ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សហភាព​អឺរ៉ុប​ចុះ​ហត្ថលេខា​ជាមួយ​ចក្រភព​អង់គ្លេស​លើ​កិច្ច​ព្រមព្រៀង​ពាណិជ្ជកម្ម Brexit


នាយករដ្ឋមន្ត្រី​អង់គ្លេស​លោក Boris Johnson ចុះ​ហត្ថលេខា​លើ​កិច្ចព្រមព្រៀង​ពាណិជ្ជកម្ម​ជាមួយ​នឹង​សហភាព​អឺរ៉ុប​នៅ​ឯ​វិមាន​ប្រធានាធិបតី​អង់គ្លេស​ក្នុង​ទីក្រុង​ឡុងដ៍ ប្រទេស​អង់គ្លេស ថ្ងៃទី៣០ ខែធ្នូ ឆ្នាំ២០២០។

កាល​ពី​ថ្ងៃ​ពុធ មេដឹកនាំ​សហភាព​អឺរ៉ុប​បាន​ចុះ​ហត្ថលេខា​លើ​កិច្ច​ព្រមព្រៀង​ពាណិជ្ជកម្ម​ជាមួយ​ចក្រភព​អង់គ្លេស​សម្រាប់​ក្រោយ​ពេល​ដែល​អង់គ្លេស​ចាកចេញ​ពី​សហភាព​អឺរ៉ុប។

ប្រធាន​គណៈកម្មការ​សហភាព​អឺរ៉ុប​អ្នកស្រី Ursula von der Leyen និង​ប្រធាន​ក្រុមប្រឹក្សា​សហភាព​អឺរ៉ុប​លោក Charles Michel បាន​ញញឹម​ក្នុង​ពិធី​ចុះ​ហត្ថលេខា​របស់​ពួកគេ​លើ​ឯកសារ​នៃ​កិច្ច​ព្រមព្រៀង​ពាណិជ្ជកម្ម​និង​សហ​ប្រតិបត្តិការ ដែល​មាន​កម្រាស់ ១.២៤៦ ទំព័រ​នេះ។

អ្នកស្រី von der Leyen និយាយ​ថា៖ «វា​ជា​ដំណើរ​ដ៏​វែង​ឆ្ងាយ​មួយ។ ឥឡូវ​នេះ​គឺជា​ពេល​ដែល​យើង​ត្រូវ​បិទ​បញ្ចប់​នូវ​រឿង​ចាកចេញ​របស់​អង់គ្លេស​នេះ​ហើយ។ អនាគត​របស់​យើង​ត្រូវ​បាន​បង្កើត​ឡើង​នៅ​ក្នុង [សហភាព] អឺរ៉ុប»។

ចក្រភព​អង់គ្លេស​នឹង​ចាកចេញ​ជា​ផ្លូវការ​ពី​សហភាព​អឺរ៉ុប​នៅ​ម៉ោង ១១ យប់ ម៉ោង​សាកល នៅ​ថ្ងៃ​ព្រហស្បតិ៍ ទី ៣១ ខែ​ធ្នូ ឆ្នាំ ២០២០ នេះ។ ការ​ចាកចេញ​នេះ​នឹង​ចូល​ជា​ធរមាន​នៅ​ថ្ងៃ​សុក្រ ទី ១ ខែ​មករា ឆ្នាំ ២០២១ ខាង​មុខ។

នាយករដ្ឋមន្រ្តី​ចក្រភព​អង់គ្លេស​លោក Boris Johnson បាន​សន្យា​កាល​ពី​ថ្ងៃ​ពុធ​ថា ចក្រភព​អង់គ្លេស​នឹង​ធ្វើ​ការ​ដោយ​ជិតស្និទ្ធ​ជាមួយ​នឹង​សហភាព​អឺរ៉ុប ក្រោយ​ការ​ចាកចេញ​ជា​ផ្លូវការ​នេះ ស្របពេល​ដែល​សមាជិក​សភា​អង់គ្លេស​កំពុង​ពិភាក្សា​គ្នា​អំពី​កិច្ច​ព្រមព្រៀង​ពាណិជ្ជកម្ម​ដ៏​សំខាន់​មួយ​នេះ។

លោកJohnson បាន​ប្រាប់​រដ្ឋសភា​អង់គ្លេស​ថា៖ «ជាមួយ​នឹង​ច្បាប់​នេះ ចក្រភព​អង់គ្លេស​នឹង​ក្លាយជា​មិត្ត​ជិត​ខាង​របស់​សហភាព​អឺរ៉ុប ដែល​ជា​មិត្ត​និង​ជា​សម្ព័ន្ធ​មិត្ត​ដ៏​ល្អ​បំផុត​មួយ​ដែល​សហភាព​អឺរ៉ុប​មាន»។

លោក​បាន​បន្ត​ថា រដ្ឋាភិបាល​អង់គ្លេស​និង​សហភាព​អឺរ៉ុប​នឹង​ធ្វើការ​រួម​គ្នា​សម្រាប់ «តម្លៃ​និង​ផល​ប្រយោជន៍​រួម​របស់​យើង»៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG