ប្រជាពលរដ្ឋ ១១ នាក់នៅខេត្តបាត់ដំបង កាលពីពេលថ្មីៗនេះ បានដាក់ពាក្យបណ្តឹងទៅរដ្ឋមន្ត្រីក្រសួងមហាផ្ទៃឱ្យជួយអន្តរាគមន៍ ពាក់ព័ន្ធនឹងករណីដែលពួកគេបានសូកប្រាក់ដល់មន្ត្រីម្នាក់ ដើម្បីឱ្យកូនអាចប្រឡងជាប់ជាក្របខណ្ឌនគរបាល។ នេះបើតាមពាក្យបណ្តឹងដែលវីអូអេទទួលបាន និងបើតាមក្រុមគ្រួសារដែលកំពុងទាមទារប្រាក់មកវិញ។
បើតាមបញ្ជីឈ្មោះដែលមានស្នាមមេដៃរបស់ពួកគេទាំង ១១នាក់នោះ ពលរដ្ឋម្នាក់ៗបានចំណាយប្រាក់ចន្លោះពី ៥.៧០០ដុល្លារ ដល់ ១២.០០០ដុល្លារអាមេរិក ដែលសរុបទឹកប្រាក់ទាំងអស់ចំនួន ៩៤.៧០០ដុល្លារ ដែលពួកគេបានព្យាយាមទាមទារពីមន្ត្រីពន្ធនាគារខេត្តបាត់ដំបងម្នាក់ ដែលបានយកលុយនោះ ហើយសន្យាថានឹងជួយកូនៗរបស់ពួកគេឱ្យប្រឡងជាប់ក្របខណ្ឌនគរបាល។
បើតាមពាក្យបណ្តឹងចុះថ្ងៃទី ២ ខែឧសភា ឆ្នាំ ២០២៣ ពួកគេបានប្តឹងអ្នកស្រី ស៊ឹម សុខុន ដែលបច្ចុប្បន្នកំពុងបម្រើការនៅពន្ធនាគារខេត្តបាត់ដំបង។ ពួកគេបញ្ជាក់ថាកាលពីថ្ងៃទី ២៨ ខែមីនា ឆ្នាំ ២០២១ ពួកគេបានយកថវិកាទៅប្រគល់ឱ្យអ្នកស្រី ស៊ឹម សុខុន ដោយបុគ្គលនោះបានសន្យាថា នឹងជួយរត់ការប្រឡងចូលក្របខណ្ឌមន្ត្រីនគរបាលជាតិ ហើយថាប្រសិនបើមិនបាននឹងប្រគល់ថវិកាជូនវិញគ្រប់ចំនួន។ បើតាមប្រជាពលរដ្ឋ ការជ្រើសរើសនោះនឹងធ្វើឡើងក្នុងជួរយុវជនរបស់គណបក្សប្រជាជនកម្ពុជា។
ពាក្យបណ្តឹងបញ្ជាក់ថា៖ «ក្រោយពេលដល់ថ្ងៃកំណត់ប្រឡងរួច តែលទ្ធផលមិនបានជាប់ដូចការសន្យា ទើបយើងខ្ញុំទាំងអស់គ្នាសម្រេចចិត្តសុំដកថវិកាមកវិញ តែរយៈពេលមួយឆ្នាំហើយ មិនព្រមឱ្យ»។
បើតាមពាក្យបណ្តឹងនោះ ពួកគេទាំង ១១ នាក់ធ្លាប់បានដាក់ពាក្យបណ្តឹងទៅសាលាខេត្តបាត់ដំបង តែការដោះស្រាយមិនទទួលបានលទ្ធផលនៅឡើយ។ ដូច្នេះទើបពួកគេដាក់ពាក្យបណ្តឹងទៅកាន់លោក ស ខេង រដ្ឋមន្ត្រីក្រសួងមហាផ្ទៃ។
លោក ណុប នី អាយុ ៦៧ ឆ្នាំ ពលរដ្ឋម្នាក់ក្នុងចំណោម ១១ នាក់ដែលដាក់ពាក្យបណ្តឹង ប្រាប់វីអូអេថា លោកបានបង់លុយអស់ ៨.០០០ដុល្លារ យកទៅឱ្យអ្នកស្រី ស៊ឹម សុខុន កាលពីថ្ងៃទី ៣០ ខែឧសភា ឆ្នាំ ២០២១ ដោយអ្នកស្រី ស៊ឹម សុខុន អះអាងថា កូនរបស់លោកគ្រាន់តែទិញពាក្យ និងទៅប្រឡង គឺជាប់ហើយ។
លោកបញ្ជាក់ថា៖ «កូនខ្ញុំបានប្រឡង ដល់តែខ្ញុំសួរគាត់វិញ អត់ឃើញបានពាក្យអីធ្លាក់មក ហើយអ្នកដែលគេដាក់លុយច្រើនៗនោះគេជាប់ ឧទាហរណ៍ខ្លះ ២ម៉ឺន៥ពាន់ [ដុល្លារ] ខ្ញុំដឹងដំណឹងគេជាប់ហើយ។ អ៊ីចឹងខ្ញុំទៅសួរគាត់ គាត់ថាចាំក្រោយទៀតទៅ តែខ្ញុំថាអត់ចាំទេខ្ញុំសុំលុយវិញ»។
លោកក៏បានសំណូមពរឱ្យអ្នកស្រី ស៊ឹម សុខុន សងលុយមកពួកគេវិញ និងសុំឱ្យរដ្ឋាភិបាលជួយអនុវត្តច្បាប់ចំពោះមន្ត្រីរាជការដែលបោកប្រាស់យកលុយពីប្រជាជន។
លោកបន្ថែមទៀតថា៖ «គាត់ថា ឱ្យតែមានលុយប៉ុណ្ណឹងទៅគាត់ធ្លាប់ជួយគេបានច្រើនហើយ មិនមែនមានតែប៉ុណ្ណឹងទេ តាមរយៈជួរគណបក្ស និងជួរសម្ព័ន្ធយុវជនសន្តិភាពហ្នឹងគឺគាត់ជួយបាន ឱ្យតែមានលុយប៉ុណ្ណឹងទៅ ឧទាហរណ៍ ៨ពាន់ ៩ពាន់ អ្នកខ្លះថា ៨ពាន់ ទៅ ៩ពាន់អ៊ីចឹង»។
ពលរដ្ឋម្នាក់ទៀតដែលកំពុងទាមទារប្រាក់មកវិញដែរ អ្នកស្រី សំ រ៉ាន់ ប្រាប់វីអូអេនៅថ្ងៃព្រហស្បតិ៍នេះថា មានការសន្យាថាជួយឱ្យបានជាប់ក្របខណ្ឌនគរបាល ទើបអ្នកស្រីហ៊ានចំណាយ ១ម៉ឺនដុល្លារ ដើម្បីកូនអាចចូលបម្រើការងារនគរបាលបាន។
អ្នកស្រីថ្លែងថា៖ «ចុះបើគាត់ថា គាត់នឹងជួយបានតាមគណបក្ស តាមក្រុមការងារបក្សចឹង គាត់ថាជួ យបាន ខ្ញុំសួរថាជួយបានដែរ? បើអ្នកខ្លះថាពីរម៉ឺនមិនបានផងគាត់ថាបាន ជួយបាន ចឹងយើងទុកចិត្តគេទៅណា»។
ចំណែកឯលោក មាន មឿន ពលរដ្ឋម្នាក់ទៀតដែលដាក់ពាក្យបណ្តឹង ប្រាប់វីអូអេថាលោកមិនដែលស្គាល់អ្នកស្រី ស៊ឹម សុខុន ពីមុនមកទេ តែលោកស្គាល់តាមរយៈអ្នកផ្សេងទៀត។ លោកបានចំណាយប្រាក់ ៨.០០០ដុល្លារអាមេរិក សម្រាប់កិច្ចការនេះ។
ស្របពេលដែលមានការដាក់ពាក្យបណ្តឹងទៅក្រសួងមហាផ្ទៃ ក៏មានការបង្ហោះវីដេអូមួយក្នុងទំព័រហ្វេសប៊ុកមានឈ្មោះថា KCTV Cambodia ដែលបង្ហាញថាអ្នកស្រី ស៊ឹម សុខុន មន្ត្រីស័ក្តិមួយនៅពន្ធនាគារ ខេត្តបាត់ដំបង បានទទួលលុយជាប្រាក់ដុល្លារ។
ក្នុងវីដេអូនោះ អ្នកស្រី ស៊ឹម សុខុន បានថ្លែងថា៖ «កន្លងមកធ្លាប់ធ្វើ ដាក់អស់ៗទៅហ្នឹងឯង មិនដែលនៅទេ។ បើវាស្ទះអី ដូចឧទាហរណ៍ដូចវគ្គដាក់ស្នងការ គេចេញស្នងការហើយអ៊ីចឹងទៅ ដូចថាគេប្រាប់ថាឱ្យទៅព្រំដែនទៅ គេរុញទៅព្រំដែន។ អ៊ីចឹងបើគេចង្អុលប្រាប់យើងថា ទៅណា គេរុញទៅហ្នឹងឱ្យ។ ដល់ពេលណាគេអាចជួយកន្លែងណាខ្លះបានអ៊ីចឹង គេប្រាប់ថា កន្លែងហ្នឹងគេឱ្យ ៥ នាក់អ៊ីចឹងទៅ»។
នៅពេលទាក់ទងទៅ និងដឹងថាជាអ្នកសារព័ត៌មានវីអូអេ អ្នកស្រី ស៊ឹម សុខុន ហាក់មិនចង់ឆ្លើយតប ហើយប្រាប់ថារវល់ មុននឹងចុចផ្តាច់ទូរសព្ទ។
វីអូអេមិនទាន់អាចសុំការអត្ថាធិប្បាយពីលោក សឿម ប៊ុនរិទ្ធ អភិបាលរងខេត្តបាត់ដំបង និងជាអ្នកនាំពាក្យបាននៅឡើយទេ។
រដ្ឋលេខាធិការ និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូអេនៅថ្ងៃព្រហស្បតិ៍នេះថា ទាក់ទងនឹងករណីនេះ សមត្ថកិច្ចបានទទួល និងកំពុងតែរៀបចំឯកសារដោះស្រាយ។
លោកលើកឡើងថា៖ «ជាគោលការណ៍ក្រសួងមហាផ្ទៃមិនអនុញ្ញាតឱ្យមានអ៊ីចឹងទេ ហើយសុំលើកទឹកចិត្ត កុំឱ្យមានអំពើហ្នឹងនៅក្នុងសង្គមយើងពេលប្រឡងទាំងអ្នកយកលុយទៅឱ្យគេ និងអ្នកទទួលលុយពីគេគឺមានទោសដូចគ្នា។ ការជ្រើសរើសក្របខណ្ឌនគរបាលនេះ អត់មានជាប់ពាក់ព័ន្ធអីហ្នឹងលុយកាកបងប្អូនទេ គេមានគណៈកម្មការគេដឹកនាំត្រឹមត្រូវ»។
លោកក៏អំពាវនាវដល់បងប្អូនពលរដ្ឋទាំងអស់ សូមមេត្តាកុំប្រើប្រាស់រូបភាពទាំងអស់នេះទៅពឹងពាក់គេ ដើម្បីទទួលតួនាទី ព្រោះវាងាយនឹងចាញ់បោកគេ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ប្រាប់វីអូអេថា
ករណីអំពើសូកប៉ាន់ពុករលួយនៅកម្ពុជា ថយចុះតាមផ្នែកតែប៉ុណ្ណោះ ដោយផ្នែកខ្លះនៅតែបន្តកើតឡើងជាហូរហែ។
លោកថ្លែងថា៖ «យើងដឹងហើយថា រឿងនេះវាមានពាក់ព័ន្ធនឹងអ្នកស៊ី និងអ្នកសូក ក៏ប៉ុន្តែយ៉ាងណាក៏ដោយ អ្នកសូកដែលមានភាពរងគ្រោះ ហើយពួកគេហ៊ានចេញមុខមកលាតត្រដាងបែបនេះ ខ្ញុំយល់ថា គឺជាការគួរតែមានការលើកទឹកចិត្តឱ្យមានការរាយការណ៍អំពីពុករលួយបែបនេះ»។
លោកក៏ជំរុញឱ្យចាត់វិធានការលើសកម្មភាពពុករលួយទាំងអស់នេះឱ្យបានផងដែរ៕
