ក្រុមមន្ត្រីអារ៉ាប៊ីសាអូឌីតបាននិយាយថា មានមនុស្សយ៉ាងហោចណាស់៨៧នាក់បានស្លាប់ និងមានមនុស្ស១៨៧នាក់ទៀតបានត្រូវរបួសនៅពេលដែលឧបករណ៍ស្ទូចវត្ថុធ្ងន់ៗមួយបានរលំធ្លាក់លើពិតានមួយនៅឯវិហារឥស្លាមនៅក្នុងក្រុងពិសិដ្ឋ Mecca។
ការរលំឧបករណ៍ស្ទូចវត្ថុធ្ងន់ៗនេះបានបន្សល់ទុកនូវកម្ទិចកម្ទីជាគំនរ និងមានកម្ទិចកម្ទីអគារដែលមានរាងស្រួចៗជាច្រើន។ គេកំពុងរៀបចំពង្រីកអាគារក្នុងបរិវេណនៃព្រះវិហារ Grand Mosque នេះ។
រូបថតដែលត្រូវបានផ្សាយតាមបណ្តាញព័ត៌មានសង្គមបានបង្ហាញឱ្យឃើញពួកអ្នកធ្វើធម្មយាត្រាពាក់រ៉ូប (ប្រភេទសម្លៀកបំពាក់) ហើយមានជាប់ឈាម និងកម្ទិចកម្ទីជាច្រើនដែលកើតឡើងដោយសារការដួលរលំឧបករណ៍ស្ទូចវត្ថុធ្ងន់ៗមួយនេះ។
ឧបទ្ទវហេតុនេះបានកើតមានឡើងនៅពេលដែលពួកកាន់សាសនាឥស្លាមមកពីទូទាំងពិភពលោកប្រមូលផ្តុំគ្នាដើម្បីធ្វើធម្មយាត្រាទៅក្រុងពិសិដ្ឋប្រចាំឆ្នាំដែលមានកំណត់នឹងប្រព្រឹត្តទៅនៅពេលបន្ទាប់មកទៀតក្នុងខែនេះ។ ក្រុមមន្ត្រីអារ៉ាប៊ីសាអូឌីតបានធ្វើការប្រុងប្រៀបច្រើនដើម្បីទទួលពួកអ្នកគោរពសាសនា ឥស្លាមដែលធ្វើដំណើរមកកាន់ក្រុង Mecca ដើម្បីចូលរួមក្នុងធម្មយាត្រានេះដែលនឹងមានអ្នកកាន់សាសនាឥស្លាមជិតពីរលាននាក់មកពីទូទាំងពិភពលោកទៅកាន់ទីនោះ។
វិហារ Grand Mosque ជាកន្លែងមួយក្នុងបណ្តាកន្លែងនានាដែលមានការប្រមូលផ្តុំពួកអ្នកធ្វើធម្មយាត្រាច្រើននាក់នៅក្នុងធម្មយាត្រាទៅក្រុងពិសិដ្ឋនេះ៕
