ភ្ជាប់​ទៅ​គេហទំព័រ​ទាក់ទង

មនុស្ស​៨​នាក់​ស្លាប់​និង​​ច្រើន​ទៀត​រង​របួស​នៅ​ក្រុង​ញូវយ៉ក​ដោយ​សារ​អ្នក​បើក​បរ​ម្នាក់​បើ​បំបុក​លើ​ផ្លូវ​សម្រាប់​អ្នក​ជិះ​កង់


កង់​នៅ​កន្លែង​កើត​ហេតុ​ ក្នុង​តំបន់​ Manhattan នៃក្រុង​ញូវយ៉ក កាល​ពី​ថ្ងៃទី​៣១ ខែ​តុលា ក្រោយ​ពេល​ឡាន​មួយ​គ្រឿង​បាន​បើក​បុក​លើ​ផ្លូវ​សម្រាប់​អ្នក​ជិះ​កង់។

មាន​មនុស្ស​យ៉ាង​តិច​ណាស់​៨​នាក់​បាន​ស្លាប់​និង​ជាង​១២​នាក់​ទៀត​បាន​ត្រូវ​របួស​កាល​ពី​ថ្ងៃ​អង្គារ នៅ​ពេល​បុរសម្នាក់​បាន​បើក​ទ្បាន​ដឹក​ទំនិញ​ជួល​មួយ​គ្រឿងចូល​ទៅ​ក្នុង​កន្លែង​ជិះ​កង់​មួយ​ក្នុង​បូរី​ញូវយ៉ក។​

លោក ​Bill de Blasio ​អភិបាល​ក្រុង​ញូវយ៉ក​បាន​មានប្រសាសន៍​នៅ​ក្នុង​សន្និសីទ​កាសែត​មួយថា៖ «ផ្អែក​លើ​ព័ត៌មាន​ដែល​យើង​មាន​នៅ​ពេល​នេះ​ ការណ៍​នេះ​ជា​សកម្មភាពភេរវកម្ម​មួយ​ហើយ​ជា​សកម្មភាព​ភេរវកម្ម​ដ៏​កំសាក​មួយ​ដែល​យក​ពួក​ជន​ស៊ីវិល​ស្លូត​ត្រង់គ្មាន​ទោសពៃរ៍​ជា​ទី​ដៅ​នៃ​ការ​វាយ​ប្រហារ»។

លោក ​Andrew Cuomo ​អភិបាល​រដ្ឋ​ញូវយ៉ក​ បាន​ហៅ​ការ​វាយ​ប្រហារ​នេះ​ថា​ជា​ការ​វាយ​ប្រហារ​«ធ្វើ​ឡើង​ដោយ​មនុស្ស​តែ​ម្នាក់»​ដោយ​លោក​បាន​មាន​ប្រសាសន៍​ថា​ គ្មាន​ភ័ស្តុតាង​បង្ហាញ​ថា​ វា​ជា​ផ្នែក​មួយ​នៃ​ការ​គ្រោង​ប្រព្រឹត្ត​អំពើ

ទុច្ចរិត​ធំ​ដុំ​ណា​មួយ​ទេ។ ឧប្បត្តិហេតុ​នេះ​បាន​កើត​មាន​ឡើង​នៅ​ជិត​កន្លែង​អនុស្សាវរីយ៍​មជ្ឈមណ្ឌល​ពាណិជ្ជកម្ម​ពិភពលោក​នៅ​ក្នុង​ផ្នែក​ខាង​ត្បូង​នៃ​សង្កាត់​ Manhattan។​

លោក ​James O'Neill ​ស្នងការប៉ូលិស​បូរី​ញូវយ៉ក​បាន​និយាយ​ថា​ នៅ​ប្រមាណ​ម៉ោង​៣និង​៥នាទី​រសៀល​ បុរស​ម្នាក់​បាន​បើកឡាន​កាមីញុង​ជួល​មួយ​គ្រឿង​ចូល​ក្នុង​កន្លែង​ជិះ​កង់​ដោយ​បាន​បុក​ពួក​អ្នក​ជិះកង់​និង​ពួក​ថ្មើរ​ជើង។​ រថយន្ត​កាមីញុង​ នោះ​ក៏​បាន​បុក​ឡាន​ដឹក​សិស្ស​សាលា​មួយ​គ្រឿង​ដែរ​បណ្តាល​ឱ្យ​មនុស្ស​ពេញ​វ័យ​ពីរ​នាក់​និង​កុមារ​ពីរ​នាក់​ត្រូវ​របួស។​

លោក ​O'Neill ​បាន​ថ្លែង​ថា​បន្ទាប់​មក​បុរស​នេះ​ «បាន​ចេញ​ពី​ឡាន​កាមីញុង នោះ​ដោយ​បាន​គ្រវី​កាំ​ភ្លើង​ខ្លី​ពីរ​ដើម។​ ពួក​ប៉លិស​បាន​បាញ់​បុរស​នេះ​ត្រូវ​ពោះ​ហើយ​គាត់​ក៏​បាន​ត្រូវ​ចាប់​ខ្លួន»។​

បុរស​នេះ​បាន​ទទួល​ការ​វះ​កាត់​ហើយ​ត្រូវ​រំពឹង​ថា​នឹង​នៅ​រស់។​

ក្រសួង​ការបរទេស​អាហ្សង់ទីន​ បាន​និយាយ​ថា​ ពលរដ្ឋ​ខ្លួន៥​នាក់​បាន​ស្លាប់។

លោក​ Didier Reynders​ ឧបនាយក​រដ្ឋមន្ត្រី​នៃ​ប្រទេស​ប៊ែលហ្ស៊ិក​ បាន​មាន​ប្រសាសន៍​ថា ជន​ជាតិ​របស់​ខ្លួន​ម្នាក់​បាន​ត្រូវ​សម្លាប់​នៅ​ក្នុងការ​វាយ​ប្រហារ​នោះ៕

XS
SM
MD
LG