ប្រធានាធិបតីអាមេរិកលោក Donald Trump បានប្រាប់អ្នកកាសែតកាលពីថ្ងៃពុធម្សិលមិញថា ពន្ធគយដែលសហរដ្ឋអាមេរិកយកលើទំនិញរបស់ប្រទេសចិនទំនងជានៅតែដដែលមួយរយៈពេលសិន ទោះបីជាកិច្ចព្រមព្រៀងពាណិជ្ជកម្មរវាងប្រទេសទាំងពីរត្រូវបានសម្រេចឡើងក៏ដោយ។
លោក Trump បាននិយាយដូច្នេះថា៖ «ការចរចាកិច្ចព្រមព្រៀងពាណិជ្ជកម្មកំពុងដំណើរការល្អ»។ លោកបានបន្ថែមថា៖ «យើងបានចំណូលពីពន្ធគយរាប់ពាន់លានដុល្លារនៅពេលឥឡូវនេះ និងសម្រាប់រយៈពេលមួយចំនួនបន្ថែមទៀត»។
ការលើកឡើងរបស់លោក Trump បានបង្ហាញថា ទោះបីជាកិច្ចព្រមព្រៀងពាណិជ្ជកម្មត្រូវបានសម្រេចបានក៏ដោយ ក៏ពន្ធគយដែលរដ្ឋាភិបាលក្រុងវ៉ាស៊ីនតោនយកលើទំនិញចិន អាចនៅដដែល រហូតទាល់តែមន្ត្រីអាមេរិកាំងជឿថា ចិនគោរពទៅតាមលក្ខខណ្ឌនៃកិច្ចព្រមព្រៀង។
លោក Robert Lighthizer អ្នកតំណាងពាណិជ្ជកម្មសហរដ្ឋអាមេរិក និងលោក Steven Mnuchin រដ្ឋមន្ត្រីពាណិជ្ជកម្ម នឹងចូលរួមចរចាពាណិជ្ជកម្មកម្រិតខ្ពស់លើកទី ៨ នៅទីក្រុងប៉េកាំង ប្រទេសចិន នៅថ្ងៃព្រហស្បតិ៍ និងថ្ងៃសុក្រសប្ដាហ៍ក្រោយ។ នេះបើតាមការបញ្ជាក់របស់លោក Gao Feng អ្នកនាំពាក្យក្រសួងពាណិជ្ជកម្មចិន។
លោក Gao Feng បានបន្ថែមថា ឧបនាយករដ្ឋមន្ត្រីចិនលោក Liu He នឹងជួបជាមួយនឹងមន្ត្រីអាមេរិកនៅក្នុងរដ្ឋធានីវ៉ាស៊ីនតោន នៅដើមខែមេសាខាងមុខនេះ។
ជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន បានចាប់ផ្ដើមកាលពីឆ្នាំមុន បន្ទាប់ពីសហរដ្ឋអាមេរិកមិនពេញចិត្តទៅនឹងបញ្ហាមួយចំនួន ដែលក្នុងនោះមានទាំងការប្រឡូករបស់ចិននៅក្នុងការលួចព័ត៌មានពាណិជ្ជកម្មសម្ងាត់របស់សហរដ្ឋអាមេរិក និងការបង្ខំរបស់ចិនឲ្យក្រុមហ៊ុននានាផ្ទេរបច្ចេកវិទ្យាដល់ខ្លួន ដើម្បីបានលទ្ធភាពចូលទៅទីផ្សាររបស់ខ្លួនជាដើម៕
