ឧបមាថា លោកស្រី Warren មិនបានទទួលការតែងតាំងពីគណបក្សរបស់លោកស្រីក៏ដោយ ក៏សំណើអំពីសេដ្ឋកិច្ចដែលមានសេចក្តីលម្អិតរបស់លោកស្រី អាចនឹងត្រូវបានគេបន្តពិភាក្សានៅក្នុងការប្រកួតប្រជែងយកតំណែងប្រធានាធិបតី គ្រាដែលផែនការវឌ្ឍនភាពសម្រាប់ការផ្លាស់ប្តូរ ទំនងជានឹងធ្វើឲ្យអ្នកបោះឆ្នោតខ្លះមានចិត្តរំភើប និងអ្នកផ្សេងទៀត មិនសប្បាយចិត្ត។
នៅក្នុងការជួបប្រមូលផ្តុំមួយនៅក្នុងទីក្រុង Seattle ដែលស្ថិតនៅតំបន់ភាគពាយ័ព្យនៃសហរដ្ឋអាមេរិក មានមនុស្សប្រមាណជាង ១ម៉ឺន ៥ ពាន់នាក់ បានមកបង្ហាញការគាំទ្រដល់បេក្ខជនប្រធានាធិបតីខាងគណបក្សប្រជាធិបតេយ្យ គឺលោកស្រី Elizabeth Warren និងសេចក្តីលម្អិតនៃនិន្នាការលោកស្រី ក្នុងការប្រយុទ្ធប្រឆាំងនឹងភាពមិនស្មើគ្នាផ្នែកសេដ្ឋកិច្ចនៅសហរដ្ឋអាមេរិក។
លោកស្រី Elizabeth Warren សមាជិកាព្រឹទ្ធសភាខាងគណបក្សប្រជាធិបតេយ្យប្រចាំនៅរដ្ឋមាស្សាឈូសេតថ្លែងថា៖
«ខ្ញុំ មិនចង់ឲ្យមានរដ្ឋាភិបាលមួយដែលធ្វើការឲ្យក្រុមហ៊ុនធំៗទេ។ ខ្ញុំចង់ឲ្យរដ្ឋាភិបាល ធ្វើការសម្រាប់ក្រុមគ្រួសាររបស់យើង»។
សំណើសេដ្ឋកិច្ចរបស់លោកស្រី Elizabeth Warren មានរួមបញ្ចូលការស្នើឲ្យដាក់បន្ថែមពន្ធ២ភាគរយទៅលើក្រុមគ្រួសារអ្នកមានដែលមានប្រាក់ចំណូលច្រើនជាង ៥០លានដុល្លារ ក្នុងមួយឆ្នាំ និង ដាក់ពន្ធបន្ថែមចំនួន ៧ភាគរយទៀតទៅលើសាជីវកម្ម ដែលរកប្រាក់ចំណូលបានលើសពី១០០លានដុល្លារក្នុងមួយឆ្នាំ។
លោកស្រី Elizabeth Warren ថ្លែងទៀតថា៖
«អ្វីដែលយើងចង់និយាយ គឺចង់សំដៅទៅដល់អ្នកដែលមានប្រាក់ចំណូលច្រើន គឺច្រើនមែនទែន។ អ្នកដែលមានប្រាក់ចំណូលក្នុងលំដាប់ខ្ពស់បំផុតក្នុងចំណោមអ្នកមានដែលមានចំនួនមួយភាគរយ គឺឲ្យពួកគេ ចូលវិភាគទាន ដូច្នេះ មនុស្សគ្រប់គ្នា នៅក្នុងប្រទេសនេះ បានទទួលឱកាស ដើម្បីសាងជីវភាពរបស់ខ្លួនឲ្យប្រសើរឡើង»។
ទឹកប្រាក់ដែលគេប៉ាន់ស្មានថា មានចំនួនជិត៣លាន លាន ដែលបានមកពីការបង់ពន្ធ រយៈពេលជាង ១០ ឆ្នាំ នឹងអាចជួយពង្រីកកម្មវិធីបណ្តុះបណ្តាលវីជ្ជាជីវៈ។
លោកស្រី Warren ក៏ចង់បំបែកក្រុមហ៊ុនបច្ចេកវិទ្យាធំៗដូចជា Google និង Facebook ផងដែរ ដើម្បីកំណត់ឲ្យសាជីវកម្មទាំងនោះ បំរើប្រយោជន៍សាធារណៈជាជាងប្រដេញរកប្រាក់ចំណេញ និងអនុញ្ញាតិឲ្យអ្នកធ្វើការជ្រើសរើសសមាជិកគណៈកម្មការរបស់ក្រុមហ៊ុនចំនួន៤០ភាគរយ។ ម្យ៉ាងទៀត គឺដើម្បីបង្កើតឲ្យមានកិច្ចព្រមព្រៀងពាណិជ្ចកម្មអន្តរជាតិដែលការពារសិទ្ធិមនុស្សនៅក្រៅប្រទេស និងរក្សាការងារសម្រាប់អ្នកធ្វើការជាជនជាតិអាមេរិកាំង។
មិនថា នៅទីចុងបញ្ចប់លោកស្រី Warren នឹងបានទទួលការតែងតាំងបេក្ខភាពពីគណបក្សរបស់លោកស្រី ឬ ក៏អត់នោះទេ ផែនការ«សេដ្ឋកិច្ចមានលក្ខណៈស្នេហាជាតិ»របស់លោកស្រី Warren នឹងបង្ខំឲ្យគូប្រជែងនៅក្នុងគណបក្សប្រជាធិបតេយ្យ ឆ្លើយតបទៅនឹងផែនការវឌ្ឍនភាពសម្រាប់ការផ្លាស់ប្តូររបស់លោកស្រី ហើយនឹងពិភាក្សានៅក្នុងការប្រកួតប្រជែងយកតំណែងប្រធានាធិបតីនៅក្នុងឆ្នាំ២០២០ខាងមុខនេះ។
លោក John Halpin នៃមជ្ឈមណ្ឌលវឌ្ឍនភាពអាមេរិកាំង Center for American Progress ថ្លែងថា៖
«វាប្រាកដណាស់ នឹងធ្វើឲ្យបេក្ខជនផ្សេងៗទៀតត្រូវបង្កើតសំណើនយោបាយដោយផ្ជិតផ្ចង់»។
ក្នុងពេលជាមួយគ្នានេះផងដែរ សំណើរបស់លោកស្រីអាចនឹងត្រូវបានប្រើប្រាស់ដោយលោកប្រធានាធិបតី Donald Trump និងសមាជិកគណបក្សសាធារណៈរដ្ឋដើម្បីជាការបង្ហាញថា គណបក្សប្រជាធិបតេយ្យជាអ្នកសង្គមនិយមជ្រុលនិយម។
លោក Alex Conant អ្នកពិគ្រោះយោបល់ខាងគណបក្សសាធារណរដ្ឋនៃក្រុមហ៊ុនផ្តល់យុទ្ធសាស្រ្ត Firehouse Strategies ថ្លែងថា៖
«នៅពេលដែលលោក (Donald Trump) និយាយថា សមាជិកគណបក្សប្រជាធិបតេយ្យជាអ្នកសង្គមនិយមជ្រុលនិយម យើងអាចលើកឡើងអំពីកត្តាមួយចំនួននៃនិន្នាការរបស់លោកស្រី Elizabeth Warren ដែលមានលក្ខណៈសេរីនិយមខ្លាំងជាងអ្វីដែលលោក បារ៉ាក់ អូបាម៉ា ឬ លោក ប៊ីល គ្លីនតុន នឹងគាំទ្រទៅទៀត»។
លោកស្រី Elizabeth Warren គាំទ្រការពង្រីកការថែទាំសុខភាពដែលឧបត្ថម្ភដោយរដ្ឋាភិបាលសម្រាប់ពលរដ្ឋអាមេរិកាំងទាំងអស់ ដូចដែលបានស្នើឡើងដោយគូប្រជែងរបស់លោកស្រីដែរ គឺសមាជិកព្រឹទ្ធសភាប្រចាំនៅរដ្ឋ Vermont លោក Bernie Sanders។
លោកស្រី Warren បានរិះគន់ការដាក់ពន្ធបែបឯកតោភាគីទៅលើទំនិញដែលផលិតនៅបរទេសថា ជាទង្វើដែលមិនបានគិតឲ្យបានដិតដល់ ប៉ុន្តែលើកឡើងថា លោកស្រីក៏ ប្រហែលជាអាចនឹងប្រើប្រាស់វិធីដាក់ពន្ធនេះ ជាផ្នែកមួយនៃ «គោលនយោបាយដែលជាប់ទាក់ទងនឹងពាណិជ្ជកម្ម» ផងដែរ។
រួមជាមួយនឹងអ្នកនយោបាយដែលមានគោលនយោបាយវឌ្ឍនភាពដទៃទៀត លោកស្រីបានគាំទ្រគោលនយោបាយពាណិជ្ជកម្មដែលមាននិន្នាការការពារបរិដ្ឋាន ដើម្បីបញ្ចប់ការពឹងផ្អែករបស់អាមេរិកទៅលើការប្រើប្រាស់ប្រេងឥន្ធនៈ ហើយនឹងបានស្នើឲ្យរដ្ឋាភិបាលវិនិយោគទឹកប្រាក់ចំនួនពីរ លាន លាន ដុល្លារទៅលើបច្ចេកវិទ្យាផលិតថាមពលប្រើប្រាស់ឡើងវិញ។
អ្នកបោះឆ្នោតនិយមកណ្តាលដែលជាញឹកញាប់មានភាពមិនជាក់លាក់ចំពោះការពង្រីក និងតម្លៃរបស់កម្មវិធីរដ្ឋាភិបាលនោះ គោលនយោបាយខាងលើនេះ អាចជាអ្នកសម្រេចថា បេក្ខជនណានឹងឈ្នះក្នុងការបោះឆ្នោតនាពេលខាងមុខនេះ។
ក៏ប៉ុន្តែ អ្នកគាំទ្រលោកស្រី Warren អះអាងថា គន្លឹះសំខាន់ដើម្បីទទួលបានជោគជ័យនៅក្នុងការបោះឆ្នោតនៅឆ្នាំ ២០២០ គឺការធ្វើឲ្យអ្នកបោះឆ្នោតដែលមានជីវភាពមធ្យមមានសន្ទុះចិត្តដោយមាននិន្នាការវឌ្ឍនភាពដ៏សំខាន់៕
ប្រែសម្រួលដោយ អ្នកស្រី លី ម៉ូរីវ៉ាន់
