សកម្មជនសង្ឃល្បីឈ្មោះ គឺព្រះអង្គ លួន សុវ៉ាត ដែលរងការចោទប្រកាន់ថាសន្ទនាស្នេហាជាមួយមនុស្សស្រីមួយចំនួន បានច្រានចោលការចោទប្រកាន់នានាលើព្រះអង្គ ដោយអះអាងថា មានការដាក់បញ្ចូលជារូបភាពនិងសំឡេង និងក្លែងបន្លំហ្វេសប៊ុករបស់ព្រះអង្គ។
កាលពីថ្ងៃទី៣ ខែមិថុនា ព្រះមេគណខេត្តសៀមរាប ព្រះអង្គ ជុំ គឹមឡេង បានប្រកាសសម្រេចឲ្យផ្សឹកសកម្មជនសង្ឃល្បីឈ្មោះគឺព្រះអង្គ លួន សុវ៉ាត ដែលរងការចោទប្រកាន់ថា សន្ទនាស្នេហាជាមួយមនុស្សស្រីមួយចំនួន ក្នុងវីដេអូដែលជាការខលតាមប្រព័ន្ធសង្គមហ្វេសប៊ុក មានឈ្មោះព្រះអង្គជាភាសាខ្មែរ «លួន សុវ៉ាត»។
សង្ឃសម្រេចនេះបញ្ជាក់ថា ក្រោយថ្ងៃចេញប្រកាសនេះ បើព្រះអង្គ លួន សុវ៉ាត នៅតែបន្តគ្រងស្បងចីវរជាបព្វជិត ដូចអ្នកបួសក្នុងព្រះពុទ្ធសាសនានោះ ព្រះអង្គនឹងត្រូវចាត់ទុកថា «ប្រព្រឹត្តក្លែងភេទ»។ ក្នុងករណីនេះ មេគណខេត្តសៀមរាបក៏ស្នើសមត្ថកិច្ចពាក់ព័ន្ធចាត់វិធានការតាមច្បាប់។
បើតាមសង្ឃសម្រេចនេះ ការប្រកាសឲ្យផ្សឹកនេះកើតមានឡើង ក្រោយអង្គប្រជុំថេរសភាខេត្តសៀមរាប បានស្តាប់វីដេអូសារសំឡេងដែលប្រកាសថា ជាការ«សន្ទនារៀបរាប់ពីសេចក្តីស្នេហាយ៉ាងស៊ីជម្រៅរវាងភិក្ខុ លួន សុវ៉ាត ជាមួយស្រ្តីជាម្តាយនិងកូនស្រី»។ ព្រះមេគណខេត្តសៀមរាបក៏បានបញ្ជាក់ក្នុងសេចក្តីសម្រេចថា ការឲ្យផ្សឹកនេះសម្រេចឡើង ក្រោយការស្តាប់កំណត់ហេតុនៃការបំភ្លឺរបស់កូនស្រីមួយរូប ដែលមាននៅក្នុងវីដេអូនោះ។
មួយសប្តាហ៍ក្រោយមក ក្នុងសេចក្តីប្រកាសព័ត៌មានមួយដែលបង្ហោះលើប្រព័ន្ធសង្គមហ្វេសប៊ុករបស់ព្រះអង្គ លួន សុវ៉ាត ដែលមានឈ្មោះខ្មែរផង អង់គ្លេសផងនិងទំព័រហ្វេសប៊ុករបស់ព្រះអង្គ ព្រះអង្គ មានសង្ឃដីកាថា ព្រះអង្គកំពុងគង់នៅកន្លែងមានសុវត្ថិភាពមួយ។ ព្រះអង្គហៅក្រុមដែលវាយប្រហារលើព្រះអង្គថាជា «ក្រពើ ខ្លា»។ ព្រះអង្គក៏បានបដិសេធការចោទប្រកាន់នានា។
ព្រះអង្គមានសង្ឃដីកាថា៖ «អាត្មាភាពសូមធ្វើការបដិសេធចោលទាំងស្រុងរាល់ការចោទប្រកាន់ មូលបង្កាច់ លាបពណ៌ ប្រឌិតព័ត៌មានក្លែងក្លាយ កាត់តយករូបភាពអ្នកដទៃ និងសំឡេងមកថតបញ្ចូលគ្នាក្នុងហ្វេសប៊ុក ឲ្យកើតទៅជាសាច់រឿងមួយដែលខុសការណ៍ពិត»។
ព្រះអង្គចាត់ទុករឿងទាំងអស់នេះគឺជា «រឿងនយោបាយទាំងស្រុង» ដោយសារការក្នុងសម្រេចផ្សឹកព្រះអង្គនេះ អ្នកពាក់ព័ន្ធមិនបានទុកពេលស៊ើបអង្កេត រកភស្តុតាងបទល្មើសជាក់ស្តែងពិតប្រាកដណាមួយទេ គឺគ្រាន់តែពឹងផ្អែកលើសំឡេងនិងហ្វេសប៊ុកក្លែងក្លាយ យកមកធ្វើជាគោលនៃសេចក្តីសម្រេច។
ព្រះអង្គបន្ថែមថា៖ «ភ័ស្តុតាងដែលរឹងមាំអាចថាយកជាផ្លូវការបានស្ទើរ១០០ភាគរយគឺ បើមានជាវីដេអូសកម្មភាពជាក់ស្តែង។ ប្រសិនបើមានវីដេអូជាក់ស្តែងណាមួយដែលបានប្រព្រឹត្តខុសឆ្គងដូចការចោទប្រកាន់ខាងលើមកលើអាត្មាភាពមែននោះ អាត្មានឹងទទួលយកទោសកំហុសទៅតាមវីដេអូសកម្មភាពជាក់ស្តែងទាំងនោះ។ ប៉ុន្តែបើគ្រាន់តែជាសំឡេងជារូបភាពកាត់តទេ គឺអាត្មាមិនអាចទទួលយកបានទេ»។
VOA មិនអាចទាក់ទងព្រះមេគណខេត្តសៀមរាប ព្រះអង្គ ជុំ គឹមឡេង ដើម្បីសុំការអត្ថាធិប្បាយបានទេនៅថ្ងៃពុធនេះ។
លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងកិច្ចការសាសនា ថ្លែងប្រាប់ VOA នៅថ្ងៃពុធនេះថា ព្រះអង្គ លួន សុវ៉ាត មិនគួរបង្ហោះសារតាមហ្វេសប៊ុកនោះទេ។ លោកបន្តថា ប្រសិនបើព្រះអង្គគិតថាព្រះអង្គមិនមានកំហុស ព្រះអង្គគួរតែទៅបកស្រាយនៅមុខគណៈសង្ឃខេត្តសៀមរាប ហើយមិនត្រូវគេចខ្លួននោះទេ។
លោកមានប្រសាសន៍ថា៖ «គេមានសាក្សីត្រឹមត្រូវ។ គេមានទឡ្ហីករណ៍ត្រឹមត្រូវបានគេចេញសេចក្តីសម្រេចហ្នឹង»។
វីដេអូយ៉ាងតិចចំនួន៤ ដែលមានការចោទប្រកាន់ថា ជាសំឡេងរបស់ព្រះអង្គ លួន សុវ៉ាត ត្រូវបានបង្ហោះលើទំព័រហ្វេសប៊ុកមួយឈ្មោះ Srey Da Chi-Kraeng។ នេះជាទំព័រហ្វេសប៊ុកដែលទើបត្រូវបានបង្កើតឡើង កាលពីថ្ងៃទី៣០ ខែឧសភា ឆ្នាំ២០២០នេះ ដែលមានអ្នកចុច Likes ទៅដល់ជាង ១ពាន់នាក់។ វីដេអូមួយក្នុងចំណោមវីដេអូផ្សេងទៀត ដែលមានរយៈពេលជាង ៧នាទី ជាវីដេអូថតចេញពីការខលសន្ទនាគ្នាតាមប្រព័ន្ធសង្គមហ្វេសប៊ុក ដែលមានឈ្មោះជាភាសាខ្មែរ «លួន សុវ៉ាត»។ ការសន្ទនាគ្នានេះមាននិយាយទាក់ទងនឹងស្នេហា ការប្រើប្រាស់ពាក្យពេចន៍ដូចជាម៉ាស្សា ឈឺខ្នង ឈឺចង្កេះ និងការហៅមកជួបគ្នាផងដែរ។
បើតាមព្រះអង្គ លួន សុវ៉ាត ក្រោយថ្ងៃចេញសេចក្តីសម្រេចឲ្យចាប់ផ្សឹកព្រះអង្គ ប៉ូលិសខេត្តសៀមរាបបានចុះទៅឆែកឆេរផ្ទះព្រះអង្គ និងរឹបអូសទ្រព្យសម្បត្តិមួយចំនួនផងដែរ។ ព្រះអង្គមានសង្ឃដីកាថា សមត្ថកិច្ចបាននាំខ្លួនក្មួយប្រុសរបស់ព្រះអង្គ ២ នាក់ ទៅសាកសួរនៅស្នងការខេត្ត ហើយវាយខ្នោះដៃ និងឃុំខ្លួនក្មួយម្នាក់១យប់២ថ្ងៃ ទើបមានការដោះលែង។
ព្រះអង្គបន្តថា ក្រុមប៉ូលិសក៏បានឆែកឆេរផ្ទះនិងរឹបអូសទ្រព្យសម្បត្តិឯកជន នៅភូមិកំណើតក្នុងឃុំជីក្រែង ស្រុកជីក្រែង ខេត្តសៀមរាប កាលពីថ្ងៃ៧ ខែមិថុនា ដោយដកហូតទូរស័ព្ទ រថយន្ត Lexus 470 មួយគ្រឿង កាមេរ៉ាជិត ១០ គ្រឿង ទូរទស្សន៍ ១ គ្រឿង ទូរទឹកក ធុងទឹកកក និងឯកសារមួយចំនួនទៀត។ ព្រះអង្គបន្ថែមថា ទ្រព្យសម្បត្តិដែលដកហូតរក្សាទុក មិនទាន់ប្រគល់ឲ្យវិញទេ។
លោក ទិត្យ ណារ៉ុង ស្នងការនគរបាលខេត្តសៀមរាបបញ្ជាក់ថា ពិតជាមានការចុះទៅឆែកឆេរផ្ទះសាច់ញាតិរបស់ព្រះអង្គ លួន សុវ៉ាត និងរឹបអូសទ្រព្យសម្បតិ្តមួយចំនួន ប៉ុន្តែលោកហាក់ស្ទាក់ស្ទើរក្នុងការបញ្ជាក់បន្ថែម។
លោកមានប្រសាសន៍ថា៖ «ខាងតុលាការ គេយករបស់ដើម្បីត្រួតពិនិត្យ។ សម្ភារៈដែលព្រះអង្គធ្លាប់ប្រើ វាពាក់ព័ន្ធអីខ្លះ។ គេរកការពិត ដើម្បីកុំឲ្យគេចោទលោកយ៉ាងម៉េចអីយ៉ាងម៉េច»។
នៅពេលសួរថា តើព្រះអង្គ លួន សុវ៉ាត ស្ថិតនៅក្រោមការសង្ស័យប្រព្រឹត្តបទល្មើសអ្វី លោក ណារ៉ុង បញ្ជាក់ថា៖ «អត់មានប្រព្រឹត្តអីខុសទេ ព្រោះវាទាក់ទងគេបង្ហោះហ្វេសប៊ុករបស់លោក ហើយលោកបានគេចព្រះកាយ ព្រះអីចេញទៅ»។
លោកបន្តថា សម្ភារៈទាំងនោះនឹងត្រូវបញ្ជូនមកភ្នំពេញដើម្បីឲ្យមន្រ្តីជំនាញពិនិត្យមើល។
អ្នកនាំពាក្យតុលាការខេត្តសៀមរាបលោក យិន ស្រាង មានប្រសាសន៍ថា ការចុះឆែកឆែរនោះមានដីកាពីតុលាការ។ ប៉ុន្តែលោកមិនអាចបញ្ជាក់ថា តើសង្ស័យការប្រព្រឹត្តបទល្មើសអ្វីនោះទេ។ លោកថានេះជា «ការអង្កេតបឋម»។
លោកបង្វែរសំណួរទៅអ្នកនាំពាក្យម្នាក់ទៀតគឺលោក ជួន សុបញ្ញា។
លោក ជួន សុបញ្ញា អ្នកនាំពាក្យរបស់តុលាការខេត្តសៀមរាបមួយរូបទៀត មានប្រសាសន៍ថា លោករង់ចាំរបាយការណ៍របស់ប៉ូលិសសិន។ នៅពេលសួរថា តើតុលាការមានបានចេញដីកាឆែកឆេរផ្ទះរបស់ព្រះអង្គ លួន សុវ៉ាត ឬយ៉ាងណា លោកមិនបញ្ជាក់នោះទេ គ្រាន់តែថា លោករង់ចាំរបាយការណ៍របស់ប៉ូលិសជាមុនសិន។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការការពារសិទ្ធិមនុស្សលីកាដូ ដែលមានក្រុមការងារតាមដានករណីនេះ មានប្រសាសន៍ថា ការនាំមនុស្សទៅសាកសួរ និងរឹបអូសទ្រព្យសម្បត្តិរបស់ក្រុមគ្រួសារ គឺជាការគួរឲ្យសង្ស័យមួយ។ លោកបង្ហាញការងឿងឆ្ងល់ថា មានពាក់ព័ន្ធនឹងបទល្មើសអ្វី ពីព្រោះកន្លងទៅគ្រាន់តែមានការចោទប្រកាន់រឿងសន្ទនាស្នេហា ប៉ុន្តែមិនទាន់មានការស៊ើបអង្កេតឲ្យបានច្បាស់នៅឡើយទេ។
លោកមានប្រសាសន៍ថា៖ «បើសិនជាទាក់ទងនឹងពុទ្ធសាសនា បានន័យថា ខុសវិន័យសង្ឃ។ វាជារឿងមួយទាក់ទងតែរឿងសង្ឃទេ។ វាអត់មានបទល្មើសអីដែលត្រូវទៅឆែកឆេរ ដកហូតទ្រព្យសម្បត្តិ ដកហូតវត្ថុតាងអីទេ។ អាហ្នឹងទាល់វាមានបទល្មើសអីមួយកើតឡើង»។
កាលពីឆ្នាំ ២០១២ ព្រះតេជគុណ លួន សុវ៉ាត បានទទួលរង្វាន់អ្នកការពារសិទ្ធិមនុស្សអន្តរជាតិ (Martin Ennels Award) ដ៏ល្បីនៅទីក្រុងហ្សឺណែវ ប្រទេសស្វីស។ ព្រះអង្គធ្លាប់ចេញព្រះភក្ត្រនៅកន្លែងតវ៉ានានា ពាក់ព័ន្ធនឹងជម្លោះដីធ្លី និងការទាមទាររកយុត្តិធម៌ផ្សេងៗ។ ព្រះអង្គតែងតែប្រើប្រាស់ទូរស័ព្ទដៃ ដើម្បីថតនិងផ្សាយផ្ទាល់តាមរយៈទំព័រហ្វេសប៊ុករបស់ព្រះអង្គ ដែលមានអ្នកចុច Likes រហូតទៅដល់ជាង ១០ ម៉ឺននាក់៕
