ក្រសួងសុខាភិបាលកូរ៉េខាងត្បូងបានរាយការណ៍ថា មនុស្សពីរនាក់ទៀតបានស្លាប់ដោយសារមេរោគ MERS នៅថ្ងៃព្រហស្បតី៍នេះ ខណៈដែលក្រសួងហិរញ្ញវត្ថុរបស់រដ្ឋាភិបាលទីក្រុងសេអ៊ូលបានប្រកាសពីកម្មវិធីប្រាក់ជំនួយសេដ្ឋកិច្ច ស្របពេលមានការព្រួយកង្វល់ពីការផ្ទុះឡើងនូវមេរោគនោះ ដែលកំពុងធ្វើឲ្យប៉ះពាល់សេដ្ឋកិច្ច។
ការស្លាប់នៅពេលថ្មីៗនេះធ្វើឲ្យចំនួនមនុស្សស្លាប់មកពីមេរោគ MERS បានឡើងដល់២៩នាក់ហើយ។ មនុស្ស៧៧នាក់ទៀតកំពុងស្ថិតក្នុងការព្យាបាលនៅឡើយ ដែលក្នុងនោះ ១៥នាក់ស្ថិតក្នុងស្ថានភាពធ្ងន់ធ្ងរ។
ទោះបីការរាលដាលនៃជំងឺនេះបានធ្លាក់ចុះក៏ដោយ ការរីកសាយភាយអាចមានផលប៉ះពាល់រយៈពេលយូរទៅទៀតលើសេដ្ឋកិច្ចរបស់ប្រទេសកូរ៉េខាងត្បូង។
នៅថ្ងៃព្រហស្បតិ៍នេះ ក្រសួងហិរញ្ញវត្ថុកូរ៉េខាងត្បូងបានកាត់បន្ថយការព្យាករណ៍កំណើនសេដ្ឋកិច្ចនៅឆ្នាំនេះពី៣,៨ភាគរយមកត្រឹម៣,១ភាគរយ។ លោក Choi Kyung-hwan រដ្ឋមន្រ្តីក្រសួងហិរញ្ញវត្ថុ បានប្រាប់សន្និសីទកាសែតថា «ខ្ញុំមានការព្រួយកង្វល់ថា កំណើនសេដ្ឋកិច្ចនឹងស្ថិតនៅក្រោម១ភាគរយក្នុងត្រីមាស៥ជាប់ៗគ្នារហូតមកដល់ត្រីមាសទី២នេះ»។
ក្រសួងហិរញ្ញវត្ថុក៏បានប្រកាសកម្មវិធីប្រាក់ជំនួយសេដ្ឋកិច្ច ដែលមានតម្លៃ១៣,៥ពាន់លានដុល្លារ។ កម្មវិធីនោះនឹងរួមមានថវិកាបន្ថែមដើម្បីជួយទូទាត់ផលប៉ះពាល់នៃការផ្ទុះឡើងមេរោគ MERS ក៏ប៉ុន្តែចំនួនថវិកានោះមិនទាន់ត្រូវបានកំណត់នៅឡើយទេ។
កំណើនសេដ្ឋកិច្ចបានរងការប៉ះពាល់ នៅស្របជនជាតិកូរ៉េខាងត្បូងជាច្រើនកំពុងមានការភ័យខ្លាចពីការឆ្លងមេរោគ MERS ដោយស្ថិតនៅឆ្ងាយពីហាងលក់ដូរទំនិញ និងទីកន្លែងសាធារណៈនានា ដែលពោរពេញទៅដោយមនុស្ស៕
