មេដឹកនាំក្រុមហ៊ុនបណ្ដាញសង្គមអនឡាញកំពូលៗរបស់សហរដ្ឋអាមេរិក បានជំរុញសមាជិកសភាអាមេរិកកាលពីថ្ងៃពុធម្សិលមិញ ឲ្យរក្សាទុកច្បាប់ការពារចំពោះការត្រួតពិនិត្យលើខ្លឹមសារនៃការបញ្ចេញមតិរបស់អ្នកប្រើប្រាស់ ទោះបីជាមានការអំពាវនាវកើនឡើងពីសមាជិកគណបក្សសាធារណរដ្ឋឲ្យដោះស្រាយនូវអ្វីដែលហៅថាភាពលម្អៀងគិតទុកជាមុននៃវិធីដែលក្រុមហ៊ុនបណ្តាញសង្គមតាមអ៊ីនធឺណិតចាត់ចែងលើការបញ្ចេញមតិដោយសេរីតាមអនឡាញ។
ក្រុមហ៊ុនបណ្ដាញសង្គមអនឡាញនានា ត្រូវបានការពារពីការទទួលខុសត្រូវចំពោះខ្លឹមសារនៅលើវិបសាយរបស់ខ្លួននៅក្នុងជំពូកទី ២៣០ នៃច្បាប់សុភាវធម៌ព័ត៌មានឆ្នាំ១៩៩៦។ ការការពារទាំងនេះ ត្រូវបានអនុវត្តចំពោះក្រុមហ៊ុនទាំងអស់ដែលធ្វើប្រតិបត្តិការតាមអនឡាញ ដែលប្រើខ្លឹមសារនៃមតិ ឬអត្ថបទណាមួយរបស់ភាគីទី ៣។
ក៏ប៉ុន្តែ សមាជិកគណបក្សសាធារណរដ្ឋមួយចំនួនបានអះអាងថា ជំពូកទី ២៣០ នេះ ជាវិធីអនុញ្ញាតឲ្យក្រុមហ៊ុនធំៗ ដូចជា Facebook និង Twitter ជាដើម តាមដានត្រួតពិនិត្យលើខ្លឹមសារណាមួយបានផ្អែកតាមទស្សនៈនយោបាយរបស់ខ្លួន និងអនុញ្ញាតឲ្យក្រុមហ៊ុនទាំងនោះ ប្រើវេទិកាអនឡាញនេះ ដើម្បីជះឥទ្ធិពលដល់បុព្វហេតុសាធារណៈនានា។
ប្រធានាធិបតីសហរដ្ឋអាមេរិកលោក Donald Trump បានអំពាវនាវឲ្យបញ្ចប់ជំពូកទី ២៣០ នេះ កាលពីថ្ងៃពុធម្សិលមិញ ដោយលោកបានសរសេរនៅលើ Twitter ថា៖ «សហរដ្ឋអាមេរិក មិនមានសេរីភាពសារព័ត៌មានទេ។ យើងមានការគាបសង្កត់លើព័ត៌មាន ឬព័ត៌មានក្លែងក្លាយ។ យើងបានដឹងយ៉ាងច្រើននៅក្នុងរយៈពេល ២ សប្តាហ៍ចុងក្រោយនេះ អំពីថាតើប្រព័ន្ធផ្សព្វផ្សាយរបស់យើងអាក្រក់ប៉ុណ្ណា ហើយឥឡូវនេះ គឺក្រុមហ៊ុនបច្ចេកវិទ្យាធំៗទៀត ដែលប្រហែលជាអាក្រក់ជាងនេះទៅទៀត។ ចូរលុបចោលជំពូកទី ២៣០ នេះទៅ»។
ជំពូកទី ២៣០ នេះ បានទទួលការចាប់អារម្មណ៍ឡើងវិញនៅក្នុងរដូវបោះឆ្នោតប្រធានាធិបតីសហរដ្ឋអាមេរិកឆ្នាំ ២០២០ នេះ ដោយសារតែក្រុមហ៊ុនបណ្ដាញសង្គមអនឡាញទាំងនោះ បានប្រើវិធីដោះស្រាយថ្មីចំពោះការតាមដានត្រួតពិនិត្យលើខ្លឹមសារមតិ ឬអត្ថបទដែលបង្ហោះនៅលើវិបសាយរបស់ខ្លួន ដើម្បីឆ្លើយតបទៅនឹងការជ្រៀតជ្រែករបស់បរទេសលើវេទិកាតាមអនឡាញនានាកាលពីរដូវបោះឆ្នោតឆ្នាំ ២០១៦៕
