មន្រ្តី សកម្មជន និងក្រុមប្រឹក្សាឃុំសង្កាត់ជាប់ឆ្នោតរបស់គណបក្សភ្លើងទៀនរាប់រយនាក់ បានតវ៉ានៅទីស្នាក់ការកណ្តាលរបស់គណបក្ស កាលពីព្រឹកថ្ងៃចន្ទ ក្នុងគោលបំណងទាមទារឲ្យទម្លាក់លោក ទាវ វណ្ណុល ប្រធានគណបក្ស និងលោក លី សុធារ៉ាយុត្តិ អគ្គលេខាធិការគណបក្សចេញពីតំណែង។
អ្នកតវ៉ាទាំងនោះលើកឡើងថា ថ្នាក់ដឹកនាំគណបក្សបានគំរាមកំហែង និងដកហូតតួនាទីសមាជិកសមាជិកា និងក្រុមប្រឹក្សាឃុំសង្កាត់ជាប់ឆ្នោតនៅថ្នាក់ក្រោមជាតិ «តាមទំនើងចិត្តយ៉ាងអយុត្តិធម៌»។
ញត្តិរបស់អ្នកតវ៉ាបញ្ជាក់ថា៖ «យើងខ្ញុំទាំងអស់គ្នាស្នើឲ្យ លោក ទាវ វណ្ណុល និងលោក លី សុធារ៉ាយុត្តិ បញ្ឈប់ជាបន្ទាន់នូវការគំរាមកំហែង និងការប៉ុនប៉ងដកហូតតួនាទីសមាជិក សមាជិកា និងក្រុមប្រឹក្សាឃុំសង្កាត់ជាប់ឆ្នោតគណបក្សភ្លើងទៀននៅថ្នាក់មូលដ្ឋាន»។
លោក លី សុធារ៉ាយុត្តិ អគ្គលេខាធិការគណបក្សភ្លើងទៀន ប្រាប់វីអូអេតាមប្រព័ន្ធតេឡេក្រាមថា គណបក្សមិនដែលបញ្ឈប់ ឬបណ្តេញសមាជិកក្រុមប្រឹក្សាឃុំសង្កាត់ និងសមាជិកគណបក្សឡើយ ហើយគណបក្សគ្រាន់តែដកតួនាទីពីមន្រ្តីខេត្ត និងស្រុកមួយចំនួនតូច ដោយសារពួកគាត់មិនគោរពនិងអនុវត្តតាមលក្ខខន្តិកៈ បទបញ្ជាផ្ទៃក្នុង និងសេចក្តីណែនាំរបស់គណបក្ស។
លោកបញ្ជាក់បន្ថែមថា៖ «ថ្នាក់ដឹកនាំគណបក្សមិនបានសម្លុត និងគំរាមសមាជិក មន្រ្តី និងសមាជិកក្រុមប្រឹក្សាឃុំជាប់ឆ្នោតរបស់ខ្លួនទេ។ ផ្ទុយទៅវិញ ពួកគាត់ទេដែលបានប្រើតួនាទីរបស់ខ្លួនគំរាម និងដកសមាជិកភាពពីគណបក្ស និងពីតួនាទីសមាជិកក្រុមប្រឹក្សាឃុំ សង្កាត់ ដូចជានៅខេត្តកំពង់ធំ។ គណបក្សបានទប់ស្កាត់ពួកគាត់កុំឲ្យប្រើឥទ្ធិពល និងអំណាចរបស់ខ្លួនគំរាមដកហូតតួនាទី ឬបណ្តេញសមាជិកណាម្នាក់ចេញពីគណបក្ស ដោយសារតែមិនស្តាប់ និងធ្វើតាមបញ្ជាខុសរបស់ពួកគាត់»។
មន្រ្តីរូបនេះបញ្ជាក់ថា ការតវ៉ាគឺជាសិទ្ធិរបស់ពួកគេ ហើយរាល់ការទម្លាក់ ឬតែងតាំងប្រធានគណបក្សអគ្គលេខាបក្ស ឬថ្នាក់ដឹកនាំជាន់ខ្ពស់ជាផ្លូវការត្រូវធ្វើតាមរយៈសមាជគណបក្ស។
អនុប្រធានគណបក្សភ្លើងទៀន លោក សុន ឆ័យ ប្រាប់វីអូអេនៅថ្ងៃចន្ទនេះថា ការតវ៉ានេះអាចមកពីការមិនពេញចិត្តរបស់ក្រុមណាមួយដែលបានចាកចេញពីគណបក្ស។ ប៉ុន្តែលោកចោទជាសំណួរថា តើអ្នកដែលមកតវ៉ាទាំងអស់នេះពិតជាសមាជិកសមាជិកា និងក្រុមប្រឹក្សាឃុំសង្កាត់ជាប់ឆ្នោតរបស់គណបក្សភ្លើងទៀនពិតប្រាកដឬយ៉ាងណា។
លោកថ្លែងថា៖ «ខ្ញុំថា អ្នកដែលមកតវ៉ានោះ អ្នកនោះជាសមាជិកគណបក្សភ្លើងទៀនឬក៏មកពីណានោះ[ឲ្យបាន]ច្បាស់លាស់ទេបាទ។ បើតាមអ្វីដែលខ្ញុំដឹង ថ្នាក់ដឹកនាំរបស់គណបក្សភ្លើងទៀនដែលជាតំណាងត្រឹមត្រូវតាមច្បាប់ហ្នឹង គឺនៅមានគ្រប់ខេត្តគ្រប់ស្រុក គ្រប់ក្រុង នៅមានគេធ្វើ ហើយនៅទីនោះមិនមានមកតវ៉ាទម្លាក់ប្រធានរបស់ខ្លួន ដូចដែលបានកើតមានកាលពីព្រឹកមិញនេះទេ»។
បើតាមលោក សុន ឆ័យ ប្រសិនបើសមាជិកសមាជិកានៃគណបក្សភ្លើងទៀនមានបញ្ហាអ្វីមួយពិតប្រាកដ នោះពួកគេនឹងធ្វើជាលិខិតដាក់មកថ្នាក់ដឹកនាំគណបក្ស ដើម្បីដោះស្រាយទៅតាមគោលការណ៍របស់គណបក្ស។
គួរបញ្ជាក់ថា កាលពីថ្ងៃទី ៦ ខែធ្នូ ឆ្នាំ ២០២៣ គណបក្សភ្លើងទៀនបានចេញសេចក្តីណែនាំមួយ ដោយលើកឡើងថា សមាជិកសមាជិកាគណបក្សភ្លើងទៀនរូបណាដែលបន្តធ្វើសកម្មភាពជាមួយគណបក្សដទៃផ្ទុយពីការណែនាំរបស់គណបក្សភ្លើងទៀន នឹងត្រូវដកហូតពីតួនាទី។ គណបក្សបញ្ជាក់ថា សមាជិកសមាជិកាក្រុមប្រឹក្សាឃុំសង្កាត់ជាប់ឆ្នោតពីគណបក្សភ្លើងទៀនចំនួន ២១៩៨ រូប ស្ថិតក្រោមការគ្រប់គ្រងរបស់គណបក្សភ្លើងទៀនតែមួយគត់ រហូតដល់មានការបោះឆ្នោតជ្រើសរើសក្រុមប្រឹក្សាឃុំសង្កាត់ថ្មីនាឆ្នាំ ២០២៧៕
