្រូវសហការ​ជាមួយ​នឹង​អង្គការ​សង្គម​ស៊ីវិល​ ក្នុង​នោះ​មាន​មជ្ឈមណ្ឌល​ឯកសារ​កម្ពុជា​ (DC-CAM) នៅ​ក្នុង​ការ​បណ្តុះ​បណ្តាល​ អប់រំ​ ការ​ស្រាវជ្រាវ​ និង​ការ​បោះពុម្ពផ្សាយ​ អំពី​គោលការណ៍​នៃ​បទដ្ឋាន​ទំនួល​ខុសត្រូវ​ ​ហើយ​កម្ពុជា​ក៏ត្រូវ​សិក្សា​លើ​បញ្ហា​មួយចំនួន​ដែលពាក់​ព័ន្ធ​នឹង​ប្រទេស​កម្ពុជា​ ជា​ពិសេស​គឺបញ្ហា​ ​មនុស្ស​ធម៌​ និង​កិច្ច​គាំពារ​ជនភៀស​ខ្លួន​ និង​ច្បាប់​ស្តីពី​កិច្ចការ​មនុស្ស​ធម៌។

​«ផ្នែក​មួយ​ទៀត​ ដែល​ខ្ញុំគិត​ថា​ ផែនការ​ថ្នាក់​ជាតិ​គួរតែ​ផ្តោត​លើ​នោះ​ គឺ​ការ​កំណត់អត្ត​សញ្ញាណ​ និងឃ្លាំមើល​កត្តាហានិភ័យ​នានា​ និង​ត្រូវ​ធ្វើ​ដូចម្តេច​ដើម្បី​ដោះស្រាយ​កត្តាហានិភ័យ​ទាំងនោះ»។​

​ប្រទេស​កម្ពុជា​នៅ​តែ​ប្រឈម​មុខ​នឹង​សញ្ញា​ ដែ​ល​អាច​ក្លាយ​ជា​កត្តា​ហានិភ័យ​នាំ​ទៅ​រក​ការ​កើត​មាន​អំពើ​ហិង្សា​សារ​ជាថ្មី​ ខណៈ​ដែល​ប្រជាជន​រស់នៅ​ក្នុង​ប្រទេស​ ដែល​នៅ​ពឹង​ផ្អែក​លើ​ជំនួយ​បរទេស​នេះ​ ​កំពុង​ប្រឈម​នឹង​ការ​រំលោភ​បំពាន​សិទ្ធិ​មនុស្ស​ ការ​វាយ​ប្រហារ​នា​នា​ទៅ​លើ​ក្រុម​ជំទាស់​ និង​អំពើ​អយុត្តិធម៌​សង្គម​ផ្សេងៗ​ទៀត។

នេះ​បើ​យោង​ទៅ​តាម​ឯកសារ​បង្ហាញ​ពី​កត្តា​ហានិភ័យ​ដែល​នាំ​ទៅ​រក​ការ​ប្រព្រឹត្ត​អំពើ​ហិង្សា​ឈាន​ដល់​ការ​កាប់​សម្លាប់​យ៉ាង​រង្គាល។​ ឯកសារ​នេះ​ជា​ផ្នែក​មួយ​នៃ​បទដ្ឋាន​ទំនួល​ខុសត្រូវ​ក្នុង​ការ​ការ​ពារ​ ​ ដែល​ត្រូវ​បាន​ចេញ​ផ្សាយដោយ​អង្គការ​សហ​ប្រជាជាតិ​ ​កាលពី​ឆ្នាំ​២០១៤​កន្លង​ទៅ។

​ឯកសារ​ដដែល​នេះ​ ​បាន​ឲ្យ​ដឹង​ពី​កត្តា​ហានិភ័យ​ចំនួន​១៤​ រួម​មាន​កង្វះ​ខាត​ប្រព័ន្ធ​តុលាការ​ឯករាជ្យ​ ការ​ប្រព្រឹត្ត​អំពើ​ពុក​រលួយ​ ​មាន​កម្រិត​ខ្ពស់​ ​អភិបាលកិច្ច​ទន់ខ្សោយ​ ​ការ​រំលោភ​សិទ្ធិ​មនុស្ស​ និង​ភាព​គ្មាន​ទោសពៃរ៍​ គឺ​ជា​ដើម​ចម​នៃ​លទ្ធភាព​ ដែល​អាច​នាំ​ទៅ​រក​ការ​ប្រព្រឹត្ត​អំពើ​ឧក្រិដ្ឋកម្ម​ដ៏​ឃោរឃៅ។

ឯកសារ​នោះ​បន្ត​ទៀត​ថា​ ​ការ​កើន​ឡើង​វោហារ​សាស្ត្រ​មាន​លក្ខណៈ​អុជអាល​ និង​យុទ្ធនាការ​ឃោសនា​ ​ឬ​ក៏​ពាក្យ​សម្តី​មាន​លក្ខណៈ​ស្អប់​ខ្ពើម​ សំដៅ​ទៅ​កាន់​ក្រុម​ដែល​ទទួល​បាន​ការ​ការពារ​ប្រជាជន​ ឬ​បុគ្គល​ក៏​ជា​កត្តា​ហានិភ័យ​ ដែល​អាច​នាំ​ទៅ​ដល់​ការ​ប្រើ​ប្រាស់​អំពើហិង្សា​ និង​ការ​កាប់​សម្លាប់។​

​ក្នុង​រយៈពេល​ប៉ុន្មានខែ​ចុង​ក្រោយ​នេះ​ ប្រជាជន​កម្ពុជា​ ត្រូវ​គេ​សង្កេត​ឃើញ​ថា​ បាន​ឮ​វោហារសាស្ត្រ​នយោបាយ​ ប្រឆាំង​នឹងក្រុម​ដែលមាន​ទស្សនផ្ទុយ​ពីរដ្ឋាភិបាល​កម្ពុជា។​ ​វោហារសាស្ត្រ​ទាំងនោះ​មាន​ដូច​ជា​ «ប្រសិន​បើ​គណបក្ស​កាន់​អំណាច​មិន​អាច​ក្តាប់​អំណាច​ទៀត​ទេ​ សង្គ្រាមនឹងកើត​ឡើង‍»​ «វាយ​បាក់​ធ្មេញ​ក្រុមណា​ដែល​ចង់តវ៉ា​លទ្ធផល​បោះឆ្នោត‍»​ និង​អ្នកតវ៉ា​លទ្ធផល​ឆ្នោតអាច​រងនឹង «គល់​ឬស្សី​‍»។

លោក ពូ សុធីរៈ នាយក​ប្រតិបត្តិ​វិទ្យាសា្ថន​ខ្មែរ​សម្រាប់​សហប្រតិបត្តិការ និង​សន្តិភាព (CICP) ថ្លែង​ក្នុង​ពិធី​បើក​កិច្ចពិភាក្សា​ថ្នាក់​ជាតិ​លើក​ទី២ អំពី​ការទប់ស្កាត់​អំពើ​ឃោរឃៅ​នៅ​កម្ពុជា ដែល​បាន​រៀបចំ​ឡើង​កាលពី​ថ្ងៃ​ ទី ២២ ខែសីហា ឆ្នាំ​ ២០១៧។ (ហ៊ុល រស្មី/VOA)
លោក ពូ សុធីរៈ នាយក​ប្រតិបត្តិ​វិទ្យាសា្ថន​ខ្មែរ​សម្រាប់​សហប្រតិបត្តិការ និង​សន្តិភាព (CICP) ថ្លែង​ក្នុង​ពិធី​បើក​កិច្ចពិភាក្សា​ថ្នាក់​ជាតិ​លើក​ទី២ អំពី​ការទប់ស្កាត់​អំពើ​ឃោរឃៅ​នៅ​កម្ពុជា ដែល​បាន​រៀបចំ​ឡើង​កាលពី​ថ្ងៃ​ ទី ២២ ខែសីហា ឆ្នាំ​ ២០១៧។ (ហ៊ុល រស្មី/VOA)

លោក​ ពូ សុធីរៈ​ នាយក​ប្រតិបត្តិ​វិទ្យាសា្ថន​ខ្មែរ​សម្រាប់​សហប្រតិបត្តិការ​ និង​សន្តិភាព​ ​ថ្លែង​ថា​ ការប្រើ​វោហារសាស្ត្រ​របស់​មេដឹកនាំ​រដ្ឋាភិបាល​ពាក់​ព័ន្ធ​ការ​ផ្ទុះ​ឡើង​សង្គ្រាម​ក្នុង​ស្រុក​ ឬ​ការ​ប្រើ​ពាក្យ​ពេចន៍​ព្រមាន​ផ្សេង​ទៀត​របស់​សមាជិក​រដ្ឋាភិបាល​ ដូចជាការ​វាយបាក់​ធ្មេញ​ នឹង​មិន​ប៉ះពាល់​ដល់​កិច្ច​អនុវត្ត​ន៍​បទដ្ឋាន​ទំនួល​ខុស​ត្រូវ​ក្នុងការ​ការ​ពារនោះឡើយ។

«អីចឹង ​នៅ​ក្នុង​សង្គម​ណា​ក៏​ដោយ​តែង​តែ​មាន​មនុស្ស​ល្អ​និង​មនុស្ស​អាក្រក់។​ ខ្ញុំ​មិនបាន​និយាយ​ថា​អ្នកតវ៉ា​ទាំង​នោះ​សុទ្ធតែ​ជាមនុស្ស​អាក្រក់​ទាំងអស់​នោះ​ទេ។ ខ្ញុំ​មិនបាន​និយាយ​ដូច្នោះ​ទេ។ ខ្ញុំ​គ្រាន់​តែ​និយាយថា​អ្នក​ត្រូវ​តែ​ក្លាយ​ជា​មនុស្ស​ម្នាក់ដែល​ចង់​សាកល្ប​ងនឹង​រដ្ឋ​ ដើម្បី​ធានា​ថា​ច្បាប់​វិន័យ​និង​សណ្តាប់​ធ្នាប់​មាន​ត្រឹមត្រូវ។​ ស្ថិរភាព​មាន​ត្រឹមត្រូវ។ អ្នក​ត្រូវ​តែ​ប្រុងប្រយ័ត្ន។​ អ្នក​មិនអាច​ឲ្យ​គេ​ឃើញ​អ៊ីចឹង​ទេ។​ អ្នក​មិនអាច​គ្រាន់តែ​និយាយ​ថា​រដ្ឋាភិបាល​និយាយ​អ៊ីចេះ​ ហើយ​ពួកគេ​នឹង​ធ្វើ​វា។ មិនមែន​អ៊ីចឹង​ទេ​ រដ្ឋាភិបាល​នឹងចាត់​វិធានការចំពោះ​តែ​មនុស្ស​អាក្រក់​ប៉ុណ្ណោះ»។

លោក​ ពូ សុធីរៈ​ ​បានថ្លែង​បន្ត​ថា៖

«អង្គការ​មិនមែន​រដ្ឋាភិបាល​ជាច្រើន​បាន​មក​រក​ខ្ញុំ​ហើយ​សួរ​ថា​ហេតុអ្វី​បាន​ជា​ខ្លាំ​ង​ម្ល៉េះ?ខ្ញុំ​បាន​និយាយថា​អ្នក​មិនចាំបាច់​បារម្ភ​ទេ បើ​អ្នក​មិន​បាន​ប្រព្រឹត្ត​ខុស។​ សូម​មាន​អាកប្បកិរិយា​សម​ស្រប។ តើ​វា​មាន​ន័យ​យ៉ាង​ដូច​ម្តេច? ​ចូលរួម​ជា​មួយ​រដ្ឋាភិបាល​ឲ្យ​បាន​ត្រឹមត្រូវ ​សួរ​យោ​បល់​រដ្ឋាភិបាល​ផង ​មុនពេល​ដែល​អ្នក​ចាប់ផ្តើម​ធ្វើ​អ្វី​ដែល​មិន​ត្រឹមត្រូវ​។ វា​ពិត​ជា​មាន​ការ​ពិបាក​សម្រាប់​ ភាគីទាំង​សង ខាង​។ ហើយ​ខ្ញុំ​គិត​ថានៅ​លើលោកនេះ​មិនមាន​រដ្ឋាភិបាល​ណា​ដែល​ចង់​បង្កើត​បញ្ហា​នោះ​ទេ។ អ្នក​មិនដែល​រាយការណ៍​ទេ​នៅ​ពេល​ដែល​នាយក​រដ្ឋមន្រ្តី​ហ៊ុន សែន​បាននិយាយ​ថា​ប្រទេស​កម្ពុជា​ចង់​មាន​សន្តិភាព​និង​ស្ថិរភាព។​ វាមិនទាក់​ទាញ។​ បើសិន​ជា​អ្នក​រាយការណ៍​បែប​នោះ​ គ្មាន​អ្នកណា​នឹង​អាន​កាសែត​អ្នកឡើយ»។

ក៏​ប៉ុន្តែ​ លោក​ ​ឡៅ ម៉ុងហៃ អ្នក​វិភាគឯករាជ្យ​យល់​ខុស​ពីការថ្លែង​របស់​លោក​ ពូ សុធីរៈ។​ លោក​បាន​ប្រាប់​ VOA ​នៅ​ក្នុង​ម៉ោង​សម្រាក​នៃ​កិច្ច​ពិភាក្សា​ស្តីពី​ការ​ទប់​ស្កាត់​អំពើ​ឃោរ​ឃៅ​ថា​ មន្ត្រី​រដ្ឋាភិបាលមិន​សម​ណា​ប្រើប្រាស់​ភាសា​គំរាម​កំហែង​យ៉ាង​ដូច្នេះ​ឡើយ។​ ​លោក​ថ្លែង​ថា​ ប្រសិន​បើ​មេដឹកនាំ​កម្ពុជា​បន្តប្រើ​ពាក្យសំដី​ហិង្សា​បែប​នេះ​ កម្ពុជា​ទំនង​មិន​អាច​ជា​ប្រទេស​នាំ​មុខ​គេ​ ក្នុង​ការ​បង្ការ​អំពើ​ឃោរ​ឃៅ​ ​ទោះបី​ជា​រដ្ឋាភិបាល​ប្រទេស​នេះ​ ​បាន​ប្រឹង​ប្រែង​ទប់ស្កាត់​មិន​ឲ្យ​របប​ប្រល័យ​ពូជសាសន៍​ខ្មែរ​ក្រហមវិល​ត្រឡប់​មក​ជាថ្មី​មក​ម្តង​ទៀត។

«ខ្ញុំ​គឺ​មិន​អាច[​ថា] ទៅជា​គំរូ​គេ​ ឬដឹកមុខ​គេ​បាន​ទេ​ បើមេដឹកនាំដែល​និយាយភាសា​អីចឹងៗ​ ហើយ​យក​មក​អាច​ចេញ​ជា​កាយវិការ​ស៊ីសង្វាក់​ជាមួយអាវាចា​ នឹងក៏មានការ​លំបាក​ច្រើន​។​ បើ​អ៊ីចេះ គឺ​គេ​អាច​និយាយបាន​ អាហ្នឹង​គឺ​ ដូច​ជា​និយាយ​ទៅ​ មិន​និយាយ​ជា​សាធារណៈ​ ។​លោក​អាច​ជេរស្តី​នរណា​ក៏ដោយ​ នរណា​ក៏ដោយ​ក៏សម​ តែគ្នា​ឯង​ហ្នឹង​ អាហ្នឹង​បាន​ ជាឯកជន​ មេដឹកនាំ​គឺ​និយាយ​ជាសាធារណៈ​គឺ​ អាហ្នឹង​គឺ​ខ្ញុំ​វិញ​ អត់​និយាយ​ទេ»។

ក្នុង​ពេល​សន្និសីទ​ព័ត៌មាន​បិទបញ្ចប់​ដំណើរ​ទស្សនកិច្ច​រយៈពេល​១០ថ្ងៃ​នៅកម្ពុជា​ដែលបាន​ធ្វើឡើង​កាលពីពាក់កណ្តាល​ខែសីហា​ អ្នកស្រី​ រ៉ូណា ស្មីត​ (Rhona Smith) ​ប្រេសិត​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅកម្ពុជា​ បាន​សម្តែងក្តី​បារម្ភ​ អំពី​វោហា​សាស្ត្រ​បែប​ហិង្សា​ ដែល​សម្តែង​ឡើង​ដោយ​សមាជិក​រដ្ឋាភិបាល​ និង​យោធា។​

អ្នកស្រី​បញ្ជាក់​ថា​ មតិ​យោបល់​បែប​នេះ​ មិន​គួរ​ត្រូវ​បាន​ធ្វើឡើង​ដោយ​រដ្ឋមន្ត្រី​នៃ​រដ្ឋាភិបាល​ឡើយ​ សូម្បី​តែ​នៅ​ក្នុង​ភាព​ជា​ឯកជន​ក៏​ដោយ។​ មតិ​យោបល់​បែប​នេះ​ មិន​ត្រូវ​ឲ្យ​មាន​នៅក្នុង​សង្គម​ដែល​មាន​សន្តិភាព​មួយ​ ដូច​ជា​នៅ​ក្នុង​ប្រទេស​កម្ពុជា​ ដែល​នៅ​ដិតដាម​ដោយ​ស្លាកស្នាម​នៃ​ប្រវត្តិសាស្ត្រ​ដ៏​ចលាចល​របស់​ខ្លួន។​

​យ៉ាងណាក៏ដោយ​ អ្នកស្រីសង្ឃឹម​ថា​ ប្រទេស​កម្ពុជា​ នឹង​ខិត​ចេញ​ពី​ស្ថានភាព​គ្រោះថ្នាក់​ ដោយ​មិន​ឲ្យ​មាន​ទៀត​នូវការ​គំរាម​កំហែង​នៃ​អំពើ​ហិង្សា​ ការ​បង្ក្រាប​ការ​បះបោរ​ដោយ​ប្រើ​កម្លាំង​ ឬ​សង្គ្រាម​ ឬ​សេចក្តី​ថ្លែង​មាន​លក្ខណៈ​អុច​អាល​ពូជ​សាសន៍៕

អត្ថបទ​ទាក់ទង

XS
SM
MD
LG