កិច្ចព្រមព្រៀងវិនិយោគរវាងសហភាពអឺរ៉ុបនិងប្រទេសចិន ដែលសម្រេចបានកាលពីថ្ងៃពុធ នឹងផ្តល់នូវលទ្ធភាពមិនធ្លាប់មានពីមុនមកដល់ក្រុមហ៊ុននានានៅទ្វីបអឺរ៉ុបឲ្យប្រើប្រាស់ទីផ្សាររបស់ចិន ដោយរដ្ឋាភិបាលចិនបានសន្យាថានឹង «ធ្វើការឆ្ពោះទៅរក» ការផ្តល់សច្ចាប័នលើក្បួនច្បាប់ការងារអន្តរជាតិ។ នេះបើតាមការលើកឡើងរបស់សហភាពអឺរ៉ុបកាលពីថ្ងៃពុធ។
ដោយហៅកិច្ចព្រមព្រៀងនេះថាជា «ជំហានសេដ្ឋកិច្ចដ៏សំខាន់» សហភាពអឺរ៉ុបបានបញ្ជាក់នៅក្នុងសេចក្តីថ្លែងការណ៍មួយថា៖ «ប្រទេសចិនបានប្តេជ្ញាផ្ដល់ការអនុញ្ញាតឲ្យប្រើប្រាស់ទីផ្សាររបស់ខ្លួនក្នុងកម្រិតមួយដែលមិនធ្លាប់មានពីមុនមក សម្រាប់វិនិយោគិនអឺរ៉ុប»។
បន្ថែមពីលើនេះទៀត សហភាពអឺរ៉ុបបានលើកឡើងថា ប្រទេសចិនបានប្ដេជ្ញា «អនុវត្តឲ្យមានប្រសិទ្ធភាព» តាមក្បួនច្បាប់របស់អង្គការពលកម្មអន្តរជាតិ (ILO) ដែលខ្លួនបានផ្តល់សច្ចាប័នរួចហើយ «ក៏ដូចជាធ្វើការឆ្ពោះទៅរកការផ្តល់សច្ចាប័នលើអនុសញ្ញាជាមូលដ្ឋាននានារបស់អង្គការ ILO ដែលក្នុងនោះរួមមានទាំងការប្រើប្រាស់កម្លាំងពលកម្មដោយបង្ខំផងដែរ»។
ប្រធានាធិបតីចិនលោក Xi Jinping បាននិយាយកាលពីថ្ងៃពុធថា កិច្ចព្រមព្រៀងវិនិយោគជាមួយសហភាពអឺរ៉ុបនេះនឹងផ្ដល់ឲ្យភាគីទាំងពីរនូវទីផ្សារធំជាងមុន និងបរិយាកាសអាជីវកម្មប្រសើរជាងមុន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Xinhua របស់ចិន៕
