ភ្ជាប់​ទៅ​គេហទំព័រ​ទាក់ទង

លោក Duterte៖ ខ្ញុំ​សន្យា​នឹង​ព្រះ​ជា​ម្ចាស់​ថា​ឈប់​ជេរ​ទៀត​ហើយ


លោកRodrigo Duterte ឆ្លើយ​សំណួរ​ក្នុង​សន្និសីទ​កាសែត​មួយ​បន្ទាប់​លោក​បាន​បញ្ចប់​ទស្សនកិច្ច​នៅ​ក្នុង​ប្រទេស​ជប៉ុន នៅ​ព្រលាន​យន្ត​ហោះ Davao International Airport ក្នុង​ក្រុង Davao ប្រទេស​ហ្វីលីពីន កាលពី​ថ្ងៃទី២៧ ខែតុលា ឆ្នាំ២០១៦។

ប្រធានាធិបតី​ហ្វីលីពីន​លោក​ Rodrigo Duterte បាន​ថ្លែង​ថា លោក​នឹង​មិន​ប្រើ​ពាក្យ​ជេរ​ប្រទេច​ទៀត​នោះ​ទេ បន្ទាប់​ពី​លោក​បាន​និយាយ​ទៅ​កាន់​ព្រះ​ជា​ម្ចាស់​រួច​មក។

លោក Duterte បាន​ថ្លែង​កាល​ពី​ល្ងាច​ថ្ងៃ​ព្រហស្បតិ៍​នៅ​ក្នុង​ទីក្រុង Davao ដែល​ជា​ស្រុក​កំណើត​របស់​លោក​ថា ព្រះ​បាន​និយាយ​ទៅ​កាន់​លោក​នៅ​លើ​យន្តហោះ​ក្នុង​អំឡុង​ពេល​លោក​ត្រឡប់​ទៅ​ពី​ដំណើរ​ទស្សនកិច្ច​នៅ​ប្រទេស​ជប៉ុន​វិញ​នា​ពេល​ថ្មីៗ​នេះ។

លោក​បាន​ថ្លែង​ថា មនុស្ស​នៅ​លើ​យន្តហោះ​ជុំវិញ​លោក​កំពុង​តែ​សម្រាក​នៅ​ពេល​ដែល​លោក​បាន​ឮ​សំឡេង​និយាយ​ថា៖ «ប្រសិន​បើ​អ្នក​មិន​ឈប់​ប្រើ​ប្រាស់​ពាក្យ​សម្តី​អសុរោះ​នោះ​ យើង​នឹង​ទម្លាក់​យន្តហោះ​នេះ​ភ្លាម»។

នៅ​ពេល​នោះ​លោក​ Duterte បាន​សួរ​ថា៖ «តើ​អ្នក​ណា​គេ​ហ្នឹង»? ពេល​នោះ​មាន​សំឡេង​ឆ្លើយ​តប​ថា៖ «យើង​គឺ​ជា​ព្រះ​ជា​ម្ចាស់»។

ដោយ​សារ​តែ​លោក​ខ្លាច​ធ្លាក់​យន្តហោះ មេដឹកនាំ​ហ្វីលីពីន​រូប​នេះ​បាន​ថ្លែង​ថា​ លោក​បាន​សន្យា​ថា​លោក​នឹង​ឈប់​ជេរ​ប្រទេច។ លោក​បាន​ថ្លែង​ទៀត​ថា ពាក្យ​សន្យា​ទៅ​កាន់​ព្រះ​ជា​ម្ចាស់​គឺ​ជា​ពាក្យ​សន្យា​ទៅ​កាន់​ពលរដ្ឋ​ហ្វីលីពីន។

លោក​ Duterte ដែល​ល្បីល្បាញ​ក្នុង​ការ​ប្រើ​ប្រាស់​ពាក្យ​សម្តី​ជេរ​ប្រទេច​នៅ​ពេល​ដែល​លោក​និយាយ​សំដៅ​ទៅ​លើ​ជន​ដែល​ញៀន​គ្រឿង​ញៀន​ និង​អ្នក​ជួញដូរ​គ្រឿង​ញៀន ហើយ​លោក​បាន​ហៅ​មេដឹកនាំ​ពិភពលោក​ដូច​ជា​សម្តេច Pope Francis និង​ការ​ហៅ​លោក​ប្រធានាធិបតី​អាមេរិក​ បារ៉ាក់ អូបាម៉ា ថា «អា​កូន​ឆ្កែ» ឬ​ការ​និយាយ​ឲ្យ​លោក​អូបាម៉ា ចុះ​នរក​ជា​ដើម។
ទោះ​ជា​យ៉ាង​នេះ​ក្តី​ មាន​ការ​ប៉ាន់​ប្រមាណ​ថា​ ពាក្យ​សន្យា​នេះ​នៅ​មិន​បាន​យូរ​នោះ​ទេ។

នៅ​ពេល​ដែល​ក្រុម​អ្នក​សារព័ត៌មាន​សួរ​ថា​តើ​ ពាក្យ​សន្យា​ទៅ​កាន់​ព្រះ​ជា​ម្ចាស់​មាន​ន័យ​ថា​ លោក​នឹង​ឈប់​ប្រើ​ពាក្យ​ជេរ​ប្រមាថ​ទៅ​លើ​សហរដ្ឋ​អាមេរិក ​ឬ​សហភាព​អឺរ៉ុប​ឬ​យ៉ាង​ណា។ លោក​បាន​ឆ្លើយ​តប​ថា៖ «វា​អាស្រ័យ​ទៅ​លើ​ស្ថានភាព​នៅ​ពេល​នោះ»៕

XS
SM
MD
LG