បន្ទាប់ពីរដ្ឋសភាសហរដ្ឋអាមេរិកអនុម័តច្បាប់ចុងក្រោយបង្អស់នៃសំណើច្បាប់មួយ ដែលផ្ដោតលើការធានាឲ្យមាននូវការការពារប្រឆាំងនឹងការរើសអើងក្នុងការបើកប្រាក់បៀវត្សរ៍ផ្អែកលើភេទរបស់មនុស្សកាលពីសប្ដាហ៍មុនមក ថ្ងៃអង្គារស្អែកនេះ គឺតំណាងឲ្យទិវាជានិមិត្តរូបនៃការទទួលបានប្រាក់បៀវត្សរ៍ស្មើគ្នា។
ទិវាជានិមិត្តរូបនេះបង្ហាញឲ្យឃើញពីគម្លាតប្រាក់បៀវត្សរ៍រវាងបុរស និងស្ត្រី ដែលបន្តរហូតមកដល់សព្វថ្ងៃនេះ។
ការកំណត់យកថ្ងៃជានិមិត្តរូបនេះមានបំណងបង្ហាញអំពីភាពមិនស៊ីមេទ្រីគ្នា ដោយលើកឡើងថា ប្រសិនបើបុរសម្នាក់ និងស្ត្រីម្នាក់ សុទ្ធតែចាប់ផ្ដើមធ្វើការនៅថ្ងៃទី១ ខែមករា ដូចគ្នា ប្រាក់បៀវត្សរ៍ដែលបុរសទទួលបាននៅចុងខែធ្នូ គឺមិនដូចគ្នានឹងប្រាក់បៀវត្សរ៍ដែលស្ត្រីទទួលបាននោះទេ។
ស្ត្រីនឹងទទួលបានប្រាក់បៀវត្សរ៍ស្មើនឹងបុរសនោះនៅដើមខែមេសា នាឆ្នាំបន្ទាប់។ បើយោងតាមទិន្នន័យចុងក្រោយបង្អស់ ដែលចេញផ្សាយដោយការិយាល័យជំរឿនរបស់សហរដ្ឋអាមេរិក ប្រាប់ចំណូលជាមធ្យមសម្រាប់ស្ត្រីដែលធ្វើការពេញម៉ោងគឺស្មើប្រហែលជា ៨០ ភាគរយប៉ុណ្ណោះនៃប្រាក់ចំណូលជាមធ្យមដែលបុរសធ្វើការពេញម៉ោងរកបាន។ ស្ត្រីទទួលបានប្រាក់បៀវត្សរ៍ខុសគ្នាខ្លាំងពីបុរសនៅក្នុងផ្នែកសន្តិសុខ និងផ្នែកលក់ហិរញ្ញវត្ថុ ផ្នែកគ្រប់គ្រងហិរញ្ញវត្ថុ ក៏ដូចជាផ្នែកប្រឹក្សាឥណទាន និងការលក់រាយ។
ច្បាប់សហព័ន្ធដែលបានអនុម័តកាលពីឆ្នាំ ១៩៦៣ បានហាមឃាត់មិនឲ្យមានការរើសអើងរឿងប្រាក់បៀវត្សរ៍សម្រាប់បុរស និងស្ត្ រីដែលធ្វើការងារណាតម្រូវឲ្យមាន «ជំនាញ ការប្រឹងប្រែង និងការទទួលខុសត្រូវស្មើគ្នា»។ ប៉ុន្តែការរើសអើងនៅតែបន្តមាន។
ហេតុដូច្នេះហើយបានជាសប្ដាហ៍មុន រដ្ឋសភាបានអនុម័តច្បាប់ភាពស្មើគ្នាផ្នែកប្រាក់ចំណូល (Paycheck Fairness Act) ក្នុងសំឡេង ២៤២ ទល់នឹង ១៨៧។ ច្បាប់នេះអនុម័តឡើងផ្អែកលើច្បាប់ដែលមានពីមុន និងដើម្បីដោះស្រាយគម្លាតប្រាក់បៀវត្សរ៍ដែលនៅសេសសល់៕
