រដ្ឋមន្ត្រីការបរទេសនិងរដ្ឋមន្ត្រីការពារជាតិនៃបណ្ដាប្រទេសជាសមាជិកសហភាពអឺរ៉ុបនឹងជួបប្រជុំគ្នានៅថ្ងៃចន្ទនេះក្នុងទីក្រុងព្រុចសែល ប្រទេសបែលហ្ស៊ិក នៅពេលដែលពួកគេធ្វើការដើម្បីសម្រេចជាចុងក្រោយនូវផែនការពហុផ្នែកមួយដើម្បីផ្គត់ផ្គង់គ្រាប់រំសេវដល់ប្រទេសអ៊ុយក្រែននិងបំពេញឡើងវិញនូវស្តុកគ្រាប់រំសេវរបស់ខ្លួន។
សំណើផែនការដែលមានទឹកប្រាក់ ២ ពាន់លានដុល្លារនេះក៏រួមបញ្ចូលផងដែរនូវកិច្ចការដើម្បីបង្កើនផលិតកម្មគ្រាប់រំសេវរបស់សហភាពអឺរ៉ុបដើម្បីសម្រេចឱ្យបាននូវការផ្គត់ផ្គង់រយៈពេលវែង។
កន្លងមក មន្ត្រីរដ្ឋាភិបាលអ៊ុយក្រែនបានសង្កត់ធ្ងន់អំពីតម្រូវការនៃជំនួយគ្រាប់រំសេវបន្ថែមទៀតពីដៃគូបស្ចិមប្រទេស នៅពេលដែលអ៊ុយក្រែនតតាំងជាមួយនឹងការឈ្លានពានពេញទំហឹងរបស់រុស្ស៊ីដែលបានចាប់ផ្ដើមកាលពីជាងមួយឆ្នាំមុន។
ប្រធានគោលនយោបាយការបរទេសរបស់សហភាពអឺរ៉ុបលោក Joseph Borrell បានលើកទឹកចិត្តប្រទេសជាសមាជិកសហភាពអឺរ៉ុបឱ្យយល់ព្រមតាមសំណើផែនការនេះ ដោយលោកបាននិយាយថា អ៊ុយក្រែនចង់ឱ្យមានការបញ្ជូនគ្រាប់កាំភ្លើងធំបន្ថែមទៀតដល់ខ្លួនឱ្យបានឆាប់៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP និង AFP។
បណ្ដារដ្ឋមន្ត្រីសហភាពអឺរ៉ុបពិចារណាលើផែនការផ្គត់ផ្គង់គ្រាប់រំសេវដល់អ៊ុយក្រែន
