ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អឺរ៉ុប​ស្វះស្វែង​រក​វិធី​ទប់ស្កាត់​ការ​រាតត្បាត​​កូវីដ១៩​ជា​ថ្មី ​នៅ​ជិត​ថ្ងៃ​បុណ្យ​រដូវ​ត្រជាក់


រូបឯកសារ៖ អ្នកដំណើរ​ម្នាក់​ក្រឡេកមើល​កញ្ចក់​ផ្ដល់​​ព័ត៌មាន​​មួយ នៅ​អាកាសយានដ្ឋាន​​អន្តរជាតិ Newark Liberty ថ្ងៃទី២៩ ខែមិថុនា ឆ្នាំ២០១៦។

ប្រទេស​អង់គ្លេស​បាន​ប្រកាស​នៅ​ថ្ងៃ​អង្គារ​ថា ​អ្នក​ដំណើរ​មក​ពី​បរទេស​អាច​ធ្វើ​ចត្តាឡីស័ក​តិចជាង​១៤​ថ្ងៃ ប្រសិន​បើ​ការ​ធ្វើ​តេស្តឃើញ​អវិជ្ជមានកូវីដ១៩ ​បន្ទាប់​ពី​ពួកគេ​បាន​មក​ដល់​ប៉ុន្មាន​ថ្ងៃ។​ ច្បាប់​នា​ពេល​បច្ចុប្បន្ន​តម្រូវ​ឱ្យ​មាន​ការ​នៅ​ដាច់​ពី​គេ​រយៈ​ពេល​១៤​ថ្ងៃ។ ​ចាប់​ពី​ថ្ងៃ​ទី​១៥​ ខែ​ធ្នូ អ្នក​ធ្វើ​ដំណើរ​នឹង​មាន​ជម្រើស​បង់​ថ្លៃ​ការ​ធ្វើ​តេស្ត​បន្ទាប់​ពី​រយៈពេល​៥​ថ្ងៃ ​ហើយ​ប្រសិន​បើ​ការ​ធ្វើ​តេស្ត​អវិជ្ជមាន​ពួកគេ​នឹង​មានជម្រើស​ក្នុង​ការ​បញ្ចប់​ភាពនៅដាច់​ពី​គេ។​

ចំណែក​នៅ​ប្រទេស​អាល្លឺម៉ង់​វិញ មន្រ្តី​នៅ​ក្នុង​រដ្ឋ​ចំនួន​១៦​កំពុង​គិតគូរ​អំពី​បុណ្យ​ណូអែល​និង​រក​វិធី​ដើម្បី​ធ្វើ​ឱ្យ​មាន​សុវត្ថិភាព​សម្រាប់​ក្រុមគ្រួសារ​ជួបជុំគ្នា។​

រដ្ឋនានា​បាន​ឯកភាព​គ្នា​លើ​សំណើរ​រឹតបន្តឹង​សកម្មភាព​សង្គម​នៅ​ប៉ុន្មានសប្តាហ៍​មុន​ថ្ងៃឈប់​សម្រាក​ដើម្បី​បន្ថយ​ការ​រីក​រាលដាល​វីរុស​នេះ​ ហើយ​បន្ទាប់​មក​បន្ធូរបន្ថយ​ច្បាប់​ដើម្បី​អនុញ្ញាត​ឱ្យ​មាន​ការ​ជួប​ជុំ​ក្រុម​តូចៗ។​ មន្ត្រី​គ្រោង​នឹង​ពិភាក្សា​អំពី​ផែនការ​នេះ​ជាមួយ​អធិការបតី​អាល្លឺម៉ង់​អ្នកស្រី ​Angela Merkel​ នៅ​ថ្ងៃ​ពុធ។​

នាយក​រដ្ឋមន្រ្តី​អ៊ីតាលី​លោក​ Giuseppe Conte​ បាន​សម្តែង​ការ​ព្រួយ​បារម្ភ​អំពី​បុណ្យ​ណូអែល​ដោយ​និយាយ​នៅ​ថ្ងៃអង្គារថា ពលរដ្ឋ​មិន​គួរ​មាន​គម្រោង​ធ្វើ​ដំណើរទៅ​ជិះស្គី​ទេ។​

ប្រទេស​អ៊ីតាលី​គឺ​ជា​ប្រទេស​មួយ​ដែល​រងគ្រោះ​ខ្លាំង​ជាងគេ​បំផុត​នៅ​ដំណាក់កាល​ដំបូង​នៃ​ជំងឺ​រាតត្បាត​នេះ​ ហើយ​កាល​ពី​ថ្ងៃច័ន្ទ​បាន​ក្លាយ​ជា​ប្រទេស​ទី​៦​លើ​ពិភព​លោក​ដែល​មាន​ចំនួន​អ្នកស្លាប់​លើស​៥០.០០០​នាក់។​ អេស្ប៉ាញ​ដែល​ជាកន្លែង​ផ្ទុះ​រាតត្បាតដំបូង​មួយ​ទៀត​ ត្រូវ​បាន​គេមើល​ឃើញ​ថា​ មានការ​ធ្លាក់ចុះ​យ៉ាងខ្លាំង​នៃ​វិស័យ​ទេសចរណ៍​នៅ​តំបន់​ជាច្រើន៕

XS
SM
MD
LG