ភ្ជាប់​ទៅ​គេហទំព័រ​ទាក់ទង

ជន​ជាតិ​ឥណ្ឌូនេស៊ី​ដើមកំណើតចិន​​កាន់សាសនា​អ៊ីស្លាម បញ្ចេញ​យោបល់​នៅក្នុង​ថ្ងៃបុណ្យ​ចូលឆ្នាំ​ថ្មី ក្នុង​វិហារ​អ៊ីស្លាម


បុណ្យចូលឆ្នាំ​ចិននៅប្រទេស​ឥណ្ឌូនេស៊ី
ដោយ​ Kate Lamb
ប្រែសម្រួលដោយ ឌី ខាំបូលី
សម្រាប់​ប្រជាពលរដ្ឋ​ឥណ្ឌូនេស៊ីដើមកំណើត​ចិន សេរីភាព​ក្នុងការគោរព​ប្រពៃណី​វប្បធម៌​របស់​ពួកគេ នៅមាន​ភាព​ថ្មី​ថ្មោង​នៅឡើយ។ ទោះជា​យ៉ាងនេះក្តី នៅតាម​ទីក្រុង​ធំៗ​ទាំងឡាយ​នៅទូទាំង​ប្រទេស​ឥណ្ឌូនេស៊ី ទីក្រុង​ទាំងនោះ​ត្រូវបាន​តុប​តែងពណ៌​ក្រហម ដើម្បីប្រារព្ធថ្ងៃ​បុណ្យចូលឆ្នាំ​ចិន។ ប៉ុន្តែ​មិនមែន​គ្រប់​ប្រជាពលរដ្ឋ​ឥណ្ឌូនេស៊ី​ដើមកំណើត​ចិន​ទាំងអស់​និយាយ​ថា ពួកគេ​អាច​អនុវត្ត​ជំនឿ​របស់​ពួកគេ​ដោយ​បើកចំហរ​បានទេ។ ខេត ឡាមប៍ (Kate Lamb) បាន​ទៅទស្សនា​ការប្រារព្ធ​ពិធី​បុណ្យចូលឆ្នាំ​ចិន ដែល​ខុសពី​ធម្មតា នៅក្នុង​ទីក្រុង​ហ្សាកាតា (Jakarta) ដើម្បី​ស្វែងយល់​បន្ថែម​អំពី​រឿងនេះ។
ការអំពាវនាវ​របស់​សាសនា​អ៊ីស្លាម​ទៅកាន់​អ្នក​បួងសួង គឺមិនមែន​ជា​អ្វី ដែល​អ្នក​នឹងផ្សារភ្ជាប់ជាទូទៅ​ជាមួយ​ថ្ងៃបុណ្យចូលឆ្នាំ​ចិននោះទេ។
ប៉ុន្តែ សម្រាប់​ប្រជាពលរដ្ឋ​ឥណ្ឌូនេស៊ី​ដើមកំណើត​ចិន​មួយ​ចំនួន​តូច ឆ្នាំ​ម្សាញ់​នេះ​ ត្រូវបាន​ប្រារព្ធ​ពិធីជា​របៀប​អ៊ីស្លាម​នៅក្នុងព្រះវិហារ។
«នេះ​គឺជា​លើក​ទីមួយ​របស់​ខ្ញុំ ក្នុង​ការប្រារព្ធ​ពិធី​បុណ្យចូលឆ្នាំ​ចិន នៅក្នុង​វិហារ​អ៊ីស្លាម​មួយ ពីព្រោះ​ខ្ញុំ​ទើបតែ​ចូល​សាសន៍ ឬ​ប្រកាស​ខ្លួនឯង​ជា​អ្នក​កាន់​សាសនា​អ៊ីស្លាម​ម្នាក់ កាលពីខែកញ្ញាឆ្នាំមុន។»
នេះគឺជា គង់​ លីហា (Cung Li Ha) ដែល​មាន​អាយុ​២៧ឆ្នាំ។
ជា​ផ្នែក​មួយ​នៃ​ជនជាតិ​ភាគតិច​ចិន​របស់​ឥណ្ឌូនេស៊ី ជម្រើស​សាសនា​របស់​នាង ធ្វើឱ្យ​នាង​ក្លាយ​ទៅជា​អ្វី​មួយ​ដែលខុស​ពីធម្មតា នៅក្នុង​ប្រទេស​ដែល​មាន​អ្នកកាន់​សាសនា​ឥស្លាម​ភាគច្រើននេះ។
នៅក្នុង​ចំណោម​ប្រជាពលរដ្ឋ ឥណ្ឌនេស៊ី ចំនួន​២៤០​លាន​នាក់ ប្រហែល​៩លាននាក់​គឺជា​ប្រជាពលរដ្ឋ ដែលមាន​ដើមកំណើត​ជា​ជនជាតិ​ចិន ដែល​ភាគច្រើន​គឺជាអ្នក​កាន់​សាសនា​ព្រះពុទ្ធ គ្រិស្ត និង​កុងហ៊្វូ។ មនុស្ស​តិចតួច​ប៉ុណ្ណោះបានចូល​សាសនា​អ៊ីស្លាម។
គង់​លី និយាយ​ថា បញ្ហា​ប្រឈម​ធំៗ​នៅ​មាន​នៅឡើយ។ ឧទាហរណ៍ នៅព្រឹកនេះ នាង​ត្រូវ​កុហកក្រុមគ្រួសារ​របស់​នាង​អំពី​ទីកន្លែង​ដែលនាង​ត្រូវទៅ។
«វា​មាន​ការលំបាក​ខ្លាំងណាស់ ពីព្រោះ​គ្រួសារ​ចិន​ភាគច្រើន នៅតែ​មិនអាច​ទទួល​យកបាន​ដែល​ថា កូនៗ​របស់​ពួកគេ ឬគ្រួសារ​របស់​ពួកគេ​ផ្លាស់​ចូលសាសនា​អ៊ីស្លាម។ ជាធម្មតា ពួកគេមាន​ការបើក​ចំហរ​ជាង​ចំពោះ​សាសនា​គ្រិស្តទៅវិញ។»
នៅក្នុង​កំឡុងពេល​បីទសវត្សរ៍ នៃ​របបផ្តាច់ការ​របស់​លោក​ ស៊ូហារតូ (Suharto) ភាសា​និង​ប្រពៃណី​វប្បធម៌​របស់​ប្រជាពលរដ្ឋ ឥណ្ឌូនេស៊ី ដើមកំណើត​ចិន ត្រូវបាន​វាយបង្រ្កាប។
នៅក្នុង​រយៈពេល​មួយ​ទសវត្សរ៍​កន្លងទៅនេះ ប្រជាពលរដ្ឋ ឥណ្ឌូនេស៊ី ដើមកំណើត​ចិន បាន​ប្រារព្ធពិធីបុណ្យ​អ៊ីមលិក​(Imlek) ដែល​ជាភាសា​ក្នុងស្រុក​សម្រាប់​ពិធីបុណ្យ​ចូលឆ្នាំថ្មី​របស់​ចិន ដោយ​សេរី ជាមួយនឹង​សកម្មភាពយ៉ាង​អធិកអធម។
នៅទីក្រុង​ហ្សាកាតា រូបនាគ​យ៉ាង​ធំ​របស់​ចិន ត្រូវបាន​ព្យួរ​ចាប់ពី​អគារ​លក់​ទំនិញ​ធំៗ និង​នៅតាម​ទីវត្ត​អារ៉ាម ដែល​ត្រូវ​បាន​ដាក់​រាយ​នៅជុំវិញ​ទីក្រុង។ អ្នក​បួងសួង​រាប់​ពាន់នាក់ បាន​បន់ស្រន់​ដោយ​មាន​ការ​អុជធូបផង។
ប៉ុន្តែ ប្រជាពលរដ្ឋ​ចិន​កាន់សាសនា​អ៊ីស្លាម មិន​សូវតុប​តែងលម្អរច្រើន​ទេ។
នៅក្នុង​សហគម​របស់​ប្រជាពលរដ្ឋ​ឥណ្ឌូនេស៊ី​ដើមកំណើត​ចិន មាន​ទស្សន​មួយ​ថា ប្រជាពលរដ្ឋ​ចិន​ដែល​កាន់​សាសនា​អ៊ីស្លាម បាន​ធ្វើឱ្យ​បាត់បង់​កេមរតករបស់​ពួកគេ ហើយ​លែង​ជា​ជនជាតិ​ចិន​ទៀត​ហើយ។
ទោះជាយ៉ាងនេះក្តី អ្នក​ទាំងឡាយ​នៅឯ​វិហារ​អ៊ីស្លាម លូតហ្ស៍ (Lautze) ក្នុង​ទីក្រុង ហ្សាកាតា មិនយល់ស្រប​ដូចនេះទេ។
អាលី ការីម (Ali Karim) ធំពេញ​វ័យ​ជា​ជនជាតិចិន​ដែល​កាន់សាសនា​អ៊ីស្លាម​មួយ​រូប ហើយ​និយាយ​ថា វា​មាន​សារសំខាន់​ក្នុង​ការ​បែងចែក​ឱ្យ​បាន​ច្បាស់​រវាង​ប្រពៃណី​និង​សាសនា។
ការីម និយាយ​ថា ប្រជាពលរដ្ឋឥណ្ឌូនេស៊ី​ដើមកំណើតចិន​ភាគច្រើន ជឿជាក់​ថា ពិធីបុណ្យ​ចូលឆ្នាំ​ចិន មិនមែន​ជា​ពិធី​សាសនា​នោះទេ ប៉ុន្តែ ជា​អ្វី​មួយ​ដូច​ជា​បុណ្យ​ចូលឆ្នាំ​សកល​ដែរ។ លោក​និយាយ​ថា វប្បធម៌​មិនដូចគ្នា​នឹង​សាសនា​ទេ។
វិហារ​អ៊ីស្លាម លូតហ្ស៍ គឺជា​វិហារអ៊ីស្លាម​តែ​មួយ​គត់ នៅក្នុង​ទីក្រុង ហ្សាកាតា ដែល​មាន​មនុស្ស​ច្រើន​កុះករ និង​ដែល​មានសុទ្ធតែ​ជនជាតិ​ចិន។
ជាជាង​មាន​ដំបូល​រាង​គ្រឡូម ដែល​រចនា​ទៅដោយ​ប៉ម​ជាច្រើន ចង្កៀង​គោម​ពណ៌ក្រហម ត្រូវបាន​ចងព្យួរ​ពីលើ​ក្លោងទ្វារ​ធំ។
នៅផ្នែក​ខាងក្នុង អក្សរ​ផ្ចង់​ចិន​បុរាណ ដែល​ជា​រំលេច​ពាក្យពេចន៍​របស់​ព្រះ​មហាមាត់ (Prophet Mohammed) ត្រូវបាន​ព្យួរនៅតាម​ជញ្ជាំង ហើយកម្រាល​ព្រំ​សម្រាប់ក្រាល​បួងសួង​ដែល​មាន​ប៉ាក់រូប​ក្រុងម៉ាកាស (Mecca) មាន​ពណ៌ក្រហម​ឆ្អៅ។
អ្នកស្រី ម៉ូឌី អាស្ទុតទី (Mudhi Astuti) ដែល​មាន​វ័យ​៤៦ឆ្នាំ និយាយ​ថា អ្នកស្រី​មាន​អារម្មណ៍​ដូចជាផ្ទះ នៅឯ​វិហារ លូតហ្ស៍ ទោះបីជា​អ្នកស្រី​មិនមែន​ជាជនជាតិ​ចិន​ក៏ដោយ។
«នៅពេល​ដែល​ខ្ញុំ​មក​វិហារ លូតហ្ស៍ វា​ដូចជា​ផ្ទះ​របស់ខ្ញុំដែរ។ និយាយ​តាម​ត្រង់​ទៅ នេះ​មិនមែន​គ្រាន់តែ​ជា​វិហារ​អ៊ីស្លាម​ដ៏​អស្ចារ្យ​មួយ​នោះទេ បេះដូង​របស់​យើង​គឺ​នៅទីនេះ ពីព្រោះ​នៅពេល​ដែល​មិត្តភក្តិ​ជនជាតិ​ចិន​ជាច្រើន​មកទីនេះ ហើយ​ក្លាយ​ទៅជា​អ្នក​កាន់​សាសនា​អ៊ីស្លាម ហើយ​មនុស្ស​គ្រប់គ្នាលែង​មាន​គ្រួសារ​ទៀត​ហើយ គ្មាន​កាងារ​ធ្វើ គ្មាន​លុយ។ យើង​មិនត្រឹមតែ​ស្រលាញ់​គ្នា​ប៉ុណ្ណោះទេ ប៉ុន្តែ​យើង​ថែម​ទាំង​យំ​ទាំងអស់​គ្នា​ទៀតផង។»
អ្នក​ស្រី ម៉ូឌី និយាយ​ថា នៅក្នុង​ចំណោម​ជនជាតិ​ចិន​ប្រមាណ​មួយពាន់​នាក់ ដែល​បានចូល​សាសនា​អ៊ីស្លាម នៅឯ​វិហារ លូតហ្ស៍ ភាគច្រើន​ត្រូវបាន​បដិសេធ​ដោយ​ក្រុមគ្រួសារ​របស់​ពួកគេ។
មនុស្ស​មួយចំនួន​ថែម​ទាំង​ចាកចេញ​ពី​ឪពុកម្តាយ​និងកូនៗ​របស់​ពួកគេ ដើម្បី​ប្រតិបត្តិ​តាម​សាសនា​អ៊ីស្លាម។
ប៉ុន្តែ លោកស្រី​និយាយ​ថា ពេលវេលា​អាច​ជួយ​ផ្សះផ្សា​ ហើយ​ជួនកាល បន្ទាប់ពី​រយៈពេលប៉ុន្មានឆ្នាំក្រោយ​មក ពួកគេ​បាន​បង្កើត​ទំនាក់ទំនង​ល្អ​ជាមួយ​ក្រុម​គ្រួសារ​របស់​ពួកគេ​ឡើងវិញ។
វាគឺជា​ការប្រឈម​ដ៏ថ្លៃ​ថ្លា​ ដែលគង់​លី ដែល​ទើបតែចូល​សាសន៍​ថ្មីៗនេះ នៅតែ​កំពុង​ព្យាយាមពន្យល់​គ្រួសារ​របស់​នាង។
លោក​ស្រី​និយាយ​ថា អ្នកស្រី​មាន​ការព្រួយ​បារម្ភ​ ដែល​ថា​ពួកគេ​ប្រហែល​ជា​នឹង​មិន​ទទួលយក​សាសនា​ថ្មី​របស់​លោកស្រី ប៉ុន្តែ កន្លងមក ការប្រារព្ធពិធី​បុណ្យចូលឆ្នាំ​ថ្មី មិនមាន​អ្វី​ខុសប្លែក​គ្នា​នោះទេ។
«ខ្ញុំ​ទស្សទាយ​ថា វា​គឺជា​រឿង​តែមួយ។ ខ្ញុំ​គ្រាន់តែ​មិន​ទៅ​និយាយ​បែបន់ និង​សូត្រមន្ត នៅចំពោះ​មុខ​ផ្លាក​ព្រលឹង​បុព្វបុរស​ដែល​ត្រូវបាន​រៀប​ពេញ​នៅលើ​តុតែប៉ុណ្ណោះ។ វា​គ្រាន់តែ​ថា ខ្ញុំ​មិនបាន​ធ្វើដូច្នេះ ហើយ​ខ្ញុំ​ព្យាយាម​មិន​ហូប​សាច់ជ្រូក ប៉ុន្តែ ខ្ញុំ​នៅតែ​ហូប​នំ ដែល​ម្តាយ​របស់​ខ្ញុំ​ធ្វើ និង​គុយទាវ ប៉ុន្តែ ក្រៅពីនេះ ខ្ញុំ​ព្យាយាម​មិន​ប៉ះពាល់​អ្វី​ទាំងអស់។»
នៅក្នុង​ឆ្នាំ​ពស់ធាតុទឹក ឆ្នាំថ្មី​នេះ គង់លី សង្ឃឹម​ថា​នឹងមានសេចក្តី​ក្លាហានក្នុង​ការ​និយាយ​ប្រាប់​ឪពុកម្តាយ​របស់​នាង​ថា នាងចូល​ ​សាសនាអ៊ីស្លាម។
ទោះបីជា​នាងសារភាព​ថា ពួកគេ​ប្រហែលជា​បាន​ដឹង​រឿងនេះ​រួច​ទៅហើយក៏ដោយ៕
XS
SM
MD
LG