នៅក្នុងអំឡុងខែកញ្ញានេះ យ៉ាងតិចមានអ្នកកាសែតប្រាំបីនាក់នៅតាមបណ្តាខេត្តចំនួនពីរគឺខេត្តកំពង់ឆ្នាំង និងខេត្តកំពត ត្រូវចាប់ឃាត់ខ្លួន និងចោទប្រកាន់ដោយតុលាការពីបទកំហែងទារប្រាក់។
ចំណាត់ការមួយចំនួនត្រូវគេដឹងថា កើតចេញដោយមានបណ្តឹងពីអង្គភាពប្រឆាំងអំពើពុករលួយដែលជាស្ថាប័នរបស់រដ្ឋាភិបាល។
អ្នកកាសែតទាំងនោះមកពីអង្គភាពសារព័ត៌មានដើមអម្ពិល ទូរទស្សន៍អប្សរា ទូរទស្សន៍ហង្សមាស កាសែតថ្ងៃនេះ កាសែតនគរវត្ត សមាជិកសមាគមអ្នកកាសែតប្រជាធិបតេយ្យ ស្ថានីយទូរទស្សន៍ខ្មែរប៉ុស្តិ៍លេខ៩។
ក្រុមអ្នកជំនាញបានមើលឃើញពីភាពមិនច្បាស់លាស់នៅក្នុងការបំពេញវិជ្ជាជីវៈឲ្យបានត្រឹមត្រូវរបស់ស្ថាប័នព័ត៌មាននិងរបស់ស្ថាប័នរដ្ឋ។
លោក សេក បរិសុទ្ធ ប្រធានក្រុមប្រឹក្សាក្រមសីលធម៌អ្នកសារព័ត៌មានកម្ពុជា បានអត្ថាធិប្បាយដោយផ្អែកលើមូលដ្ឋានវិជ្ជាជីវអ្នកសារព័ត៌មាន និងការឆ្លៀតឱកាសរួមទាំងការការពារផលប្រយោជន៍របស់ជនពុករលួយ។
«វាអាស្រ័យទៅលើការណ៍ពិតពីព្រោះវាអាចកើតទៅរួច។ ពេលខ្លះអ្នកកាសែតធ្វើទៅប៉ះពាល់លើផលប្រយោជន៍បុគ្គលខូច ហើយបុគ្គលនោះធ្វើបាបអ្នកកាសែត។ ប៉ុន្តែវាអាចទៅរួចដែរ ក្នុងករណីខ្លះ អ្នកសារព័ត៌មានប្រើប្រាស់តួនាទីដើម្បីផលប្រយោជន៍ ដើម្បីលាភសក្ការៈដែលខុសទៅនឹងគោលការណ៍ដែរ»។
ប្រទេសកម្ពុជាមានកាសែត និងទស្សនាវដ្តីដែលចុះបញ្ជីនៅក្រសួងព័ត៌មានរាប់រយ ក៏ប៉ុន្តែមានសារព័ត៌មានដែលចេញផ្សាយទៀងទាត់មួយក្តាប់តូចតែប៉ុណ្ណោះ។ អ្នកយកព័ត៌មានមួយចំនួន ជាពិសេសនៅតាមមូលដ្ឋានខេត្តនានា ត្រូវគេរំឭកអំពីការបំពេញតួនាទីជំនួសសមត្ថកិច្ច ដូចជារដ្ឋបាលព្រៃឈើ ឬភ្នាក់ងារគយ ឬក៏ភ្នាក់ងារប៉ូលិស និងកងរាជអាវុធហត្ថជាដើម។
លោក អ៊ូ វីរៈ ប្រធានក្រុមប្រឹក្សាភិបាលរបស់មជ្ឈមណ្ឌលសិទ្ធិមនុស្សកម្ពុជា បានលើកឡើងថា ការចាត់ការលើអ្នកយកព័ត៌មានដែលមានកំហុសគឺជារឿងត្រឹមត្រូវ។ ប៉ុន្តែការឆ្លៀតឱកាសបានរបស់អ្នកកាសែតក៏អាចបណ្តាលមកពីអំពើខុសច្បាប់របស់បុគ្គលអ្នកប្តឹងនោះដែរ។
«មិនមែនអ្នកកាសែតទាំងអស់ទេ ប៉ុន្តែនៅតាមខេត្តមួយចំនួន មិនមែនអាជីពទេគ្រាន់តែកន្លែងមួយដើម្បីទៅសំឡុតគេយកលុយទេ។ ហើយនៅប្រទេសយើងភាគច្រើនដែលគាត់សម្លុតបានគឺអ្នកនោះខុសច្បាប់ដែរទេ។ ដូចជាសម្លុតអ្នកដឹកឈើ ឬជួនកាលសម្លុតអ្នកធ្វើអាជីវកម្មក៏មានដែរ តែសុទ្ធតែអ្នកប្រព្រឹត្តនូវអំពើខុសច្បាប់ដែរទេ។ បើសិនជាទាក់ទងរឿងសម្លុតយកលុយអ្វីហ្នឹង គួរតែចាប់ជនល្មើសនោះដែរ។ បើយើងទុកឲ្យម្នាក់ៗយកតួនាទីអ្នកកាសែតធ្វើដូច្នេះ វាខូចឈ្មោះដល់សេរីភាពសារព័ត៌មានផងដែរ»។
ក្នុងចំណោមអ្នកកាសែតទាំងប្រាំបីនាក់ ដែលត្រូវចាប់ខ្លួន អ្នកកាសែតចំនួនប្រាំមួយនាក់ត្រូវតុលាការខេត្តកំពង់ឆ្នាំងដោះលែងមកវិញ។ ដោយឡែកអ្នកកាសែតចំនួនពីរនាក់មកពីទូរទស្សន៍ហង្សមាស និងទូរទស្សន៍ខ្មែរប៉ុស្តិ៍លេខ៩កំពុងស្ថិតក្រោមចំណាត់ការរបស់តុលាការតាមបណ្តឹងរបស់អង្គភាពប្រឆាំងអំពើពុករលួយ។ អ្នកកាសែតទាំងពីរស្ថិតក្នុងរឿងដែលមិនច្បាស់លាស់មួយទាក់ទងនឹងព្រៃកោងកាងនៅក្នុងឆ្នេរសមុទ្រនៃខេត្តកំពត។ រឿងនេះដែលទំនងជាបានពាក់ព័ន្ធជាមួយការសម្រេចចិត្តបែបណារបស់អាជ្ញាធរមូលដ្ឋាន។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា មានប្រសាសន៍ថា ការចាប់ខ្លួនអ្នកកាសែតស្ថិតក្រោមការមន្ទិលសង្ស័យនៃភាពជាប់ពាក់ព័ន្ធនឹងអំពើខុសច្បាប់បែបណាមួយ។
«ទៅជំរិតយកលុយគេនេះគឺខុសច្បាប់ហើយ គឺស្ថិតក្នុងច្បាប់ប្រឆាំងអំពើពុករលួយដែរ។ ដូច្នេះបើសិនជាអ្នកសារព័ត៌មានទៅជំរិតយកលុយគេ គំរាមយកលុយគេគឺជាបទល្មើសមួយ។ ប៉ុន្តែចំណុចដែលមន្ទិលសង្ស័យនោះគឺថា តើគាត់ទៅជំរិតយកលុយអ្នកណា ហើយអ្នកដែលគាត់ទៅជំរិតយកលុយនោះបានធ្វើអ្វីខុស? មានចំណុចខ្សោយអី ទើបអាចអ្នកសារព័ត៌មានអាចទៅជំរិតឬគំរាមទារប្រាក់»។
វីអូអេបានព្យាយាមទាក់ទងសុំការពន្យល់ពីលោក ឱម យ៉ិនទៀង ប្រធានអង្គភាពរបស់រដ្ឋាភិបាលប្រឆាំងអំពើពុករលួយ តែមិនអាចទាក់ទងបានទេនៅថ្ងៃនេះ។
ទោះជាយ៉ាងណា លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រីមើលឃើញថា មានការប្រព្រឹត្តលើសដែនកំណត់របស់វិជ្ជាជីវៈសារព័ត៌មានមួយចំនួន ហើយនេះជាវិធានការតាមផ្លូវច្បាប់តែប៉ុណ្ណោះ។
ទោះជាបែបនេះក្តី ចំណាត់ការលើអ្នកកាសែតតាមបណ្តឹងរបស់អង្គភាពប្រឆាំងអំពើពុករលួយនេះបង្ហាញពីចំណាត់ការដែលជាប់ពាក់ព័ន្ធនឹងអំពើមួយដែលស្ថិតក្នុងដែនសមត្ថកិច្ចនៃការប្រឆាំងនឹងអំពើពុករលួយ។
លោកព្រាប កុល នាយកប្រតិបត្តិនៃអង្គការតម្លាភាពកម្ពុជា មានប្រសាសន៍ថា ការវាយសំពងលើអំពើពុករលួយមានប្រសិទ្ធិភាពច្រើននៅប្រទេសមួយចំនួនគឺត្រូវបោសសំអាតលើមន្ត្រីកាន់មុខការសាធារណៈដែលមានបណ្តាស័ក្តិធំនិងមានតួនាទីផ្តាច់មុខ ហើយចំណាត់ការត្រូវធ្វើជាប្រព័ន្ធ។
ដោយឡែក លោកសេក បរិសុទ្ធ ប្រធានក្រុមប្រឹក្សាក្រមសីលធម៌អ្នកសារព័ត៌មានកម្ពុជា យល់ថា ចំណាត់ការជាទូទៅលើអំពើពុករលួយត្រូវផ្តោតលើទាំងវិធានការអប់រំ និងវិធានការច្បាប់ រាប់បញ្ចូលទាំងការអប់រំលើអ្នកកាសែតផងដែរ៕
