រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកអ្នកស្រី Janet Yellen បានដាក់សម្ពាធលើប្រទេសរុស្ស៊ីនៅថ្ងៃចន្ទនេះនៅមុនកិច្ចប្រជុំរបស់ក្រុមប្រទេស G-20 ចូលមកដល់នៅថ្ងៃអង្គារស្អែកនៅប្រទេសឥណ្ឌូណេស៊ី ដោយអ្នកស្រីបាននិយាយថា វិធីល្អបំផុតនៅក្នុងការបញ្ចប់បញ្ហាសេដ្ឋកិច្ចពិភពលោកគឺការបញ្ចប់សង្គ្រាមរបស់រុស្ស៊ីនៅប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
អ្នកស្រី Yellen បានប្រាប់ក្រុមអ្នកកាសែតនៅពេលអ្នកស្រីជួបជាមួយនឹងរដ្ឋមន្ត្រីហិរញ្ញវត្ថុបារាំងលោក Bruno Le Maire នៅរមណីយដ្ឋាន Nusa Dua នៃប្រទេសឥណ្ឌូណេស៊ីថា៖ «ការបញ្ចប់សង្គ្រាមរបស់រុស្ស៊ីគឺជាភាពចាំបាច់ផ្នែកសីលធម៌និងជារឿងដ៏ល្អបំផុតតែមួយគត់ដែលយើងអាចធ្វើបានសម្រាប់សេដ្ឋកិច្ចពិភពលោក»។
តម្លៃប្រេងឥន្ធនៈនិងស្បៀងអាហារឡើងថ្លៃគឺជាបញ្ហាស្ថិតក្នុងចំណោមបញ្ហាចម្បងៗដែលនឹងត្រូវពិភាក្សានៅក្នុងកិច្ចប្រជុំរបស់ក្រុមប្រទេស G-20។
តាមរយៈការរិះគន់លើរុស្ស៊ី អ្នកស្រី Yellen សង្ឃឹមថានឹងមានការបង្កើនការដាក់សម្ពាធការទូតដើម្បីបញ្ចប់សង្គ្រាមនៅអ៊ុយក្រែននេះបាន។
ប្រទេសឥណ្ឌូណេស៊ីដែលជាប្រទេសម្ចាស់ផ្ទះរៀបចំកិច្ចប្រជុំរបស់ក្រុមប្រទេស G-20 នៅក្នុងឆ្នាំនេះបានអំពាវនាវឱ្យមានការពិភាក្សាគ្នានិងឱ្យមានដំណោះស្រាយដោយសន្តិវិធីសម្រាប់សង្គ្រាមនៅអ៊ុយក្រែន ប៉ុន្តែប្រទេសចិន អាហ្វ្រិកខាងត្បូងនិងឥណ្ឌាដែលជាសមាជិកនៃក្រុមប្រទេស G-20 នេះ ភាគច្រើនបានចៀសវាងមិនធ្វើការរិះគន់ឱ្យចំៗលើរុស្ស៊ី។
កិច្ចប្រជុំរបស់ក្រុមប្រទេស G-20 នេះក៏ត្រូវគេរំពឹងផងដែរថានឹងពិភាក្សាអំពីភាពចាំ បាច់នៅក្នុងការបន្តកិច្ចព្រមព្រៀងដែលសម្របសម្រួលដោយប្រទេសតួកគីនិងអង្គការសហប្រជាជាតិ ដែលអនុញ្ញាតឱ្យមានការនាំចេញធញ្ញជាតិនិងជីរបស់អ៊ុយក្រែនទៅបរទេសដោយសុវត្ថិភាពកាត់តាមសមុទ្រខ្មៅ៕
អាមេរិកថា ការបញ្ចប់សង្គ្រាមអ៊ុយក្រែនគឺជា «រឿងល្អបំផុត» ដើម្បីដោះស្រាយបញ្ហាសេដ្ឋកិច្ចពិភពលោក
រមណីយដ្ឋាន Nusa Dua ប្រទេសឥណ្ឌូណេស៊ី —
