ប្រទេសនានាកំពុងចាប់ផ្តើមដាក់ចេញនូវផែនការចែកចាយវ៉ាក់សាំងបង្ការជំងឺកូវីដ១៩ កាលពីថ្ងៃអាទិត្យ ដោយប្រទេសអាល្លឺម៉ង់និងសហរដ្ឋអាមេរិកកំពុងត្រៀមចាក់វ៉ាក់សាំងដល់ពលរដ្ឋមួយចំនួននៅដើមខែក្រោយ។
លោក Jens Spahn រដ្ឋមន្ត្រីក្រសួងសុខាភិបាលអាល្លឺម៉ង់ បានប្រាប់អ្នកយកព័ត៌មានកាលពីថ្ងៃអាទិត្យម្សិលមិញថា៖ «មានហេតុផលដែលត្រូវមានសុទិដ្ឋិនិយម» ថា វ៉ាក់សាំងនោះនឹងត្រូវបានអនុញ្ញាតនៅក្នុងទ្វីបអឺរ៉ុបមុនដំណាច់ឆ្នាំនេះ ហើយថា បន្ទាប់ពីមានការអនុញ្ញាត ការចាក់វ៉ាក់សាំងអាចចាប់ផ្តើម «ភ្លាមៗ» តែម្ដង។
សហរដ្ឋអាមេរិកបានដាក់គម្រោងដំបូងដើម្បីចាប់ផ្តើមចាក់វ៉ាក់សាំងលើក្រុមពលរដ្ឋមួយចំនួនលឿនបំផុតនៅត្រឹមថ្ងៃទី ១២ ខែធ្នូ ខាងមុខ គឺក្នុងពេល ២ ថ្ងៃក្រោយមក បន្ទាប់ពីទីភ្នាក់ងារម្ហូបអាហារនិងឱសថរបស់សហរដ្ឋអាមេរិកមានគម្រោងពិនិត្យលើវ៉ាក់សាំងរបស់ក្រុមហ៊ុន Pfizer។
នៅឯសន្និសីទកំពូល G20 កាលពីចុងសប្តាហ៍កន្លងទៅនេះ បណ្ដាមេដឹកនាំនៅក្នុងកិច្ចប្រជុំនោះបានសន្យាធ្វើការរួមគ្នាដើម្បីធានាថា ប្រជាពលរដ្ឋក្រីក្រនិងងាយរងគ្រោះបំផុតនៅលើពិភពលោកនឹងទទួលបានវ៉ាក់សាំងបង្ការជំងឺកូវីដ១៩ នេះដែរ។
មនុស្សជាង ៥៨ លាននាក់នៅទូទាំងពិភពលោកបានឆ្លងជំងឺកូវីដ១៩ ហើយមនុស្សជាង ១ លាន ៣ សែននាក់បានស្លាប់ដោយសារជំងឺនេះ។ នេះបើយោងតាមទិន្នន័យរបស់សាកលវិទ្យាល័យ Johns Hopkins នៅព្រឹកថ្ងៃចន្ទនេះ។
សហរដ្ឋអាមេរិកនៅតែបន្តនាំមុខគេលើពិភពលោក ដោយមានការឆ្លងជំងឺនេះជាង ១២ លានករណី។ បន្ទាប់ពីនេះគឺប្រទេសឥណ្ឌា ដែលមានការឆ្លងចំនួនជាង ៩ លានករណី និងប្រទេសប្រេស៊ីលដែលមានការឆ្លងចំនួនជាង ៦ លានករណី៕
