មនុស្សជាង៥០នាក់បានស្លាប់នៅពេលដែលយន្តហោះយោធាមួយគ្រឿងរបស់ប្រទេសនីហ្សេរីយ៉ា ទម្លាក់គ្រាប់បែកច្រឡំលើជំរំមួយសម្រាប់មនុស្សគ្មានទីលំនៅ កាលពីថ្ងៃអង្គារនេះ។
យន្តហោះចម្បាំងនោះគ្រោងទម្លាក់គ្រាប់បែកលើពួកកងជីវពល Boko Haram ក៏ប៉ុន្តែទម្លាក់លើជំរំជនភៀសខ្លួនមួយសម្រាប់ពួកអ្នករត់ចេញពីផ្ទះសម្បែងដោយសារពួកភេរវករ នេះបើតាមសម្តីរបស់មន្ត្រីយោធាម្នាក់។
ប្រធានាធិបតីនៃប្រទេសនីហ្សេរីយ៉ា លោក Muhammudu Buhari បានសរសេរនៅក្នុងទំព័រ Twitter របស់លោកថា «ខ្ញុំបានទទួលព័ត៌មានដ៏ក្រៀមក្រំមួយថាយន្តហោះកងទ័ពជើងអាកាសរបស់យើងបានទម្លាក់គ្រាប់បែកច្រឡំទៅលើសហគមស៊ីវិលមួយ»។
អង្គការវេជ្ជបណ្ឌិតគ្មានព្រំដែនបាននិយាយថា សមាជិករបស់អង្គការនេះបានជួយព្យាបាលអ្នករបួសចំនួន ១២០នាក់ ហើយថាអ្នកស្លាប់មានចំនួន៥២នាក់។ អង្គការកាកបាទក្រហមអន្តរជាតិនិយាយថា សមាជិករបស់ខ្លួនដែលមានសញ្ជាតិនីហ្សេរីយ៉ា ៦ នាក់ ស្ថិតក្នុងចំណោមអ្នកស្លាប់ទាំងនោះ៕
