សហភាពអឺរ៉ុបបានប្រកាសនៅថ្ងៃពុធនេះអំពីកិច្ចព្រមព្រៀងបណ្តោះអាសន្នមួយនៅក្នុងការកាត់បន្ថយការបញ្ចេញឧស្ម័នទៅក្នុងបរិយាកាសនៅក្នុងសហភាពអឺរ៉ុបឲ្យបាន ៥៥% នៅត្រឹមឆ្នាំ ២០៣០។
គោលដៅឆ្នាំ ២០៣០ នេះ គឺជាផ្នែកមួយនៃគោលដៅទាំងមូលក្នុងការធ្វើឲ្យសហភាពអឺរ៉ុបក្លាយជាតំបន់មួយ ដែលការបញ្ចេញសារធាតុកាបូនទៅក្នុងបរិយាកាសមានតុល្យភាព នៅត្រឹមឆ្នាំ ២០៥០។
ប្រធានគណៈកម្មការអឺរ៉ុបនៃសហភាពអឺរ៉ុប អ្នកស្រី Ursula von der Leyen បាននិយាយថា កិច្ចព្រមព្រៀងនេះធ្វើឲ្យសហភាពអឺរ៉ុបទាំងមូល «ស្ថិតនៅលើមាគ៌ាមួយឆ្ពោះទៅកាន់ការការពារបរិស្ថាន សម្រាប់ជំនាន់មនុស្សទាំងមូល»។
អ្នកស្រីបានបន្ថែមថា៖ «វាគឺជាការសន្យាដែលត្រូវប្រតិបត្តិតាមរបស់យើងចំពោះកូនចៅរបស់យើង»។
មុននឹងកិច្ចព្រមព្រៀងនេះក្លាយជាផ្លូវការ ប្រទេសជាសមាជិកសហភាពអឺរ៉ុបចាំបាច់ត្រូវតែអនុម័តលើកិច្ចព្រមព្រៀងនេះជាមុន។
កិច្ចព្រមព្រៀងនេះបានធ្វើឡើងនៅមុនពេលកិច្ចប្រជុំតាមអនឡាញរយៈពេល ២ ថ្ងៃ ស្ដីពីការប្រែប្រួលអាកាសធាតុ ដែលរៀបចំឡើងដោយប្រធានាធិបតីសហរដ្ឋអាមេរិកលោក Joe Biden ចូលមកដល់នៅថ្ងៃព្រហស្បតិ៍ស្អែក៕
